6
Co'amaña necaija̱'cohua'ire jo'ya nesicohua'i pani mësaru ëjaohua'ire ca'rajë ñajë'ë,
ja̱ohua'ipi co'aye Maija'quë mamire cui'ne i̱ coca mai ye'yayere sa̱ñope cama'pë pa'ija̱'cohua'ire.
2 Pa̱nita'a co'amaña necaija̱'cohua'ire jo'ya nesicohua'ipi sehuosicohua'ini ëjaohua'ire pani je̱oma'pë pa'ijë̱'ë,
sehuosicohua'i a'ë cajë,
ëjaohua'ire ñajë paye.
Maija'quëre sehuosicohua'ipi te'e Maija'quë do'ijëpi pa̱ire oicohua'ipi,
co'amaña ne cua̱ñoñe sëte jerepa de'oye necaiye pa'iji.
Ja̱je caquë iyere ye'yaquë quëajë̱'ë.
Pa'iye Cui'ne Mai De'oye Cuasaye
3 Yequë pa̱ipi mai Ëjaë Jesucristo ye'yase'eje̱ pa'ye ye'yama'ë,
cui'ne mai nuñerepa Maija'quëre se̱jë yo'oyeje̱ pa'ye ye'yama'ë pani,
4 huesëquëpi ye'yaji,
jerepa pa'i a'ë cuasaquëpi.
Ja̱je pa'ipi ju̱'i dahuëje̱ pa'ye paji,
sa̱ñope ca ëayere.
Ja̱je pa'ina,
ja̱pi si'aye co'ayere cuasaye huëoji:
yecohua'i payere ëa ñajë pë̱ti ëaye cuasaye,
te'e cuasa ma'ñe co'acohua'i a'ë cajë te ju̱'iñe,
coa cacohua'i a'ë cuasaye.
5 Ja̱je cuasacohua'ipi sa̱'ñe pë̱ti coca ti je̱oma'pë cajë pa'iyë,
nuñe cuasama'cohua'i ja̱'re,
nuñerepa coca asa ti̱'ama'cohua'ipi,
Maija'quëre sehuoni pa'iye ye'yaye curi neñe a'ë cuasacohua'i ja̱'re.
Ja̱je uihuayë.
6 Ja̱je pa'iquëta'are,
co'amaña pa'ina,
cui'ne peoquëna,
sihuaquë pa'iquëse'ere,
Maija'quëre sehuoni pa'iye ye'yaye,
jaiye curi neñeje pa'ye pa'iji.
7 Mai iye yeja dai maca co'amaña peocohua'i daë'ë.
Daisicohua'ipi cui'ne mai ju̱'i maca iye yejapi peocohua'i saija̱'cohua'i a'ë.
8 Ja̱je pa'ina,
maipi a̱o maña cui'ne mai ju'i ca̱ña pani sihuajë pañu'u.
9 Ja̱je pa'iquëta'are jaiye curiquë pañu'u,
cacohua'i cato jaiye do'i peoyere yëyena quëcoma'pë huati hua̱terë nesicona cacayë,
i̱ohua'ire co'a de'huaquë,
de'oye pa'ise'ere nejocaiyena,
ti ne huesë hue̱'ñana sayena.
10 Ja̱je pa'ina,
curiquë oiye cato si'aye co'aye cuasaye huëoye a'ë.
Ja̱je yecohua'i jaiye curiquë yë do'ire Maija'quëre pa'ire paji cuasase'e je̱oni ai yo'oyena ne huesëni ai yo'ojë pa'iyë.
De'oye Maija'quë Cocare Quëaye
11 Ja̱je pa'iquëta'are Maija'quë jo'yaë sëte si'aye co'ayere coequëpi nuñerepa yo'oquë pa'ijë̱'ë,
Maija'quëre necaiquëpi,
pa'ire paji cuasaquëpi,
pa̱ire oiquëpi,
yo'o jujama'quëpi,
cui'ne jerepa pa'i a'ë cuasa joyo peoquëpi.
12 Ti pani huesëja̱quë caquë Maija'quëpi më'ëre sahuani soipi.
Soisiquëpi Maija'quë pa'iji,
mësaru cuasayere de'oyerepa quëahuë,
jai pa̱i asajëna.
Ja̱je pa'ina,
Maija'quë pa'iji cuasayepi de'oye yo'ojë̱'ë,
ti pa'iyere pacohua'ipi.
13 Ja̱je pa'ina,
Maija'quë si'a co'amaña pa'iye i̱siquë cui'ne Jesucristo Poncio Pilatore de'oyerepa i̱ pa'iye quëcoquë i̱ñosiquë ña hue̱'ñana cua̱ñeñë,
më'ëre.
14 Yëhuo quëcoye peoja̱quë cani de'oye yë'ë më'ëre cua̱ñese'e sehuocai yo'ojë̱'ë.
Yeque po̱nani yo'oma'ë pa'ijë̱'ë,
mai Ëjaë Jesucristo dai macaja̱'a.
15 I̱ti yo'o maca ti̱'aëna,
Maija'quëpi si'aye iyere ne de'hua saoja̱'quë api,
te'i si'aye pa'irepa de'o Diusu tutu quë'ipi,
cua̱ñecohua'i mëñe Ëjaëre papi,
cui'ne ëjaohua'i mëñe Ëjaëpi.
16 Ja̱ë api,
te'i ti ju̱'ima'quë,
pa̱i tsioja̱ima'tore mia hue̱'ñare pa'iquë,
te'e pa̱i macaje̱ ñama'quë,
cui'ne ña ti̱'añeje ti peoquë.
¡I̱ tse̱ pa'ija̱quë si'anëpi,
Ëjaërepa pa'iye cui'ne i̱ jerepa tutu quë'i pa'iye!
Ja̱je pa'ija̱quë.
17 Cua̱ñejë'ë,
jaiye iye yeja co'amaña pacohua'ire,
jerepa pa'iohua'i a'ë,
cuasama'pë pa'ija̱jë,
cui'ne i̱ohua'i co'amañana quëcoma'pë pa'ija̱jë.
Ja̱ cato coa caraja̱iñe a'ë,
coa ai jerepa Maija'quëna quëcojë pa'ija̱jë,
mai pa ja̱'ñere caquë coa si'aye jaiye i̱siquëna.
18 Cua̱ñejë'ë,
cui'ne de'o co'amañare yo'ojë jaiye de'oye yo'oyere,
co'amañaje pa'ye paja̱'cohua'ire,
pajë peocohua'ire co̱caija̱jë,
i̱ohua'i co'amañapi.
19 Ja̱je yo'ojë,
jaiye co'amaña tsi'so ti̱mëja'cohua'i a'ë,
yequë mu'se ti pani huesëyere pa ja̱'ñere.
Timoteore Ca Tëjiye
20 Timoteo de'hua ñaquë pa'ijë̱'ë,
më'ëre de'oye yo'oja̱'quë api cuasa nëose'ere.
Asama'ë pa'ijë̱'ë,
iye yeja do'i peo coca,
ta̱'ñe asayere pa'ë caye,
coa cosoye a'ë.
21 Yecohua'i Maija'quëre pa'ire paji cuasacohua'ipi ja̱re ta̱'ñe asayere pa'ë cajë yo'ojë,
tsoe ne huesëhuë,
ti̱ñena.
Maija'quëpi mësarute necaina,
de'oye pa'ijë̱'ë.
Ja̱je pa'ija̱'quë.