Maija'quëre Cuasase'ere Je̱ocoja̱'cohua'i A'ë
4
Ti̱ñarepa quëaji,
Maija'quë joyopi ñeje:
Tëji mu'seña jai pa̱i Maija'quë pa'iji cuasayere je̱ocoja̱'cohua'i a'ë,
caquë.
Coa coso joñoa ye'yayere tuijë,
huatiohua'i ye'yayere ye'yejë.
2 Ja̱je yo'ojë,
quë̱na tarapë ucopi ëo huesose'eje̱ pa'iohua'ipi de'oye pa'iye ti cuasama'cohua'ipi cayere asaja̱'cohua'i a'ë,
nuñerepa pa'ima'cohua'ipi coso pa̱ipi ye'yayere.
3 Ja̱ohua'ipi huejaye co'aji,
caja̱'cohua'i a'ë,
cui'ne a̱iñere ë̱seja̱'cohua'i a'ë,
nuñerepa coca asacohua'ipi de'oji cajë Maija'quëre pëpajë se̱jë a̱i ja̱'ñere de'huase'ere.
4 Ja̱je pa'ina,
si'aye Maija'quë de'huase'e de'oye a'ë.
Ja̱je de'oyere maipi coeye co'aji.
Ja̱je pa'ina,
coa ai jerepa Maija'quëni de'oji cajë pëpajë i̱tire pajë cui'ne a̱iñe de'oji.
5 Maija'quë cocapi cui'ne mai i̱te se̱ñepi de'oyerepa necaiji.
Jesucristo De'o Jo'yaërepa Pa'iye
6 Më'ëpi iyere Maija'quë do'ijëre ye'yaquë,
cui'ne më'ëje Maija'quë pa'ire paji cuasayere a̱ni huajëquë pa'i cui'ne më'ëre ye'yase'ere yo'oquë pa'ini,
Jesucristo de'o jo'yaërepa pa'ija̱'quë a'ë,
më'ë.
7 Ja̱je pa'ina,
ti asacaima'ë pa'ijë̱'ë,
iye yeja aipë coca huesëjë caye.
Maija'quë co'amaña necaiyere pare yo'oquë ye'yejë̱'ë.
8 Më'ë tutu quë'i pa'ija̱'quë caquë ai cuasajë yo'oye a'ri maña co̱caiye a'ë.
Maija'quëre de'oyerepa pa'iye cato iye yeja pa'iye,
cui'ne jeteyo'je pa'i ja̱'ñeje co̱caiye a'ë.
9 Iye caye nuñere pa'ë.
Ja̱je pa'ina,
si'aohua'i asacaijë sehuoye pa'iji.
10 Ja̱je pa'ina,
i̱ co'amañare tuturepa yo'ojë nejë pa'iyë,
Maija'quë huajëquëre pana quëco pajë,
si'aohua'ire i̱te sehuocohua'ise'ere huasoquëna.
11 Ja̱je pa'ina,
iye cocare cua̱ñequë ye'yaye pa'iji,
më'ë.
12 De'hua ñaquë pa'ijë̱'ë,
më'ëre po̱sëni co'aye cajë cue'cuejë.
Ja̱je pa'ina,
më'ë coca cayepi,
më'ë yo'oyepi,
pa̱ire oiyepi,
Maija'quë pa'ire paji cuasayepi,
cui'ne nuñerepa de'oyese'e yo'oquë pa'iyepi i̱ñojë'ë,
sehuosicohua'ire.
I̱ohua'ije̱ më'ë pa'iyeje̱ pa'ija̱'cohua'ire.
13 Ja̱ yë'ta'a yë'ë ti̱'ama'në Maija'quë toya pëpëre si'a pa̱i sehuosicohua'i asajëna,
ñaquë quëajë̱'ë.
Ja̱ohua'ipi jerepa yëjë yo'o jujama'pë pa'ija̱'cohua'ire.
Ja̱je ye'yajë̱'ë.
14 Maija'quëpi quëaquëna,
sehuosicohua'i ëjaohua'i jë̱ñapi më'ëna patojë se̱cacaijëna,
Maija'quëpi ta̱'ñe yo'o ja̱'ñeje i̱sise'ere de'hua ñacai i̱tire yo'ojë̱'ë.
15 Ja̱je pa'ina,
iye de'o co'amañase'e yo'oquë pa'ijë̱'ë,
de'oyere yo'oquëpi se̱ña maca de'oquë pa'ina,
si'ahua'i ñaja'cohua'ire.
16 Më'ë pa'iye,
cui'ne më'ë yecohua'ire ye'yaye de'hua ñaquë,
si'aye o̱cue pa'i macarepa yo'oquë pa'ijë̱'ë.
Ja̱je më'ëpi iyere yo'oquë co'ye huaso cua̱ñoquëna,
cui'ne më'ë caye asacohua'ije̱ huaso cua̱ñoja'cohua'i a'ë.