Yequë Pa̱i Cocapi Cayere Ñare Pajë Caye
14
Pa̱ire oicohua'i pa'ijë̱'ë.
Diusu de'o tuture pare jaiye pañu'u cajë ai yëcohua'i pa'ijë̱'ë,
cui'ne i̱ quë'ro ayere asani yecohua'ina se quëacaiyere jerepa yëcohua'i pa'ijë̱'ë.
2 Ja̱je pa'ina,
yequë pa̱i coca caquë cato pa̱ini caye pa̱ji.
Maija'quëni caji.
Ja̱je pa'ina,
pa̱i asaye ti pa̱ñë,
i̱ caye.
Joyopi cato me asaye'ni.
Ja̱je pa'ina,
ja̱ cato yeque a'ë pa̱i asa ti̱'a ma'ñe a'ë.
3 Ja̱je pa'iquëta'are Maija'quë quë'ro ayere asani quëaye cato pa̱ire quëaye a'ë Maija'quëre cuasayere ñese mëijajë cajë,
yo'o jujacohua'ire sihua ëaye ca huëoye a'ë,
cui'ne oicohua'ire yëhuo huasoye a'ë.
4 Ja̱je pa'iquëta'are Maija'quë i̱si coca caquë cato i̱ja'a jerepa Maija'quëre cuasaquë pa'iye neñe a'ë.
Cui'ne Maija'quë quë'ro ayere asani quëaquë cato sehuocohua'i Maija'quëre jerepa cuasajë pa'i ja̱'ñere co̱caiquë api.
5 Si'aohua'i mësaru yeque coca ca tuturepa Maija'quë i̱sise'e pacohua'i pa'ijë̱'ë,
cayë,
yë'ë cato.
Ja̱je caquëta'a jerepa yëyë,
mësarupi Maija'quë quë'ro ayere asani yecohua'ire se quëayere pajë̱'ë caquë.
Ja̱ quëayepi jerepa de'oji.
Yeque cocapi casi maca i̱ti case'ere asani sehuosicohua'ina se quëacaicohua'ipi pa'ijëna,
cajë̱'ë,
yequë cocapi,
sehuosicohua'ipi jerepa Maija'quëre cuasajë pa'ija̱'cohua'ire.
6 Maija'quë do'ijë,
yë'ëpi mësaru quë'rona do'i saisiquëpi yeque cocapi caquë pa'ito mësarute ti co̱caiye peoji,
yë'ë caye.
Ja̱je pa'iquëta'are Maija'quë i̱ñose'ere,
pa̱nita'a huajëye asase'ere quëayere,
pa̱nita'a Maija'quë quë'ro ayere asani quëayere pa̱nita'a Maija'quë cocare ye'yayere yo'onita'a mësarure co̱caiyë.
7 Cañu'u,
jetu juiyere pa̱nita'a pi̱'cohuë juiyere.
Ja̱ je̱'quë de'oye juima'pë pa'ito ja̱re juiyë cajë asaye peoji.
8 Cui'ne duruhuëpi ti̱ñarepa pi̱sima'o pa'ito huajo sacohua'i ne de'huaye pa̱ñë,
huajo ñese sa ja̱'ñe.
9 Cui'ne mësarute pa'iji.
Ja̱je pa'ina,
mësarupi yequë cocapi cacohua'i pa'ito yecohua'i asaye pa̱ñë.
¿Me ja̱re cayë cajë asaye'ni,
coa peo de'otona case'eje̱ pa'ye pa'ito?
10 Si'a yeja jaiye pa̱i coca pa'iji.
Si'aye asayese'e pa'iji,
i̱ti coca acohua'i cato.
11 Ja̱je pa'iquëta'are yë'ëpi yecohua'i cocare asama'ë pani ti̱ pa'iyë.
Cui'ne ja̱ coca caquëje̱ ti̱ pa'iji,
yë'ëre.
12 Maija'quë joyo tuture paye yëcohua'i sëte Maija'quëre ai cuasajë pa'iyere sehuosicohua'ire quëa tuture yëjë̱'ë,
ja̱ohuaipi mëojajë caquë.
