Yecohua'i Jesús Jëjo Saocohua'ipi Pablore Sehuocaiyë
2
Catorce o̱metëca pa'i maca ti̱jupë Jerusalénna sai Bernabére cui'ne Titore sahuë.
2 Ja̱ro saë'ë,
Diusupi yeque yo'oyeque pa'iji caquë i̱ñouna.
Ja̱ro Jerusalénre sehuocohua'i ëjaohua'ise'e tsi'sicohua'ipi paë'ë.
Pa'ijëna,
yë'ë judío pa̱i peocohua'ire huaso coca quëayere quëahuë,
ja̱ohua'ipi asacatena,
yë'ë nese'epi cui'ne yë'ë ja̱ neñepi do'i quë'yerepa pa'ija̱quë caquë.
3 Cui'ne Tito judío peoquëpi yë'ë ja̱'re co̱ni pa'iquëreje̱ ca̱'ni tëaye pa'iji cajë cua̱ñeñeje peopi.
4 Ja̱je pa'iquëta'are Maija'quë do'ijë a'ë cacohua'ita'a coa cacohua'ije̱ paë'ë,
yëquë ja̱'re co̱ni yahue cacasicohua'ipi.
Ja̱ohua'ipi ca̱'ni tëaye pa'iji cahuë.
Icohua'i cato Cristo Jesure tsioni mai de'oye pa'iyere ñani ti̱jupë judío pa̱i yo'oyena cua̱ñese'e jo'yaohua'i pa'iyena po̱nañu'u cajë cacasicohua'i paë'ë.
5 Ja̱je pa'iquëta'are ti i̱ohua'i caye asacaiye pa̱huë,
mësarupi nuñerepa huaso cocare de'oyerepa pajë pa'ija̱jë cajë.
6 Huajëye yo'o ja̱'ñe quëaye pa̱huë,
yo'o ja̱'ñere quëacohua'ije̱.
Ëjaohua'ire pa'ë,
cuasama'ë pa'iyë,
ja̱ohua'ipi ëjaohua'i pa'itoje̱.
Maija'quë cato si'aohua'ire cui'ne pa'iohua'ire ñaquë api.
7 Huajëye yo'o ja̱'ñere quëa'ñe pa'iohua'ita'a judío pa̱i peocohua'ire quëaja̱'quëre Maija'quëpi yë'ëre cua̱ñe nëosiquë api,
Pedrore judío pa̱ire quëaja̱'quëre cua̱ñe nëose'eje̱ pa'ye,
cajë asahuë.
8 Ja̱je pa'ina,
Maija'quë Pedrore judío pa̱ire quëaja̱'quëre jëjo saoquëpi,
yë'ëreje̱ judío pa̱i peocohua'ire quëaja̱'quëre jëjo saopi.
9 Ja̱je pa'ina,
Jacobo,
Pedro cui'ne Juan sehuosicohua'i ëjaohua'ire pa'ë cajë ñajëna,
pa'icohua'ire papi ñani Maija'quëpi ja̱ yo'o ja̱'ñe mësarute i̱sipi,
cajë jë̱tëpi yë'ëre cui'ne Bernabére tse̱ani pëpahuë.
Ja̱je yo'ojë i̱ñohuë,
te'e cajeohua'i pa'iye.
Cui'ne ja̱ maca de'oji cahuë,
mësarupi sani judío peocohua'ire quëajëna,
yëquëpi judío pa̱ire quëaye.
10 Coa iyese'ere cua̱ñehuë,
co'amaña peocohua'ire cuasacaijë̱'ë cajë.
Yë'ë ñare paquë nesi'i caquë yo'oquë pa'iyere cua̱ñehuë.
Antioquía Daripëna Pablopi Pedro Tayoyere Yëhuose'e
11 Pedropi Antioquía daripëna daisi maca te'e tsiarepa ñaquë yëhuohuë,
i̱pi tayosiquë pa'iquëna.
12 Ja̱je yo'oquë du'ru macarepa judío pa̱i peocohua'i ja̱'re a̱ji'i,
Jacobo ja̱'re pa'isicohua'i ja̱ ti̱tama'në.
