Sehuosicohua'i Ëjaohua'i Pa'iye
3
Sehuosicohua'i ëjaë pa'iye yëquë cato de'o co'amaña yo'oyere pare yëji.
Nuñerepa cayë.
2 Ja̱je pa'ina,
sehuosicohua'i ëjaë cato de'oye pa'iquëre papi pa'iye pa'iji,
sa̱ñope yecohua'ije̱ caye peoquëpi,
te'ore nëjore paquëpi,
ta̱'ñe yo'oquëpi,
ta̱'ñe asaquëpi,
de'oyerepa pa'iquëpi,
cui'ne pa̱ipi i̱ huë'ena saijëna,
si'anë de'oye pëpaquëpi,
cui'ne de'oye ye'yaquëpi pa'iye pa'iji.
3 Co̱no cuepema'quëpi,
uihuaye yëma'quëpi,
pa̱ire de'oye yo'oquëpi,
jo'cua de'oye pa'iye yëquëpi,
cui'ne curire oima'quëpi pa'iye pa'iji.
4 De'oyerepa i̱ huë'e pa'icohua'ire cua̱ñequëpi pa'iye pa'iji.
Mamajëpi i̱ cua̱ñeñe de'oye sehuocohua'ipi,
cui'ne i̱te ëjaëre ñajëna,
pa'iquëpi.
5 Ja̱je i̱ huë'ere de'oye cua̱ñema'quë pani,
¿me cui'ne Maija'quëre sehuosicohua'ire de'oye ñacaija̱'quë a'ni,
huesëquë pani?
6 Ja̱je pa'ina,
co'aji,
sehuosicohua'i ëjaë pa'iye,
yure maca sehuosiquëpi.
Yure maca sehuosiquëpi coa jerepa pa'i a'ë cuasayese'e ti̱mëni yo'oquë huati ne huesë sitona cui'ne ne huesëye pa'i do'ire.
7 Cui'ne yequeje̱ sehuoma'cohua'ipi de'oquë api cajë ëjaëre ñaquëpi pa'iye pa'iji.
Ja̱je pa'ipi huati hua̱terë nesicona,
cue̱ni dema'ë cui'ne co'aye cama'pëna pa'ija̱'quë api.
Sehuosicohua'i Co̱caicohua'i Pa'iye
8 Ja̱je cui'ne sehuosicohua'ire necaicohua'ije̱ yecohua'ipi ëjaohua'ire ñajëna,
pa'icohua'ipi pa'iye pa'iji,
i̱ohua'i ca nëose'ere si'a yë'quë maca yo'ocohua'ipi,
cui'ne co̱no cuepema'cohua'ipi,
cui'ne cosojë curiquë nema'cohua'ipi pa'iye pa'iji.
9 Maija'quë i̱ñosi cocare mai sehuoyere de'oye de'huacohua'ipi,
pa'iye pa'iji.
Mai cuasa joyopi sa̱ñope caye ti peocohua'ipi.
10 Du'ru macarepa neñañe pa'iji,
ja̱ohua'ire.
Neñajëna,
caraye peojë,
yureta'a sehuosicohua'ire necaicohua'i pa'iye pa'iji.
11 Cui'ne nëjohua'ije̱ yecohua'ipi ëjaohua'ire ñajëna,
pa'icohua'ipi,
cui'ne co'a cocare asani yecohua'ina se quëama'cohua'ipi,
ta̱'ñe yo'ocohua'ipi,
cui'ne i̱ohua'i ca nëose'ere si'aye de'oye yo'ocohua'i pa'iye pa'iji.
12 Maija'quëre sehuocohua'ire necaiquë cato te'ore nëjore paquëpi,
i̱ mamajëre cui'ne i̱ huë'e pa'icohua'ire de'oye cua̱ñequëpi pa'iye pa'iji.
13 Sehuosicohua'ire necaicohua'ipi i̱ohua'i yo'oyere de'oye necohua'i pa'ito,
yecohua'ipi de'ocohua'i a'ë caja̱'cohua'i a'ë.
Cajëna,
ai jerepa sihuajë quëcojë Cristo Jesús cocare quëacaija̱'cohua'i a'ë.
Maija'quë I̱ñose'ere Mai Se̱jë Pa'iye
14 Esa sani ñañe yëyë,
më'ëre.
Ja̱je pa'iquëta'are toyayë,
iye.
15 Yë'ëpi tsoe nëiquë pa'ito,
më'ëpi Maija'quë pa̱i tsëcapëre de'oye yo'oye asasiquëpi de'oye yo'oja̱quë caquë toyahuë.
Maija'quë huajëquërepa tse̱cohua'ini cayë.
Nuñerepa cocare pajë nejocai ma'ñe cajë sa̱ñope yo'ocohua'ini.
16 Mai sehuojë se̱ñe jaiyere pa'ë,
pa̱i asa ti̱'a ma'ñe.
Cristopi pa̱ije pa'i daji'i,
Maija'quë joyopi quëapi,
i̱ pa'iyere.
Hui̱ñaohua'ipi i̱te ai cuasajë ñahuë.
Si'a yeja pa'icohua'ire quëahuë,
i̱ coca.
Quëajëna,
pa̱ipi i̱te sehuohuë.
Maija'quëpi i̱te i̱ de'o hue̱'ñare pana sapi.