13 Ja̱je pa'ina,
ti̱ñe coca caquë pani Maija'quëre se̱ñe pa'iji,
i̱ti casi cocare de'oye se quëaja̱'a tuture i̱sija̱quë caquë.
14 Cui'ne yë'ëpi Maija'quëre ti̱ cocapi se̱ni asama'ë pa'iyë,
yë'ë caquë se̱ñe,
nuñerepa joyo cato Maija'quëni se̱quëta'a.
15 ¿Ja̱je pa'ito me yo'oye pa'iquë'ni?
Joyopi se̱ñe pa'iji.
Joyopi se̱quëta'a yë'ëje̱ asaquë se̱ñe pa'iji.
Joyopi jë̱jë̱ñe pa'iji,
cui'ne yë'ëje̱ asaquë jë̱jëñe pa'iji.
16 Ja̱je pa'ina,
më'ë joyopi Maija'quëre sihuaquë de'oquëre pa'ni caquë sihuaquëna,
yequëpi më'ë ja̱'re co̱ni te'e sihuacaiye pa̱sipi,
ja̱ coca asama'ë pa'i do'ire.
17 Ja̱je pa'ina,
më'ë Maija'quëre pëpayepi de'oyerepa pa'itoje̱ i̱ti asaquëpi joyo sihuaye ñese mëiñe pa̱sipi.
18 Maija'quëre ai de'oji cayë,
mësaru caye jerepa ti̱ñe pa'i cocapi caquë pa'i.
19 Ja̱je pa'iquëta'are sehuosicohua'i tsi'si sitona caye ai jerepa de'ora'pi,
te'e jë̱të pa'i yë'orepa,
i̱ohua'i asa cocapi yecohua'ire ye'ya ja̱'ñere caquë.
Yë'ëpi pa̱i asama' cocapi jaiyerepa case'e cato yecohua'ire co̱caiye peoji.
20 Maija'quë do'ijë,
tsi̱ cuasayeje̱ pa'ye cuasama'pë pa'ijë̱'ë.
Tsi̱je pa'iohua'i pa'ijë̱'ë,
co'aye yo'oyere yo'oma'cohua'ipi.
Ja̱je pa'iohua'ita'a mësaru cuasayere aiohua'i pa'ijë̱'ë.
21 Maija'quë cua̱ñesi toya pëpë ayepi caji:
“Caja̱'quë a'ë,
iye pa̱ire yequë pa̱i cocapi ti̱ pa̱i yë'oja̱'a.
Ja̱je catoje̱ ti asani sehuoma'pë pa'ija̱'cohua'i a'ë,
yë'ë caye caji,
Ëjaë.”
22 Ja̱je pa'ito ti̱ñe coca caye cato sehuoma'cohua'ire i̱ñojë caye a'ë,
pa̱ni sehuosicohua'ire.
Ja̱je pa'iquëta'are Maija'quë quë'ro ayere asani quëaye cato sehuosicohua'ini caye a'ë,
pa̱ni sehuoma'cohua'ire.
23 Ja̱je pa'ina,
si'a sehuosicohua'i tsi'si sitopi,
si'aohua'i ti̱ cocapi cajë yo'oto huesëcohua'ipi,
pa̱nita'a sehuoma'cohua'ipi co̱ni cacasicohua'ipi cuasaja̱'cohua'i pa'ini cuepejë yo'ojë cayë,
cajë.
24 Ja̱je pa'iquëta'are si'aohua'i Maija'quë quë'ro ayere asani quëajë yo'otota'a sehuoma'cohua'ique pa̱nita'a huesëcohua'ique co̱ni cacasicohua'ije̱ i̱ohua'i co'aye yo'oyere asa quëquëjë cui'ne i̱ohua'i pa'iye asa ti̱'aja'cohua'i a'ë,
si'aohua'i cayere asajë.
25 Ja̱je yo'ojëna,
i̱ohua'i joyo co'aye pa'iyepi ti̱ñarepa ña cua̱ñoquëna,
Maija'quëre do're ja'rujë se̱ja'cohua'i a'ë cui'ne Maija'quë nuñerepa mësaru ja̱'re pa'iji caja̱'cohua'i a'ë.
