Cristo Maire Cacaiquë Api
2
Maija'quë do'ijë iyere toyayë,
mësarupi co'aye yo'oma'pë pa'ija̱jë caquë.
Ja̱je pa'iquëta'are co'aye tayosicohua'i panije payë,
mai do'ire pëca ja'quë ja̱'re ca de'huacaiquëre,
Jesucristore nuñe pa'iquëre.
2 Jesucristo cato mai tayo yo'oyepi cui'ne si'aohua'i iye yeja pa'icohua'i yo'oyepi sa̱i de'huacaise'e pa'ija̱quë caquë ju̱cacaji'i.
3 Ja̱je pa'ina,
Maija'quë cua̱ñese'ere sehuocaicohua'i pani de'hue i̱te asa ti̱'acohua'ipi pa'iyë asayë.
4 Ja̱je pa'ina,
yë'ëpi i̱te asa ti̱'ahuë caquëpi i̱ cua̱ñese'ere sehuoma'quë pani coa cosoquë api,
i̱ni nuñerepa cocapi peo do'ire.
5 Ja̱je pa'iquëta'are i̱ cocare asaquë i̱ cua̱ñeñeje yo'oquë pani i̱te nuñerepa oiquëre papi.
Ja̱je pa'ijë i̱ ja̱'re tsiosicohua'ipi pa'iyë asayë.
6 Ja̱je pa'ina,
Maija'quëna tsioni pa'iyë caquë pani,
Jesucristo pa'ise'eje̱ pa'ye pa'iye pa'iji.
Huajë Cua̱ñeñe
7 Yë'ë oicohua'i,
mësaru tsoe du'ru huëo maca asajë pa'isi cocare toyayë,
tsoe hue̱'ña cua̱ñese'ere,
huajë cua̱ñeñere toyama'ë pa'iyë.
Iye cocare mësarupi asahuë.
8 Ja̱je pa'iquëta'are,
huajë cua̱ñeñere toyayë.
Ja̱je pa'ina,
Jesuni ñajë,
cui'ne mësaruni ñajë nuñerepa cocare ñañe pa'iji.
Ja̱je pa'ina,
yure cato ñami pa'ise'epi tëto saina,
nuñere papi miacaiji.
9 Ja̱je pa'ina,
mia hue̱'ñare pa'iyë caquëta'a Maija'quë do'iquëre coequë cato ja̱ yë'ta'a nea hue̱'ñare pa'iji.
10 Maija'quë do'iquëre oiquë cato mia hue̱'ñare pa'iji.
Ja̱je pa'ire co'ayepi i̱te ne ta̱oñe peoji.
11 Maija'quë do'iquëre coequë cato,
nea hue̱'ñare pa'iji,
i̱ sai hue̱'ñaje huesëquëpi,
neañepi ñaco ca̱na tëhuo huesosiquëpi ñama'ë pa'iji.
12 Tsi̱ maña toyayë,
mësarute,
mësaru tayo yo'ose'ere Jesucristo do'ipi,
sa̱i de'huacaisi do'ire.
13 Ja'quëohua'i toyayë,
mësarute de'hue asa ti̱'arena,
ja̱'a huëo maca pa'isiquëre.
Toyayë,
po̱sëohua'i mësarute,
huatireje̱ ñese quëcosi do'ire.
Toyahuë,
mësarute tsi̱ maña de'hue ja'quëre pare asa ti̱'asi do'ire.
14 Toyayë,
mësarute ja'quëohua'i,
ja̱'a pa'i huëo maca pa'isiquëni de'hue asa ti̱'asi do'ire.
Toyahuë,
mësarute po̱sëohua'i de'hue tutu quë'iohua'i pa'ijë Maija'quë cocapi mësaruni pa'ina,
huatire quëcorena.
15 Ja̱je pa'ina,
oima'pë pa'ijë̱'ë,
iye yejare,
cui'ne i̱ote pa'i co'amañare.
Ja̱je pa'ina,
iye yejare oito Diusu oiyepi i̱te peoji.
16 Si'aye iye yeja ayere pa̱ipi ti̱'añe cato Maija'quë i̱se'e peoji,
co'ayere ca̱pë yëye,
ñaco ca̱pi ña ëaye,
cui'ne jerepa pa'i a'ë cuasaye,
si'aye iye cato yeja aye a'ë.
17 Ja̱je pa'ina,
iye yeja cato si'a i̱o co'aye yëye co̱ni caraja̱ija'copi pa'ico.
Ja̱je pa'iquëta'are Maija'quë yëyere yo'ocohua'i cato ti pani huesëja̱'cohua'i a'ë.
Nuñerepa Coca, Cui'ne Cosoye
18 Huau dohuë,
ti̱'api,
tëji mu'señarepa,
mësaru ja̱'në Cristo sa̱ñope yo'oquë daija̱'quë api cajëna,
asase'epi.
Ja̱je pa'iye yure jai pa̱i Cristore sa̱ñope yo'ocohua'i etahuë.
Ja̱je pa'ina,
tëji mu'seña'ë asayë.
19 Mai ja̱'re pa'isicohua'ipi etahuë,
mai acohua'irepa peo do'ire.
Ja̱ohua'i yëquë acohua'irepa pani mai ja̱'re patira'huë.
Ja̱ohua'i cato etahuë,
si'aohua'i mai acohua'ise'e pa'iye pa̱ñere i̱ñojë.
20 Ja̱je pa'iquëta'are mësarute Cristopi i̱sipi,
de'o joyore.
Ja̱je pa'ina,
nuñerepa ayere mësaru asacohua'i pa'iyë.
21 Ja̱je pa'ina,
mësarute toyama'ë paë'ë,
nuñerepa cocare coa caye a'ë cuasacohua'ire toyayeje̱ pa'ye.
Mësarupi nuñerepa cocare asa ti̱'acohua'ire sëte.
Ja̱je pa'ina,
mësarupi asayë,
nuñerepa cocapi cosoye aye pa'iye peoji.
22 ¿Jequë a'ni,
cosoquë?
Cosoquë cato Jesure Cristorepa peoquëni coa caye a'ë caquë api.
Ja̱ëpi Cristore sa̱ñope yo'oquë,
mamaquëre cui'ne pëca ja'quëre coa caye a'ë caquë api,
cosoquë cato.
23 Ja̱je pa'ina,
mamaquëre i̱repa peoquëni coa cayë caquë cato Maija'quëre peoquëpi pa'iji.
Ja̱je pa'iquëta'are mamaquëre i̱re papi caquë cato Maija'quëre paquëpi pa'iji.
24 Ja̱je pa'ina,
mësaru ja̱'a huëo maca asase'epi mësaruni pa'ito mësarupi mamaquëna cui'ne pëca ja'quëna tsiosicohua'ipi pa'ija̱'cohua'i a'ë.
25 Ja̱je pa'ina,
ti pa'iyere payë,
Jesucristo maire ca nëose'ere.
26 Cosocohua'i ayere quëaquë toyahuë,
mësarute.
27 Ja̱je pa'iquëta'are mësaru cato payë,
Maija'quë joyore,
Jesucristo i̱sisiconi.
Ja̱je pa'ina,
yecohua'i ye'yayere asañu'u cajë yo'oma'pë pa'iyë.
Maija'quë joyopi mësarute ye'yaquë pa'iji.
I̱ ye'yaye cato caraja̱i ma'ñe a'ë,
nuñere pa'ë,
coso ma'ñe a'ë,
i̱ti ye'yayeje̱ pa'ye yo'ojë Jesucristo ja̱'re pa'ijë̱'ë.