3-4 Cuasajë̱'ë,

iyere:

Tëji mu'seña cato i̱ohua'i yëyeje̱ pa'ye co'ayere yo'ocohua'ipi daija̱'cohua'i a'ë.

Ja̱ohua'ipi cue'cue yë'opi,

se̱ja'cohua'i a'ë:

“Me neo'ni,

yure Cristo dasi'i ca nëose'e”,

mai aipë maña ju̱ju satoje̱ yeja de'hua maca acoje̱ pa'iopi nëio caraja̱ico iye yeja.

5 Ja̱re se̱cohua'ipi cato tsoe hue̱'ña Maija'quëpi cua̱ñequëna,

ma'tëmo ëjacona,

cui'ne yejaje̱ oco da'case'e pa'isicopi oco da'caja̱'a yeja ëjapi.

Ja̱re asacohua'ita'a ja̱re asayere coejë ja̱je cayë.

6 Cui'ne tsoe hue̱'ña yejaje̱ ocopi co'jeni si'aye i̱ote pa'iye nejose'eje̱ asacohua'i a'ë.

7 Ja̱je pa'iquëta'are ma'tëmo cui'ne yeja yure pa'iye cato toana ëo ja̱'ñepi pa'iji,

Maija'quë cua̱ñe do'ipi de'huase'epi.

Ja̱ toapi pa̱i ñape yo'ose'e ña tëji mu'serepa co'acohua'ire ëo huesoquë nejoja'quë api.

8 Maija'quë do'ijë yë'ë oicohua'i iyeje̱ hua̱nëyema'pë pa'ijë̱'ë,

mai Ëjaëre cato te'e mu'sepi mil o̱metëcaje̱ pa'ye pa'iji,

cui'ne mil o̱metëcapi te'e mu'seje̱ pa'ye pa'iji.

9 Mai Ëjaë yecohua'i cayeje̱ pa'ye i̱ ca nëose'ere yo'o ti̱'ama'ë tsoe nëima'ë pa'iji.

Coa ai jerepa i̱ cato mësaruni cuasaquë dahuëre yo'oji,

pa̱i ju̱ni huesëyere ë̱sequë.

Ja̱je pa'ina,

i̱ cato yëji,

si'aohua'i Maija'quëna po̱nëni co'iyere ti̱ro pa'icohua'ipi.

10 Ja̱je pa'iquëta'are ti cuasama'topi ti̱'aja'coa,

Ëjaë mu'se cato,

co'amaña ñaë daiyeje̱ pa'ye.

Ja̱ macarepa ma'tëmo cato peo hue̱'ñarepa nejosico pasio ai huajëya'yerepa tutu pi̱siyepi.

Ja̱ macarepa ma'tëmo pa'i co'amaña peo hue̱'ñarepa ëose'e pasipi,

cui'ne iye yeja pa'i co'amañaje peo hue̱'ñarepa ëose'e pasipi.

11 Ja̱je si'aye nejo ja̱'ñese'e pa'iji asacohua'i sëte,

ai jerepa i̱na i̱sisicohua'ipi i̱se'ere cuasajë necaijë pa'iye pa'iji.

12 Ja̱je pa'ina,

Diusu yo'oja̱'a mu'se esa ti̱'ajaquë cajë tutu yo'ojë̱'ë,

Maija'quë yo'oja̱'a mu'serepa ti̱'añere utejë.

Ja̱ mu'se cato si'aye ma'tëmo pa'iye cui'ne yeja pa'iye nejo huesose'e pasipi,

toa uyepi peo hue̱'ñarepa ucosi huesoquëna.

13 Ja̱je pa'iquëta'are mai cato huajë ma'tëmore cui'ne huajë yejare utejë pa'iyë.

Diusu ca nëose'ere de'oyese'e cui'ne nuñere pase'e pa'ija̱'tore.

14 Ja̱je pa'ina,

Maija'quë do'ijë maña iye co'amañare utejë pa'ijë de'oye yo'ojë pa'ijë̱'ë.

Maija'quëpi ti̱tani si'si te̱'ña peocohua'ire cui'ne co'aye yo'ose'e peocohua'ire de'oye ñaja'quëre.

15 De'hua cuasajë̱'ë,

mai Ëjaë cato maire oi do'ire esa daiye pa̱ji,

maipi huasosicohua'i pa'ija̱jë caquë.

Ja̱je cui'ne toyapi,

Maija'quë do'iquë mai oiquë Pabloje̱,

Diusu i̱te ta̱'ñe asaye i̱sise'eje̱ pa'ye.

16 I̱ mësarute toya saoye ñape iye ayere mësarute capi.

Ja̱re caquë toyase'e ayeta'a yeque cato asa ti̱'añe jëayeque pa'iji.

Pa'ina,

ja̱re huesëohua'ipi Maija'quë pa'iji cuasaye carasicohua'ipi ti̱ñe po̱nañë.

Ja̱ po̱nañeje pa'ye Maija'quë coca toyase'eje̱ ti̱ñe po̱nacohua'i sëte,

i̱ohua'i nejo cua̱ño ja̱'ñere ja̱je yo'oyë.

17 Ja̱ do'ire Maija'quë do'ijë,

yë'ë oicohua'i mësaru cato iye pa'i ja̱'ñere cuasacohua'ipi de'hua ñajë pa'ijë̱'ë,

mësaru nuñerepa pa'iyere,

co'acohua'ipi mësarute i̱ohua'i cosoyepi ne ta̱ojë.

18 Ja̱je pa'ina,

mësaru cato ai jerepa mai Ëjaë huasoquë Jesucristoni de'oyerepa i̱ pa'iyere asa ti̱'ajë'ë,

i̱ oiyeje̱ pa'ye oiyena ai de'oja̱'cohua'i.

Ja̱ëpi de'oquërepa yure cui'ne je'nëna ti caraja̱ima'quërepa.

Ja̱je pa'ija̱quë.