Nuñerepa Pa'iye
3
Yure cato Maija'quë do'ijë,
mai Ëjaëni sihuajë pa'ijë̱'ë,
yë'ë ja̱'në mësarute toyase'ere toya co̱toje̱,
jo̱sa te'ere toyaye nëiñe pa̱ji,
coa ai jerepa ja̱ cato mësarute de'oye o̱cue pa'i maca pa'iyere co̱caiye a'ë cuasaquë toyayë.
2 De'hua ñajë pa'ijë̱'ë,
jo'ya yaije̱ pa'iohua'ire,
co'aye yo'ocohua'ire,
ca̱'ni tëacohua'ire.
3 Ja̱je pa'ina,
mai joñoapi Maija'quëre se̱jë,
cui'ne Cristo Jesús acohua'i pa'iyere sihuacohua'ipi nuñerepa ca̱'ni tëase'eje̱ pa'iohua'irepa pa'iyë,
ca̱pë neñepi ti̱'añe a'ë cuasama'cohua'ipi.
4 Yecohua'i ca̱pë nese'ena quëcojë pa'iye ai jerepa yë'ë cato quëcoquë pa'iye paquëta'a.
Ja̱na quëcoma'ë pa'iyë,
ñajë'ë.
5 Yë'ë cato ocho mu'seña co̱asiquë pa'i maca cuiri ca̱'nihuë tëa cua̱ñohuë.
Ja̱je pa'ina,
judío pa̱ire pa'ë,
Benjamín,
tëcapë aquë a'ë,
hebreo pa̱i mamaquë a'ë,
judío pa̱i cua̱ñeñepi yë'ëre fariseore hue'yosiquë paë'ë.
6 Ja̱je pa'ipi Jesure sehuocohua'ire coyere ë̱sequë ai jo̱sa yo'oquëpi,
si'aye cua̱ñese'e caye de'oye sehuoquëpi,
yecohua'i mañaje ti sa̱ñope tayoquë api ca ti̱'añe peoquërepa paë'ë.
7 Ja̱je pa'iquëta'are Cristo do'ipi yure cato ti do'i peoye ñañë,
ja̱'në yë'ë i̱tire pa'ë cuasase'ere.
8 Ja̱je pa'ina,
yë'ë Ëjaë Jesucristo pa'iyere jerepa pa'yere asaquë co̱ni ñato,
jerepa do'i peoye pa'iji.
Ja̱je pa'ina,
Cristoni jerepa ja'ye tsioni pasi'i caquë si'aye coa co'aye ñañë,
nejose'eje̱ pa'ye.
9 Ja̱je pa'ina,
yureta'a cua̱ñese'e cayere yo'oquë nuñerepa pa'iquë pasi'i caquë yo'oma'ë pa'iyë.
Coa ai jerepa Cristore i̱re pare cuasacohua'ire Maija'quë nuñerepa pa'iye i̱siyere pasi'i caquë pa'iyë.
10 Yë'ë cato Cristo pa'iyere asa ti̱'añere yëyë,
i̱ ju̱'isiquëpi huëisi tutupi yë'ëni pa'ina,
asayere yëyë.
Cui'ne i̱ ai yo'ose'e ayere yo'oye yëyë.
I̱je pa'i pa'iyere yëyë,
pa̱ire oi ju̱'ise'ena ti̱'aquë.
11 Pa̱i ju̱'isicohua'i huëni pa'iyere ti̱'asi'i caquë yo'oyë.
Ti̱'añu'u, Cajë Yo'oye
12 De'oquërepa pa'iye si'aye ti̱'ama'quëpi ti̱'asi'i caquë yo'oyë ja̱re paja̱quë caquë Cristo Jesupi yë'ëre du'ru ti̱'ani paquëpi.
13 Yë'ë cato Maija'quë do'ijë,
ja̱ pa'iye ja̱ yë'ta'a ti̱'ama'quë a'ë,
ti̱'asi'i caquë yo'oquëta'a.
Ja̱je pa'ina,
ti̱'asi'i caquë jeteyo'je nëañere hua̱nëyei jeto i̱ti se̱ña hue̱'ña pa'iyere tutu yo'oyë.
14 Yo'oquë Cristo Jesús ja̱'re tsioni pa'i do'ire Diusu ma'tëmopi soi hue̱'ñana i̱ coa i̱siyere pa̱ja'quëpi yo'oyë.
15 Si'aohua'i Maija'quë pa'iji cuasayena ai de'osicohua'i cato ja̱je cuasaye pa'iji.
Mësarupi te'e cuasama'pë yequere a'ri maña ti̱ñe cuasaye pa'ito Maija'quëpi i̱ño sëtoja̱'quë.
16 Ja̱je pa'iquëta'are te'e cuasayepi te'e nëiñepi pañu'u mai ti̱'ase'e cato.
17 Maija'quë do'ijë,
yë'ë yo'o i̱ñose'ere pe'tejë̱'ë.
Cui'ne ñajë'ë,
yëquë mësarute ye'yase'eje̱ pa'iyere pa'icohua'ireje̱.
18 De'huarepa mësarute cayë:
Cristo cruz ju̱cacaise'ere sa̱ñope cacohua'i jai pa̱i pa'iyë caquë.
Yureje̱ ja̱ yë'ta'api co mea maña se oni to̱quë cayë:
19 Ja̱ohua'i cato coa nejo cua̱ñoja'cohua'ipi pa'iyë.
I̱ohua'i diusu cato ë̱tapë a'ë,
cui'ne i̱ohua'ire huajëya'ye nëti'ñe pa'yere yo'ojë jerepa pa'iohua'i a'ë cuasacohua'ipi,
iye yeja co'amañase'e cuasacohua'i a'ë.
20 Ja̱je pa'iquëta'are mai cato ma'tëmo pa̱i a'ë.
Ja̱je pa'ina,
utejë pa'iyë,
ma'tëmopi Cristo Jesús maire huasoquë daija̱'quë api cajë.
21 I̱pi mai ca̱pë ju̱'ico pa'isicore i̱ ca̱pë de'ocore paje̱ pa'iore necaija̱'quë api,
si'aye meñe quëco tutupi.