Maija'quë Mamajë
3
Ñajë'ë,
Maija'quë maire ai oi yë'ë mamajë a'ë cayere.
Care paji,
mai i̱ mamajë a'ë.
Ja̱je pa'ina,
iye yeja pa̱i mai pa'iye asa ti̱'añe pa̱ñë,
Maija'quë pa'iye asa ti̱'ama'cohua'i sëte.
2 Ja̱je pa'ina,
mai cato Maija'quë mamajë a'ë.
Ja̱je pa'iquëta'are Maija'quë do'ijë ja̱ yë'ta'a huesëyë,
mai ti̱ñe pa'iohua'i pa'i ja̱'ñere.
Ja̱je pa'iquëta'are asayë,
Jesucristo ñaisi maca i̱te ñajë maije i̱je pa'iohua'i pa'i ja̱'ñere.
3 Ja̱je pa'ina,
si'aohua'i i̱na uteye pacohua'i cato i̱ohua'ija̱'a co'ye tsoa to̱ñë,
Jesucristoje̱ pa'iohua'irepa,
ne'cua peocohua'irepa pañu'u cajë.
4 Ja̱je pa'iquëta'are cua̱ñese'ere tayo yo'oquë pani co'aye yo'oji.
Ja̱je pa'ina,
tayoye cato cua̱ñese'ere ne jëyoye a'ë.
5 Tsoe mësarupi asayë,
Jesucristo ti co'aye yo'oma'quëpi iye yejana daise'e,
mai tayo yo'ose'ere nejocasi'i caquë.
6 Ja̱je pa'ina,
i̱ ja̱'re tsioni pa'iquë cato tayo yo'oma'quë api.
Ja̱je pa'iquëta'are tayo yo'oquë cato i̱teje̱ ñama'quë api,
cui'ne i̱ pa'iyeje̱ asa ti̱'ama'quë api.
7 Huau dohuë,
yecohua'ina coso cua̱ñoma'pë pa'ijë̱'ë,
nuñere pare yo'oquë cato nuñe pa'iquë api,
Jesucristo nuñerepa pa'iyeje̱ pa'ye.
8 Ja̱je pa'iquëta'are tayose'ere yo'oquë pa'iquë cato huati tse̱quë api.
Huati cato ja̱'a huëo maca aquëpi tayose'ere yo'oquë pa'iquë api.
Ja̱je pa'ina,
Maija'quë mamaquë huati nese'ere nejosi'i caquë daji'i.
9 Maija'quë mamaquë de'osiquë cato tayo yo'oyere yo'oma'quë api,
Maija'quë ayepi i̱ni pa'i do'ire.
Tsoe Maija'quë mamaquë sëte tayo yo'oma'quë api.
10 Ja̱je pa'ina,
pa̱i yo'oyena ñani asaye pa'iji,
Maija'quë mamajëre,
cui'ne huati mamajëre,
nuñere pare yo'oma'cohua'ipi,
cui'ne yecohua'ire oima'cohua'i cato Diusu tse̱cohua'i peoyë.
Sa̱'ñe Oijë Pa'iye
11 Pa̱i ñape yecohua'ire oiye pa'iji ca cocare mësaru du'ru macarepa asasicohua'i a'ë.
12 Caínje pa'iohua'i pa'ima'pë pañu'u,
huati aquëpi yo'jeire huani je̱ose'eje̱ pa'iohua'i.
Me yo'oquë yo'jeire huani je̱ose'e ñani,
Caín yo'oyepi co'aye paji'i.
Pa'ina,
yo'jei yo'oyepi de'oye paji'i.
Ja̱ do'ire huani je̱opi.
13 Ja̱je pa'ina,
Maija'quë do'ijë,
iye yeja acohua'ipi mësarute coecohua'i pa'ito ¿me yo'ojë ja̱je yo'oye'ni?
cajë ai cuasama'pë pa'ijë̱'ë.
14 Ja̱je pa'ina,
maipi asajë pa'iyë,
ja̱'në ju̱'iñere pa'isicohua'ipi ti pa'iyena tëto saisicohua'ipi pa'iye,
Maija'quë do'ijëre ai oi do'ipi.
Ja̱je pa'iquëta'are Maija'quë do'ijëre oima'quë cato ja̱ yë'ta'a ju̱'i hue̱'ñare pa'iji.
15 Maija'quë do'iquëre coequë cato pa̱ire huani je̱oquëje̱ pa'i api.
Ja̱je pa'ina,
tsoe mësarupi asayë,
pa̱ire huani je̱oñe yëquë cato ti pani huesëye peoquë pa'iyere.
16 Pa̱ire oiye asa ti̱'añë,
Jesucristo maire oi do'ire ai yo'ose'ere asajë.
Ja̱je cui'ne maije Maija'quë do'ijëni oijë ai yo'ocaiye pa'iji,
mai pa'iyepi.
17 Ja̱je pa'iquëta'are iye yeja co'amaña paquëpi,
Maija'quë do'iquëpi caraja̱ni ai yo'oquëna,
co̱caima'ë coa ñato co'aji.
¿Ja̱je pa'ire me Maija'quë oiye i̱ joyore pa'iquë'ni?
18 Huau dohuë maña,
ja̱je pa'ina,
coa yë'ose'epi oiyë cama'pë pañu'u.
Coa ai jerepa nese'ere papi i̱ñoñu'u,
mai nuñerepa oiye.
I̱ Ña Hue̱'ñare Pana Quëcojë Pa'iye
19 Iyere asajë,
nuñerepa acohua'i a'ë cuasajë cui'ne i̱ ña hue̱'ñare pana mai joñoaje̱ i̱ tse̱re pa'ë asajë co'a ju̱'iñe peoyerepa pa'ija̱'cohua'i a'ë.
20 Ja̱je pa'ina,
mai joyopi co'acohua'i a'ë sa̱ñope caye pa'ito,
Maija'quë mai joyo asaye jerepa pa'i sëte jerepa si'aye asaji,
mai pa'iye.
21 Ja̱je pa'ina,
Maija'quë do'ijë,
mai joyopi sa̱ñope maire caye peoto co'a ju̱'iñe peoyerepa Maija'quëna quëcojë pa'iyë.
22 Ja̱je pa'ijë i̱ yëyere yo'ocohua'ipi,
cui'ne i̱ cua̱ñese'ere de'oye sehuocaicohua'ipi mai yëyere i̱te se̱to i̱pi i̱sija̱'quë api.
23 Iye a'ë,
i̱ cua̱ñeñe.
Jesucristo cato Maija'quë mamaquë api asani i̱te tuiye pa'iji.
Cui'ne pa̱i ñape yecohua'ire oijë pa'iye pa'iji,
Jesús cua̱ñese'eje̱ pa'ye.
24 Ja̱je pa'ina,
i̱ cua̱ñese'e sehuocaicohua'i cato Maija'quë ja̱'re co̱ni pa'iyë,
Maija'quëpi i̱ohua'ini pa'ina.
Maija'quë joyore maina i̱sisi do'ire asayë,
Maija'quëpi mai ja̱'re pa'iye.