Ti̱tasi maca a̱isiquëpi ja̱ohua'i ja̱'re a̱iñe je̱oni cui'ne tsioyeje̱ pa̱quë yo'opi,
ca̱'ni tëaye pa'iji cacohua'i acohua'ini ca'raquë.
13 Ja̱ maca ja̱je yo'oquëna,
ñajë judío pa̱i sehuosicohua'ije̱ Pedro ca'raquë yo'oyena ñani cui'ne yo'ohuë.
Yo'ojëna,
Bernabéje̱ cui'na ca'raquë yo'opi,
ja̱ohua'i yo'oyere ña do'ire.
14 Ja̱je nuñerepa huaso coca ye'yayeje̱ pa'ye yo'oma'ëna,
yë'ëpi ñani si'ahua'i tsi'si sitona si'ahua'i asajëna,
Pedrore cahuë:
Më'ë judío pa̱ita'a judío peocohua'i ja̱'re paë'ë,
judío pa'iyepi pa'ima'ë.
Ja̱je pa'iquëta'are ¿me nesi'quë judío peocohua'ire judío pa̱i pa'iyeje̱ pa'ijë̱'ë cua̱ñequë'ni?
Si'aohua'i Maija'quëre Cuasayepi Huasosicohua'i De'oye
15 Mai cato tsi̱'nëna judío pa̱ire pa'ë.
Co'acohua'i judío pa̱i peocohua'i pa'iye pa̱ñë.
16 Ja̱je pa'iquëta'are,
mai nuñe pa'icohua'irepa pa'iye ti̱'añe peoji,
Moisés cua̱ñese'ere yo'ojë.
Coa Jesucristore i̱re pare cuasayepi ti̱'añe pa'iji,
nuñe pa'icohua'i pa'iye.
Ja̱je pa'ina,
yëquëje̱ Jesucristoni i̱re papi cajë asahuë.
Cristore i̱re pare cuasayeja̱'a nuñe pa'icohua'i pa'iye ti̱'ahuë.
Ja̱je pa'ina,
cua̱ñese'ere yo'ojë nuñe pa'icohua'i pa'iye ti̱'añe peoji.
17 Cristona po̱nëni,
i̱ nuñe pa'iyere pañu'u cajë yo'ojë judío peocohua'ije̱ pa'iohua'i,
co'acohua'i pa'iye asa ti̱'añë.
¿Ja̱je pa'ito Jesupi maire co'a de'osicohua'i pa'iye nei?
Pa̱pi,
ja̱je neñe.
18 Ja̱je pa'ina,
cua̱ñese'ere ne ti̱'ajë,
huaso cua̱ñoñe pa'iji caquë ye'yasiquëpi,
ja̱ ye'yayere je̱osiquëpi ti̱jupë cui'nare ye'yaquë pani cua̱ñese'ere sa̱ñope do'i quë'i de'oji.
19 Ja̱je pa'ina,
yë'ë,
cua̱ñese'e yo'oyere je̱osiquëpi ju̱'isiquëje̱ pa'i pa'iyë,
Maija'quëni pacacasi'i caquë.
20 Cristo ja̱'re que̱ cua̱ñosiquëpi pa'iyë.
Ja̱ yë'ta'a huajëquëpi pa'iyë,
Cristopi yë'ëni pa'i do'ipi.
Yë'ëpi pa'iye pa̱ñë.
Ja̱je pa'ina,
iye ca̱pë huajëquë pa'iye cato Maija'quë mamaquëni yë'ëre oi ju̱cacai i̱siquëni de'hue yë'ëre ñacaija̱'quë api cuasaquëpi pa'iyë.
21 Ja̱je pa'ina,
Maija'quë pa̱ire oi yo'ose'ere ti̱rona o̱añe pa̱ñë.
Cua̱ñese'e cayere sehuojë yo'oyepi nuñe pa'icohua'i ti̱'añe pa'ito,
Cristo ju̱'ise'epi do'i peoye patira'pi.