De'oyerepa Tsi'sicohua'i Yo'oye
26 Ja̱je pa'ito Maija'quë do'ijë iye a'ë,
i̱ti yo'oye:
Tsi'sicohua'i pani yecohua'ipi Maija'quëre jë̱jëñe payë.
Yecohua'ipi ye'yaye payë.
Yecohua'ipi Maija'quë i̱ñose'ere quëaye payë.
Yecohua'ipi ti̱ cocapi caye payë.
Ja̱ case'ere yecohua'ipi quëaye payë.
Ja̱re yo'ojë̱'ë,
sehuocohua'i joñoa jerepa Maija'quëre oiye ne paja̱jë cajë.
27 Ti̱ cocapi cacohua'i pani caja̱jë cayaohua'i pa̱nita'a toaso̱cohua'i pa̱i ñape te'ohua'ise'e caja̱jë.
Cajëna,
yecohua'ipi i̱ti case'ere quëaja̱quë.
28 Ja̱je pa'iquëta'are ti̱ñe coca case'ere quëaquë peoto i̱tije̱ caye pa̱jë'ë,
sehuosicohua'i tsi'si sito.
Ja̱je pa̱jë coa pa̱i ñape Maija'quëse'ere joyose'e cuasajë se̱ñe pa'iji.
29 Cui'ne Maija'quë quë'ro ayere asani quëayeje̱ cayaohua'i pa̱nita'a toaso̱cohua'i caja̱jë cajëna,
yecohua'ipi nuñere pa'ni cajë i̱ti quëayere neñajajë.
30 Ja̱je pa'iquëta'are tsi'sito ñu'iquëre Maija'quëpi i̱ñoquëna,
ja̱ëpi casi'i caquë yo'oto ja̱ maca du'ru caquëpi je̱oñe pa'iji.
Je̱oquëna,
yequëpi caye pa'iji.
31 Ja̱je pa'ina,
si'aohua'i mësaru Maija'quë i̱ño coca asacohua'i te'ohua'ise'e caye pa'iji,
si'aohua'i ye'ye ja̱'ñere cajë.
Cui'ne yo'o jujahuë cuasacohua'ije̱ ta̱ise'eje̱ pa'iohua'ipi huëi ja̱'ñere cajë yo'ojë̱'ë.
32 Maija'quë ayere asani quëacohua'i cato i̱ohua'ipi i̱ohua'i joyo nëiñere de'oye ñañe pa'iji,
tayo ma'ñe cajë.
33 Maija'quë cato huesë ëaye nëiñere i̱sima'quë api.
Maija'quë cato de'oye ai cuasama'pë jo'cua pa'iyere i̱siquë api.
Si'a hue̱'ña Maija'quë pa̱i yo'ojë pa'iyere pa'iji.
34 Nomiohua'i caye peoji,
sehuosicohua'i tsi'si sito.
Caye ë̱sese'e a'ë.
Ja̱je pa'ina,
nomiohua'i sehuojë cama'pë jo'cua pa'ijë̱'ë,
Maija'quë judío pa̱ire cua̱ñese'eje̱ pa'ye.
35 Se̱ni asañu'u cuasacohua'i pani,
ë̱jëni se̱ñe pa'iji,
huë'ena sani.
Ja̱je pa'ina,
nomiopi Maija'quë coca asa hue̱'ñapi caco pa'ito de'oye ña cua̱ñoñe pa̱ji.
36 De'hua cuasajë̱'ë.
Iye Maija'quë coca mësarupi du'ru ca huëoma'pë paë'ë.
Mësaruse'e iye coca asani sehuoma'pë paë'ë,
yecohua'ije̱ mësaru jerepa tsoe asahuë,
cui'ne sehuohuë,
iye cocare.
37 Maija'quë i̱ñosi coca quëaquë a'ë cuasaquëpi,
cui'ne Maija'quë joyopi caquëna,
cayë cuasaquë cato iye yë'ë mësarute toyase'e mai Ëjaë cua̱ñese'ere toyapi caquë ti̱ñarepa asaye pa'iji.
38 Ja̱je pa'iquëta'are yë'ë toyase'ere Maija'quë cua̱ñese'e a'ë caquë ñama'quëpi quëaquë pa'ito i̱ cayeje̱ asama'pë pa'ijë̱'ë.