Maija'quëre Se̱ñe Ye'yaye
2
Iyere du'ru macarepa yo'ojë pa'ijë̱'ë caquë cua̱ñeñë,
si'aohua'ire iye yeja pa'icohua'ire se̱cacaijë Maija'quë necaiyere de'oji cajë pëpayere,
necaire pajë̱'ë cajë se̱ñere,
ai teaye cajë se̱ñere.
2 Cui'ne pa̱ire cua̱ñecohua'ire cui'ne pa̱i ëjaohua'ireje̱ se̱cacaiye pa'iji,
mai sehuosicohua'ipi de'oye jo̱sa yo'oma'pëna,
sihuajë pa'iyere cajë.
3-4 Ja̱je pa'ina,
Maija'quë maire huasoquëpi si'aohua'i huasosicohua'i pa'ijë i̱ nuñerepa cocare asa ti̱'ajajë caquë yëquë sëte ai sihuaquë ñaji,
mai se̱cacaiye.
5 Te'i api,
Maija'quë.
Cui'ne te'i api,
Jesucristo,
pa̱i de'osiquë,
maire ti̱ohua'i pa'isicohua'ini Maija'quë ja̱'re co̱ni tsioye necaiquë.
Yequë peoji.
6 Jesucristopi si'aohua'ire huasoja̱'a do'ire ju̱ni sa̱icaji'i.
Ja̱je yo'oquë i̱ñopi,
i̱ oi necaiyere.
Ja̱ i̱ñose'ere si'anë i̱repa pa'iye asaye pa'iji.
7 Ja̱ coca necaiyere caquë yë'ëre coca quëacaiquëre cui'ne i̱ jëjo saoquëre nepi.
Judío pa̱i peocohua'ire Maija'quë pa'ire paji cuasayere cui'ne nuñerepa cocare ye'yaja̱quë caquë.
Quëare payë.
Cosoye pa̱ñë.
8 Yëyë,
yë'ë si'a hue̱'ña pa'icohua'ipi ë̱mëohua'i Maija'quëre se̱cohua'i pani,
de'o jë̱ñapi mëajë,
de'o joyore papi,
pë̱ti peocohua'ipi,
cui'ne yecohua'ire sa̱ñope case'e peocohua'ire papi se̱ñere.
9 Cui'ne nomiohua'ije̱ de'oye ca̱ña ju'ija̱jë,
nomiohua'irepa ju'iyepi,
co'aye ña cua̱ño ma'ñere,
ëja de'ocohua'i pani,
tëto saiperepa naña yoni,
curi nese'ere jua nëoni cui'ne jaiye yi'yo se̱'huoni pa̱nita'a jai do'i ca̱ñare su̱ñani de'ocore pa'ë cajë yo'oma'pë pa'ijë̱'ë.
10 Coa ai jerepa de'o co'amaña neñepi i̱ñoñe pa'iji,
Maija'quëna i̱ohua'i pa'iye i̱sisicohua'i pa'iye.
11 Nomiohua'i cato Maija'quë coca ye'ya hue̱'ña jo'cuarepa dahuëre ñu'ijë asaye pa'iji.
12 Cui'ne nomiohua'ire ë̱seyë,
jai pa̱i tsi'si sitona ye'yaye.
Cui'ne ë̱seyë,
ë̱mëohua'ire meñe quëcoyeje̱.
Coa ai jerepa de'oye jo'cua asaye pa'iji,
nomiohua'i cato.
13 Maija'quëpi ai tsoeje̱ Adánni du'ru de'huapi,
ja̱ jeteyo'je de'huapi,
Evare.
14 Cui'ne du'ruje̱ Adánpi coso cua̱ñoma'ë paji'i.
Nomiopi coso cua̱ñoni co'ayena to̱me huesëo.
15 Ja̱je pa'iquëta'are nomio huaso cua̱ñoja'coa,
i̱opi mamajëre de'oye ñacaio ai de'huacopi,
Maija'quë pa'iji cuasacopi pa̱ire oicopi,
cui'ne de'oyere pare yo'oco pa'icopi.