3 Necaicohua'ire peocohua'ini hua'jeohua'ire co̱caijë̱'ë.

4 Ja̱je pa'iquëta'are hua'jeopi mamajëre cui'ne naje tsi̱re paco pa'ito ja̱ohua'ipi co̱caiye pa'iji,

i̱ohua'i tsëcapë acore.

Ja̱je yo'ojë pëca ja'quëohua'ire cui'ne ñecuëohua'ire sa̱ija'cohua'i a'ë,

ai de'huasi do'i.

Ja̱je co̱caiyere Maija'quë sihuaquë ñaquë api.

5 Ja̱je pa'ina,

co̱caicohua'ire peocopi te'o maca nëasicoa,

hua'jeorepa.

Ja̱je pa'iopi Maija'quëpi co̱caija̱'quë api cuasaco mu'seña cui'ne ñamiña se̱o pa'ico.

Ja̱je se̱o pa'iconi co̱caiye pa'iji,

sehuosicohua'ipi.

6 Ja̱je pa'iquëta'are hua'jeopi si'aye i̱o ca̱pë yëyere yo'oroja̱ico cato tsoe ju̱'isicoa,

huajëco pa'icota'a.

7 Iyere yo'ojë̱'ë caquë cua̱ñejë'ë,

nuñerepa de'oyese'e yo'ocohua'i pa'ija̱'cohua'ire.

8 Ja̱je pa'ina,

sehuosiquëpi i̱ huë'e acohua'i pa'iyere cuasama'ë,

de'oye ñacaima'quë pani,

sehuoma'quëre se̱ña maca co'aquë pa'iye pa'iji.

Ja̱je pa'i pani sehuosiquë a'ë ca ti̱'añe peoji.

9 Hua'jeohua'ire toya pëpëna toyaye pa'iji,

sesenta o̱metëca pacopi cui'ne te'ire ë̱jëre pasiconi.

10 De'oye yo'ocona,

yecohua'ipi ñasiconi,

mamajëre de'oye ai de'huasiconi,

i̱o huë'ena do'i daicohua'ire de'oye pëpaco pa'isiconi,

sehuosicohua'ire nëcañoa tsoacaisiconi,

ai yo'ocohua'ire co̱caio pa'isiconi,

ja̱je si'aye de'oyese'e nesi'i cato yo'oco pa'isiconi,

toyaye pa'iji.

11 Nomi tsi̱pi hua'jeohua'i pa'ito toyama'ë pa'ijë̱'ë,

hua'jeohua'ire toya pëpëna.

I̱ohua'i ca̱pë yëyepi pa'ina,

huejañu'u cajë yo'ojë Cristore tuiye je̱oni,

12 i̱ohua'i necañu'u ca nëose'ere ne ti̱'ama'pë jai do'i quë'iohua'i de'ocohua'i a'ë.

13 Cui'ne yequeje̱,

huë̱'ña ñape cu'ijë jo̱saohua'i de'oni,

cui'ne co'a coca cacohua'i de'oni coa si'aye yo'ojë ti caye pa̱'ñe pa'yere caroja̱icohua'i a'ë.

14 Ja̱je pa'i do'ire nomi tsi̱pi hua'jeohua'i pani huejaja̱jë cayë,

huejani mamajëre pajë,

huë'e ñacaicohua'i pa'ija̱jë.

Pa'ijëna,

huatije̱ cue'cuema'ë pa'ija̱'quëre.

15 Ja̱je pa'ina,

yecohua'i nomi tsi̱ hua'jeohua'ipi Cristore tuiye je̱oni huati ëjaëna pe'te huesëhuë.

16 Sehuosi nomiopi i̱o tsëcapë acohua'ini hua'jeohua'ire pani co̱caiye pa'iji.

Sehuosicohua'ipi co̱caija̱'cohua'i a'ë cajë uteye peoye.

Sehuosicohua'i cato co̱caicohua'ire peocohua'ini co̱caicohua'i a'ë.

17 Sehuosicohua'i ëjaohua'ire ai oiye pa'iji,

sehuosicohua'ire de'oyerepa sacohua'ipi,

cui'ne Maija'quë cocase'e quëajë de'oye ye'yacohua'ire.

18 Ja̱je pa'ina,

Maija'quë toya pëpë caji:

“Duruhue̱quë yë'opo sëama'pë pa'ijë̱'ë,

i̱se'equë a̱i tsa'cuja̱quë.”

Cui'ne yequeje̱ caji:

“Co'amaña nequëre sa̱iñe pa'iji,

i̱ yo'o do'i.”

19 Sehuosicohua'i ëjaëre sa̱ñope co'aye caye pa'ito asama'ë pa'ijë̱'ë,

cayahua'i pa̱nita'a toaso̱cohua'i i̱ yo'ose'e ñacaicohua'ipi peoto.

20 Ja̱ yë'ta'api co'ayere yo'ojë pa'icohua'ireta'a yëhuo quëcojë̱'ë,

si'aohua'i ña hue̱'ñana.

Yecohua'ije̱ ja̱je yo'oye co'aye a'ë cuasajë ca'raja̱'cohua'ire.

21 Cua̱ñeñë,

më'ëre,

mai Diusu cui'ne mai Ëjaë Jesucristo,

cui'ne hui̱ñaohua'i i̱ sahuasicohua'i ña hue̱'ñana,

iye cua̱ñese'ere te'ohua'ise'ere yeque yo'oma'ë,

si'aohua'ire si'a yë'quë macarepa yëhuoja̱quë caquë.

22 Ja̱je pa'ina,

më'ëpi yecohua'ire esarepa patoquë se̱cacaiye pa̱jë'ë,

i̱ohua'i co'aye yo'o do'ire sa̱i co̱ñe pa'iji.

De'oyerepa cuasani yo'ojë i̱ aye co'ayere yo'oma'quërepa pa'ijë̱'ë.

23 Ë̲tapë a'si ju̱'iquë sëte ocose'e u̱cuma'ë pa'ijë̱'ë,

o'sa co̱noje a'ri maña u̱cujë̱'ë,

më'ë ë̱tapë co̱cai ja̱'ñe.

24 Yecohua'i co'aye yo'oye si'a pa̱i ti̱ñarepa ñañe pa'iji,

ja̱ yë'ta'a i̱ohua'i yo'ose'e ña de'hua hue̱'ña saima'ë.

Yecohua'i co'aye yo'oyere jeteyo'je dahuëre asaye pa'iji.

25 Ja̱je cui'ne de'oye yo'oyeje̱ yequere ti̱ñarepa ña cua̱ñoñe pa'iji.

Yequere ñama'pë pa'ise'ere jeteyo'je ñañe pa'iji.

Si'anë yahuese'epi pa'i caraja̱iñe peoji.