2 SAN JUAN
Nuñerepa Pa'iye Cui'ne Ti Oiye
1
Aipi yë'ë iye toya ja'hua toyayë,
Maija'quë sahuasicona,
cui'ne i̱ti tsëcapë acohua'ina caquë,
yë'ë nuñerepa ai oicohua'ina.
Yë'ëse'e oiye pa̱ñë,
cui'ne yë'ë oiyeje̱ pa'ye mësarute oiyë,
nuñerepa cocare asasicohua'ipi.
2 Oiyë,
mësarute nuñerepa cocapi yëquë joñoare pa'i do'ire,
ja̱ nuñerepa cato mai ja̱'re ti pani huesë ja̱'ñe a'ë.
3 Ja̱je pa'ina,
Maija'quëpi cui'ne Ëjaë Jesucristo Maija'quë mamaquëpi co̱ni nuñerepa yo'ojë mësarute oijë i̱ oiyere,
jo'cua de'oye pa'iyere,
cui'ne teaye pa'iohua'ire ñani co̱caiyere i̱sija̱jë.
I̱sijëna,
de'oye pa'ijë̱'ë.
4 Mësaru mamajë acohua'ipi Maija'quë maire cua̱ñese'ere nuñere pare pa'ijëna,
ti̱'ani ñani yë'ë ai sihuahuë.
5 Yure ja̱je pa'ito Maija'quë do'ijë se̱ñë,
mësarute.
Pa̱i ñape yecohua'ire sa̱'ñe oijë pañu'u.
Iye yë'ë mësarute toyaye huajë cua̱ñese'e peoji.
Tsoe ja̱'a huëo maca mai asase'e a'ë.
6 Pa̱ire oijë pa'iye cato Maija'quë cua̱ñese'eje̱ pa'ye yo'ojë pa'iye pa'iji.
Ja̱je pa'ina,
cua̱ñese'ere tsoe ja̱'a huëo macana asasicohua'i sëte pa̱ire oiyere pa'ijë̱'ë.
Coa Cosocohua'i
7 Jai pa̱i cosocohua'i iye yeja pa'iyë,
Jesucristore nuñerepa pa̱ije pa'irepa daji'i cama'cohua'i.
Ja̱je pa'ina,
i̱te ja̱je cama'cohua'i cato cosocohua'i a'ë,
cui'ne Cristore sa̱ñope yo'ocohua'i a'ë.
8 Si'aye mësaru nesi do'i sa̱i cua̱ñoñere cajë de'hua ñajë'ë,
mësaru ai yo'ojë nesi co'amañare nejoñe.
9 Cristo ye'yase'ere pa'ima'ë,
Cristo ye'yase'ere tëto sani yo'oyë caquë cato,
Maija'quëre peoquë api.
10 Ja̱je pa'ina,
mësaru quë'rona daicohua'ipi iye ye'yase'ere dama'cohua'i pa'ito,
“daijë̱'ë,
huë'ena” cama'pë pa'ijë̱'ë.
Cui'ne pëpayeje̱ pa̱jë'ë.
11 Ja̱je yo'ocohua'ire pëpaquë cato i̱ohua'i co'aye yo'o të'huire pa'iji,
do'i quë'ye.
Ca Tëji Cocarepa
12 Jaiye mësarute caquë toyaye payë.
Ja̱je pa'iquëta'are toya ja'huana tintapi toyaye coeyë.
Coa ai jerepa mësaru quë'rona sani mësaruni ñaquë cayere yëyë,
mai sihuayepi ti̱'ase'erepa pa'ija̱'co caquë.
13 Maija'quë sahuasico mamajëje më'ëre pëpa saoyë,
më a'yo mamajëje pa'iohua'ipi.
Ja̱je pa'ija̱quë.