3 Mu'seña cui'ne ñamiña se̱ñe ñape më'ëre cuasani Maija'quëpi ñacaiji,

caquë pëpayë,

i̱te,

de'oye cuasayere papi yë'ë necaiquëna,

yë'ë aipë yo'ojë pa'ise'eje̱ pa'ye.

4 Cui'ne hua̱nëyema'ë si'anë cuasayë,

yë'ë je̱o saina,

më'ë oi co etoquëna,

ñase'ere.

Ja̱je pa'ina,

më'ëni ña huajë'ñe nëina,

ai cuasaquë pa'iyë.

5 Ja̱je cuasayë,

më'ëpi nuñerepa Maija'quë pa'iji cuasaquë yo'ose'ere ñasi do'ire.

Ja̱je cui'ne du'ru macare paje̱ më'ë ñeco Leoidapi cui'ne më'ë ja'co Eunicepi Maija'quë pa'iji cuasacohua'ipi paë'ë.

Ja̱je pa'ina,

më'ëje cui'ne cuasaquë pa'iji caquë nuñerepa cayë.

6 Yë'ë jë̱tëpi më'ëna pato maca Maija'quëpi më'ë yo'oja̱'a tuture i̱sipi.

Ja̱je pa'ina,

cua̱ñeñë,

më'ëre.

Toa ja'jë tsë̱oñeje pa'ye yo'ojë̱'ë,

i̱tire.

7 Ja̱je pa'ina,

Maija'quë ca'ra joyore i̱sima'ë paji'i,

maire.

Coa ai jerepa tutu quë'i joyore pa̱ire oiyere cui'ne asare pajë de'oye pa'iyere i̱sipi.

8 Ja̱je pa'ina,

mai Ëjaë Jesucristo do'ire quëacaijë̱'ë,

huajëya'ye peoquëpi.

Cui'ne i̱ do'ire yë'ë tse̱a cua̱ñosiquë pa'ina,

ñani huajëya' coema'ë pa'ijë̱'ë.

Coa ai jerepa huaso coca quëajë ai yo'oyere yë'ëje̱ quëaquë pasi'i cuasajë̱'ë,

Maija'quë tutu i̱siyepi.

9 Ja̱je pa'ina,

Maija'quëpi huasoni soipi,

i̱ ja̱'re tsioni de'ocohua'irepa pa'ija̱'cohua'ini.

Ja̱ yë'ta'a yeja de'huama'në maire oji'i,

Cristo Jesús necai ja̱'ñere caquë.

Ja̱je pa'ina,

i̱ cuasase'ere yo'oquë huasopi,

maire.

Mai neñepi ti̱'añe pa̱huë.

10 I̱ tsoe cuasase'ere yureta'a Jesucristo dani ju̱ni huesë tutu pa'ise'ere nejo maca,

cui'ne huaso cocapi,

ti ju̱'ima'pë pa'iyena necai maca,

i̱ñopi.

11 Iye coca quëaja̱'quëre ca nëosiquë a'ë.

Ja̱je pa'ina,

Jesús jëjo saoquë sëte quëaquë,

ye'yaquë pa'iyë.

12 Ja̱ do'ire ai yo'oyë.

Ja̱je ai yo'oquëta'a huajëya'ye peoquëpi yo'oyë,

yë'ë quëcoquëre paye sëte.

Ja̱je pa'ina,

asayë,

tutu quë'ipi yë'ëre de'oye ñacaija̱'quë api,

i̱ ca nëose'ere ne tëji mu'seja̱'a.

13 Yë'ë nuñerepa pa'yere ye'ya i̱ñose'eje̱ pa'ye tuijë̱'ë.

Cui'ne Jesucristo ja̱'re tsioni pa'ijë pa̱ire oiyere,

cui'ne Maija'quë pa'iji cuasajë pa'iyere pa'ijë̱'ë.

14 Maija'quë joyo maire pa'iquë co̱caiyepi de'hua ñacaijë̱'ë,

de'oye ye'yayere Maija'quë nuñerepa cocare i̱sise'ere necaija̱'quë api caquë.

15 Tsoe më'ëpi asayë,

si'aohua'i Asia yeja pa'icohua'i yë'ëre je̱ocojëna,

cui'ne ja̱ohua'i ja̱'re co̱ni Figelo cui'ne Hermogenes je̱ose'e.

16 Onesíforo tsëcapëre mai Ëjaëpi oi teaye ñaquë co̱caija̱quë.

Cosiquë yë'ë pa'ina,

ja̱ohua'ipi huajëya'ye cosiquëni yo'oma'quëpi cama'ë sihua ëaye jaiye de'oye yo'o huasopi,

yë'ëre.

17 Ja̱je yo'oquëpi Roma ti̱'asi maca co'e jujani je̱oma'ë co'equë ti̱'api,

yë'ëre.

18 Ja̱je pa'ina,

mai Ëjaëpi ja̱ mu'serepa oi teaye ñacaija̱quë Onesíforore.

Më'ë ñaquëna,

maire Efeso pa'i maca,

co̱caise'eje̱ pa'ye co̱caji'i.

Ja̱re më'ëpi tsoe asayë.