4 Diusu i̱ hui̱ñaohua'i tayosi do'i sa̱i de'huacaiye pa'a̱ji'i.

Coa ai jerepa i̱ohua'ire cato hue̱ni ai nea hue̱'ñare pana toa yejana je̱ocoa̱'ji'i.

Ja̱ohua'i cato pa̱i ñape yo'ose'e ña mu'señarepa ca tëjija̱'cohua'ipi de'huasicohua'ipi pa'iyë.

5 Ja̱je pa'ye cui'ne yeja tsoe hue̱'ña pa'isicohua'ireje̱ Diusu sa̱i de'huacaiye pa̱'aji'i,

i̱ohua'i tayose'e.

Coa ai jerepa ocopi co'je hue̱a'ji'i.

Co'je hue̱acona,

coa Noé macase'ere,

i̱ti nuiñe pa'iyere quëasiquëse'ere cui'ne i̱ ja̱'re co̱ni siete pa̱i pa'icohua'ise'ere huasoa̱'ji'i.

6 Ja̱je cui'ne Sodoma cui'ne Gomorra pa̱i daripë̱aje Diusupi nejoa̱'ji'i,

hua̱tase'e ëo huesoquë.

Iye cato yo'oa̱'ji'i,

jeteyo'je co'a pa̱i pa'icohua'ipi ja̱je yo'oye co'aye a'ë cuasajë pa̱ ja̱'ñere caquë.

7 Ja̱je yo'oquë coa Lotse'ere huasoa̱'ji'i,

co'a pa̱ipi co'ayere yo'ojëna,

ñaquë oi pa'isiquëse'ere.

Ja̱ë cato nuñe pa'iquë pa'a̱ji'i.

8 Ja̱je nuñe pa'ipi i̱ohua'i quë̱no macare pa'i si'a mu'señapi si'aye i̱ohua'i co'aye yo'oyere asaquë cui'ne ñaquë i̱ de'o joyopi ai yo'oquë oi pa'a̱ji'i.

9 Ja̱je mai Ëjaë cato i̱na i̱sisicohua'ire neñañere pa'ito huasoquë api.

Ja̱je pa'iquëta'are co'acohua'ire cato pa̱i ñape yo'ose'e ña mu'serepa si'seja̱'cohua'ini paquë api.

10 Diusupi si'seja̱'quë api,

si'sire yëjë yo'ojë pa'icohua'ire,

ëjaohua'i cayere coejë sa̱ñope cacohua'ire.

Ja̱je pa'iohua'ipi huajëya'ye peoyerepa cui'ne ai co'a ju̱'ima'pë i̱ohua'i yëyese'e cuasajë ti ca'rama'pë ëjaohua'ire co'aye cacohua'i a'ë.

11 Ja̱je pa'iquëta'are hui̱ñaohua'i ai tutu pacohua'ita'a ëjaohua'ire co'aye cama'cohua'i a'ë,

Maija'quë ña hue̱'ña.

12 Ja̱je pa'iquëta'are ja̱ohua'i cato coa nëtëroja̱icohua'ije̱ pa'iohua'i a'ë.

Asa ti̱'añe peocohua'i a'ë.

Coa i̱ohua'ire nëiñeje yo'ocohua'i a'ë.

Tse̱ani huani je̱oja'cohua'ipi jojosicohua'i a'ë.

Ja̱je pa'iohua'ipi i̱ohua'i asaye ti̱'a ma'ñere co'aye a'ë cayë.

Ja̱ do'ire nëtëroja̱icohua'i ju̱'iñeje pa'ye ai yo'ojë ju̱ni huesëja̱'cohua'i a'ë.

13 Yecohua'ire i̱ohua'i co'aye yo'osi do'ire sa̱i de'hua cua̱ñojë yure cato si'a mu'seña a̱niroja̱ijë sihuacohua'irepa pa'iyë,

cuasayë.

Ja̱ohua'i cato si'si a'sioje̱ pa'iohua'i pa'iyë,

mësaru ja̱'re co̱ni.

Ja̱je pa'iohua'ipi mësaru ja̱'re co̱ni a̱o a̱ijë sihuayë cajë yo'oyë,

i̱ohua'ire coso huesose'ere jerepa yo'o huajëjë.

14 Ja̱je pa'iohua'ipi te'o macareje̱,

nomiore coa ñañe pa̱ñë,

ja̱re nomi ëayese'epi ñacohua'i a'ë,

tayo yo'oyeje̱ ti jë'joma'cohua'i a'ë.

Tutu peocohua'ire cato i̱ohua'i yo'oyepi cosojë co'aye yo'oyena ne ta̱ocohua'i a'ë.

Ai co'amaña tsi'soni payere cajë ta̱'ñerepa yo'ocohua'i a'ë,

Maija'quë co'aye ca nëosicohua'ipi.

15 Beor mamaquë Balaam co'ayere yo'oquë curiquë nesi'i caquë yo'o ja̱'ñeje pa'ye yo'oyë,

ja̱ohua'i cato.

16 Ja̱je yo'oquëna,

i̱te burra ti cama'copi pa̱i yë'ore papi i̱ tayoquë yo'oyere ca quëcoa̱'co'ë.

Ja̱je cani i̱ cuepequë yo'oyere necaiye pa̱'aco'ë.

17 Iye pa̱i cato oco dea pëpi oco peocoje̱ pa'icohua'i a'ë,

cui'ne sirioni tutupi ti̱rona tutu saoyeje̱ pa'iohua'i a'ë,

nea hue̱'ñare pana ti nejoja'cohua'ire ña nëosicohua'ipi pa'iyë.

18 Ja̱ohua'i cato pa ëaye nëi tutupi ca huëocohua'i a'ë,

do'i peo cocapi cajë.

Ja̱je cajë tayocohua'i quë'ropija̱'a cati huajësicohua'ini,

i̱ohua'i ca̱pë co'aye yëyena ca̱pë ëayere sëo mease'ere yo'ojë,

cosojë ja̱ohua'ire co'aye yo'oyena ne ta̱ocohua'i a'ë.

19 Ja̱je yo'ojë cayë iye a'ë,

de'oyerepa pani huajëye.

Ja̱je cajëta'are i̱ohua'i si'si pa'iyepi jo'ya nesicohua'ire paji.

Ja̱je pa'ina,

si'a pa̱i i̱ohua'ire yo'o ëaquëna,

quëco ti̱'ama'pë yo'oyere ëjaëre payë.

Ja̱pi jo'ya nesicohua'ire paquëna,

pa'iyë.

20 Ja̱je pa'ina,

maire huasoquë Ëjaë Jesucristore asa do'ire iye yeja co'aye pa'iyere cati saicohua'ipi cui'naohua'ini ja̱'në co'aye yo'ose'epi hue̱ co̱sicohua'i pani,

ja̱'në pa'ise'e se̱ña maca co'a hue̱'ñana cacayë.

21 Ja̱ do'ire ai jerepa de'ora'pi,

ja̱ohua'ire nuñerepa pa'i cocare asama'cohua'ipi pa'ito co'aji.

Yure cato Maija'quë de'oyerepa cua̱ñeñere i̱ohua'ina i̱sipi,

i̱te asasicohua'ita'a je̱oni pa'ijëna.

22 Ja̱je pa'iquëta'are ja̱ohua'ina ti̱'api,

tsoe case'epi:

“Jo'ya yai i̱ siso o̱asiconi a̱ni co̱quë api,

cui'ne se̱se ja̱'a de'oye tsoa to̱sicopi ya'o dana cui'naopi cuyacoa.”