5 Ja̱je pa'ina,

Cristo cuasase'eje̱ pa'ye cuasajë pa'ijë̱'ë,

mësaruje̱.

6 Ñajë'ë,

i̱ pa'ise'ere Diusuje̱ pa'ita'a,

Diusu yë'ëje̱ pasi'i caquë yo'oye pa̱pi.

7 Pa̱quë coa ai jerepa yecohua'i co'amaña necaicohua'i maña pa'iyena i̱ni pa̱ije pa'i maca de'opi si'aye Ëjaë pa'iyere se je̱oni.

8 Ja̱je pa̱ije pa'i maca de'oni,

jerepa pa'i a'ë cuasama'quëpi i̱ de'oye sehuocai do'ire cruzu huajëya'ye pa'iona,

ju̱ji'i.

9 Ja̱je pa'ina,

Maija'quëpi i̱te si'aye jerepa pa'ire nequë cui'ne si'a mami jerepa pa'i mamire pare i̱sipi,

i̱te.

10 Ja̱je pa'ina,

Jesús mamire asajë ma'tëmo pa'icohua'i cui'ne yeja pa'icohua'i cui'ne yeja huë'ehuë te̱'te pa'icohua'ije̱,

si'aohua'i do're ja'ruja̱'cohua'i a'ë.

11 Do're ja'runi si'a pa̱i maña Ëjaëre papi caja̱'cohua'i a'ë,

Jesucristore.

Ja̱re yo'ojë Maija'quëreje̱,

de'oyerepa yo'o u'ni cajë i̱ñoja'cohua'i a'ë.

12 De'oji,

Maija'quë do'ijë maña,

yë'ë mësaru ja̱'re pa'i yëhuoquëna,

si'anë mësaru Jesús sehuoyeje̱ paye de'oye sehuocaijë yo'ose'eje̱ pa'ye cui'ne yureje̱ ai yëjë yo'ojë̱'ë,

yë'ëpi so'ore pa'itoje̱.

Ja̱je pa'ina,

mësaru huaso cua̱ñosicohua'i pa'iyere i̱ñojë,

ca'rajë jerepa pa'iohua'i a'ë cuasama'pë nejë'ë.

13 Coa Maija'quë i̱ yëyeje̱ pa'ye mësaruna de'oye ne ëaye nëiñe neñepi yo'oyë.

14 Ja̱je pa'ina,

ai yo'oyë cajë yahue a'ri coca maña sa̱ñope cama'pë,

cui'ne sa̱'ñe pë̱ti coca cama'pë co'amaña nejë'ë.

15 Yecohua'ipi mësarute tayocohua'ire cui'ne co'aye yo'o do'i quë'iohua'ire ñañe pa̱ja'cohua'ire.

Ja̱je pa'ina,

mësarupi Maija'quë mamajërepa ti si'si te̱'ña peocohua'ipi iye yeja nea jopore papi ma'ñoco miacaiyeje̱ pa'ye miañë,

iye co'a pa̱i cui'ne ti nuñe yo'oye peocohua'i jopopi.

16 Pa'iye i̱si cocare,

i̱ohua'ire quëajë pa'i do'ipi.

Ja̱je pa'ijëna,

yë'ë Cristo dai mu'se sihuaja̱'quë a'ë,

mësaruni ñaquë.

Yë'ë mësarute quëaquë cu'i maca,

coa teaye yo'oroja̱iñe pa̱huë caquë.

17 Mësaru Maija'quëre pa'iji cuasajë coa i̱siyena yë'ëje̱ co̱si'i caquë yë'ë pa'iyepi ai yo'oquë ju̱'itoje̱ de'oji.

Ja̱je pa'ina,

yë'ë mësaru ja̱'re co̱ni sihuayë,

18 sihuaquëna,

mësaruje̱ yë'ë ja̱'re co̱ni sihuaye pa'iji.

19 Ëjaë Jesupi co̱caina,

de'hue esa jëjo saosi'i,

Timoteore.

Mësaru pa'iye asani yë'ëre co'ini quëaquëna,

sihuaja̱'quëre cuasayë.

20 Timoteoje̱ pa'ire peoyë,

yequëre.

Yë'ë cuasayeje̱ cuasaquë mësarute oi,

mësaru de'oye pa'iyere caquë yo'oquëre.

21 Ja̱je pa'ina,

yecohua'i cato i̱ohua'i de'oye pa'iyese'e cuasajë yo'ocohua'ipi pa'iyë,

mai Ëjaë Jesucristo yëyere yo'oma'cohua'ipi.

22 Ja̱je pa'iquëta'are tsoe mësarupi ñahuë,

Timoteo yë'ë Maija'quë coca quëa maca,

mamaquë pëca ja'quëre co̱caiyeje̱ pa'ye yo'oquëna.

23 Ja̱je pa'ina,

yë'ë yo'o ja̱'ñere du'ru se asani,

ja̱ maca esa jëjo saosi'i,

mësarute ñaja'quëre.

24 Mai Ëjaëpi co̱caina,

yë'ëje̱ mësarute de'hue esa sani ñaja'quë a'ë,

cuasayë.

25 Cui'ne yeque ai jerepa de'oji,

cuasahuë,

Maija'quë do'iquë Epafroditoni jëjo saoyepi.

Yë'ë ja̱'re co'amaña nequëni yë'ë ja̱'re te'e sa̱ñope yo'oquëni,

mësaru yë'ëre co̱caija̱'quëre cajë jëjo daosiquëni cui'naëni jëjo saoja̱'quë a'ë,

cuasayë.

26 Cui'ne i̱je mësarute si'aohua'ire ñañe yëji,

ai co'a ju̱'i pa'iji,

ju̱'iji asasicohua'ini ña huasosi'i caquë.

27 Ju̱'ire paquëna,

asahuë,

mësaru.

Tirepa ju̱ni huesëra'pi,

Maija'quëpi teaye ai yo'oquëna,

oi jujupi.

I̱se'ere cuasaquë yo'oye pa̱pi,

yë'ë cosiquë ai yo'oquëpi ai jerepa oima'quëni caquë,

ja̱je yo'opi.

28 Ja̱je pa'ina,

ja̱ëni esa jëjo saoyë,

mësarupi ti̱jupë huajëquëre ñajë sihuajëna,

yë'ëje̱ oima'ë pasi'i caquë.

29 Sihuajë i̱te pëpajë̱'ë,

mai Ëjaë do'ire.

Ja̱je cui'ne si'anë yecohua'ireje̱ sihuajë oijë de'oye yo'ojë̱'ë,

i̱je pa'iohua'ire.

30 Ja̱je pa'ina,

mësaru yë'ëre necani ti̱'añe peoyere necasi'i caquë yo'oquë ti ju̱tira'pi,

Cristo co'amañare necai do'ire.