2 Evodiare cui'ne Síntiquere se̱ñë,

sa̱'ñe yo'ojë cayere je̱oni mai Ëjaë tse̱cohua'i sëte te'e de'oye cuasajë pa'ija̱jë caquë.

3 Ja̱je pa'ina,

më'ëre se̱ñë,

yë'ë yo'oyeje̱ pa'yere nequë pa'iquëna,

më'ëpi ja̱ohua'ire Maija'quë do'ijëre co̱caija̱quë caquë.

Huaso coca yë'ë quëaquëna,

ja̱ohua'i yë'ëre de'oyerepa co̱caisicohua'i a'ë,

Clemente ja̱'re co̱ni,

cui'ne yecohua'i yë'ëre co̱caicohua'i ja̱'re co̱ni.

Ja̱je pa'ina,

i̱ohua'i mami ti pa'i toya pëpëre pana toyase'epi pa'iji.

4 Si'anë mai Ëjaëni sihuajë̱'ë.

Ti̱jupë cayë,

sihuajë̱'ë,

i̱ni.

5 Ja̱je pa'ina,

si'aohua'i mësarute de'o pa̱ire pa'ë cajë ñajajë mësarupi quëcojë de'oye yo'ocohua'i pa'ijë̱'ë.

Mai Ëjaë ja'yere pa'iji.

6 Si'aye tëto saitoje̱ co'a ju̱'ijë oima'pë pa'ijë̱'ë.

Coa ai jerepa Maija'quëni se̱jë de'oji cajë pëpajë si'aye mësaru yëyere i̱ñojë'ë,

Maija'quëna,

i̱te se̱ maca.

7 Ja̱je yo'ojëna,

Maija'quëpi mësarute i̱ jo'cua de'oye pa'iyere i̱sija̱'quë api,

mai asa ti̱'añe peoyere pare.

I̱sina,

iye jo'cua de'oye pa'iyepi mësaru joñoa cui'ne mësaru cuasajë pa'iye de'oye ñacasipi,

Cristo Jesús do'ipi.

8 Tëjiyerepa cayë,

mësarute.

Maija'quë do'ijë,

nuñere pare cuasajë̱'ë,

yecohua'ipi Ëjaëre ñajëna pa'iyere,

i̱tire pare de'oyere pare sihuajë ñañere,

dëoye ca cua̱ñoñere.

Si'aye de'oyere cuasajë̱'ë,

yecohua'i sihuajë de'oye cacaiyere.

9 Ja̱je pa'ina,

yë'ë ye'yase'ere,

yë'ë mësarute quëase'ere,

yë'ë caquëna,

asase'ere cui'ne yë'ë yo'oquëna,

ñase'ere ja̱re yo'ojë̱'ë.

Ja̱je yo'ojëna,

Diusu jo'cua de'oye pa'iye i̱siquëpi mësaru ja̱'re co̱ni pasipi.

10 Ai sihuayë,

mai Ëjaëre,

mësaru yë'ëre cuasa huëo co̱se'ere caquë.

Cama'ë pa'iyë,

yë'ëre hua̱nëyesicohua'ipi,

cuasa huëohuë caquë.

Yë'ë cato cayë,

yo'o ti̱'añepi peoquëna,

co̱caiye yëjëta'a pa̱sicohua'ipi co̱cai huëohuë caquë.

11 Cama'ë pa'iyë,

co'amañapi peoquëna,

pa'iyë caquë.

Yë'ë cato yë'ë payere sihuaquë pa'iyere ye'yesiquë a'ë.

12 Co'amaña peoquëna,

pa'iyere jaiye co'amaña payere ti̱mësiquë pa'iyere,

a̱i ëa ju̱'iñere,

tëto saise'erepa payere,

cui'ne peoquëna pa'iyere,

coa si'aye tëto sai ye'yesiquë a'ë.

13 Ja̱je pa'ina,

coa si'aye quëcoquë ne ti̱'añe payë,

Cristo tutupi co̱caina.

14 Ja̱je pa'iquëta'are mësarupi de'oye yo'ojë yë'ëre co̱caë'ë,

ai yo'oquëna,

mësaru co'amañapi.

15 Macedoniapi du'ru macarepa huaso coca quëa huëoquë sai maca mësaru Filipos acohua'ipi yë'ëre co̱caë'ë,

mësaru i̱siyepi.

Yequë hue̱'ña sehuocohua'i cato co̱caiye pa̱huë.

Tsoe mësarupi asayë,

ja̱ yo'ose'e.

16 Ja̱ yë'ta'a yë'ë Tesalónicare pa'ina,

mësaru cayaye jëjo saohuë,

curiquë,

yë'ëre jopo caraye co̱cai ja̱'ñere.

17 Coa mësaru i̱sijëna,

payese'e co'ema'ë pa'iyë.

Coa ai jerepa mësaruje̱ i̱ti co̱caiye ayepi nese'ere,

quë̱ise'eje̱ pa'yere paja̱jë caquë co'ecaiyë.

18 Si'aye i̱mahuë,

mësaru i̱siye.

Caraye peoji,

yure ai payë.

Mësaru Epafrodito ja̱'re jëjo daose'ena co̱ni jerepa payë.

Mësaru jëjo daose'e,

cato huëo së̱ ma'ñare Maija'quëna coa i̱siyeje̱ pa'ye a'ë,

ai yo'ojë i̱te i̱siyeje̱ pa'ye a'ë,

Maija'quë sihuaquë ñañe a'ë.

19 Yë'ë Diusupi mësarute si'aye caraye i̱sija̱'quë api,

Cristo Jesús do'ipi.

I̱ jaiye de'oyere pare payeje̱ pa'ye i̱sisipi.

20 Je'nëna de'oquëre pani Diusu.

Maija'quërepa cañu'u,

i̱te.

Ja̱je pa'ija̱quë.

21 Si'aohua'ire pëpacaijë̱'ë,

Jesucristo do'ipi Maija'quë tse̱cohua'i de'osicohua'ire.

Cui'ne i̱ño yë'ë ja̱'re pa'icohua'ije̱ Maija'quë do'ijë mësarute pëpa saoyë.

22 Si'aohua'i i̱ño pa'icohua'i Maija'quëre pacacaicohua'ipi cui'ne romano pa̱i ëjaë huë'e acohua'ije̱ ja̱ohua'ipi airepa cajë pëpa saoyë,

mësarute.

23 Mai Ëjaë Jesucristopi si'aohua'ire mësarute de'oye ñacaija̱'quë.

Ja̱je pa'ija̱'quë.