1 SAN JUAN
Pa'i Cocarepa
1
Toyayë,
mësarute du'ru pa'i huëose'ere pare.
Ja̱re yëquëpi asajë cui'ne yëquë ñaco ca̱re papi ñahuë.
Ja̱je pa'ina,
ñajë yëquë jë̱ñapi i̱tire papihuë,
pa'i coca ayere.
Ja̱ cato cayë.
2 Iye pa'i cocapi yëquëna eta i̱ñopi,
pëca ja'quë ja̱'re co̱ni pa'ise'epi.
Ja̱re yëquëpi i̱te quëacaicohua'ipi ñani mësarute quëahuë,
ja̱ ti pani huesëyere.
3 Yëquë ñase'ere cui'ne yëquë asase'ere mësarute quëahuë,
mësarupi yëquë ja̱'re tsioni pa'ija̱jë cajë,
yëquë Maija'quëna cui'ne i̱ mamaquë Jesucristona tsioni pa'iyeje̱ pa'ye.
4 Ja̱je toyayë,
mësarute sihuayepi ti̱mëse'erepa pa'ija̱quë cajë.
Ë̲sëje̱ Pa'i Api, Maija'quë
5 Iye coca cato Jesucristo yëquëre ye'yase'e a'ë.
Ja̱re mësarute quëahuë.
Maija'quë cato ë̱së miañeje pa'ye miaquë api,
i̱te ti peoji,
nea te̱'te macaje̱.
6 Ja̱je pa'ina,
maipi i̱ ja̱'re tsioni pa'iyë cacohua'ita'a ja̱ yë'ta'a nea hue̱'ñare pa'ini coa cosoyë,
cayepi cui'ne yo'oyepi.
7 Ja̱je pa'iquëta'are maipi Diusu pa'iyeje̱ mia hue̱'ñare pa'icohua'i pani yecohua'ire tsiosicohua'ipi pa'iyë.
Ja̱je pa'ito Jesucristo Diusu mamaquë tsiepi si'aye co'ayere tsoa to̱caiji,
maire.
8 Tayo yo'oye peoyë cacohua'i pani maija'a co'ye cosoyë,
nuñerepa pa'iyepi maini peo do'ire ja̱je cacohua'ipi.
9 Ja̱je pa'iquëta'are tayo yo'oyere cajë oijë Maija'quëna quëato,
Maija'quë de'hue necai nuñerepa yo'oja̱'quë api.
Ja̱je yo'oquë i̱pi mai co'aye yo'ose'ere sa̱i de'huacai cui'ne si'aye tayo yo'ose'ere tsoa to̱caija̱'quë api.
10 Maipi tayo yo'oma'cohua'i a'ë cacohua'i pani Maija'quëpi coa cosoquëje̱ pa'iyere neñë.
I̱ nuñerepa cocare i̱tire pa'ë cajë cama'pë sehuoma'cohua'ipi.