Oiyere Quëaye
13
Yë'ëpi si'a pa̱i coca caquëpi cui'ne hui̱ñaohua'i coca caquëpi pa̱ire oima'quë pani,
coa huatihuë të'cajëna,
pi̱siyeje̱ pa'i a'ë.
Pa̱nita'a coa quë̱na de'huana të'cajëna,
pi̱siyeje̱ pa'i a'ë.
2 Cui'ne si'aye Maija'quë quë'ro aye asayere quëaquëpi cui'ne si'aye pa̱i ña ma'ñe ñaquëpi cui'ne si'aye ta̱'ñe asaquëpi cui'ne si'aye Maija'quëpi nequëre pare cuasaquëpi ai cu̱tiohua'ire ti̱rona cua̱ñe saoquëpi ja̱ yë'ta'a pa̱ire oima'quë pani coa caquë a'ë.
3 Cui'ne si'aye yë'ë paye yecohua'ina huahuecai yo'oquëpi cui'ne yë'ë ca̱përe paje̱ yecohua'i do'ire ëo cua̱ñoja'core i̱siquë yo'oquëpi ja̱ yë'ta'a pa̱ire oima'quë pa'ito si'aye iye yo'oye co̱caiye pa̱ji.
4 Pa̱ire oiquë cato;
sa̱ñope yo'oyere quëcoquë api,
pa̱ire oi co̱caiquë api,
yecohua'i payere ëa ñaquë pë̱ima'quë api,
yë'ë jerepa pa'i a'ë cama'quë api,
5 ai jerepa pa'i a'ë cuasaquë yo'oma'quë api,
i̱se'e yo'oye pa'iji cuasaquë yecohua'i yëyere meñe ña'no to̱ma'quë api,
pë̱titema'quë api,
co'aye i̱te yo'ose'ere cuasaquë oima'quë api,
6 yecohua'i tayojë co'aye yo'oyere ñaquë sihuama'quë api,
coa ai jerepa nuñere pare ñaquë sihuaquë api,
7 si'aye ai yo'oye pa'itoje̱ quëcoquë api,
de'hue neñe pa'iji cuasaquë,
de'oyere pa'ija̱'quë caquë utequë api,
cui'ne dahuëre cuasare paquë yo'oquë api.
8 Pa̱ire oiye caraja̱i ma'ñe a'ë.
Maija'quë quë'ro ayere asani quëayeta'a yequë mu'se caraja̱i ja̱'ñe a'ë.
Yequë coca caye cui'ne ta̱'ñe mai asaye caraja̱i ja̱'ñe a'ë.
9 Ja̱je pa'ina,
mai asaye cui'ne Maija'quë quë'ro ayere asani quëaye jopo carase'e a'ë.
10 Ja̱je pa'ina,
yequë mu'se maipi peo hue̱'ñarepa asa ti̱'a maca,
si'aye mai te̱'te maca asajë quëase'e caraja̱sipi.
11 Yë'ë tsihua'ë pa'inë ja̱re tsihua'ë cayepi cui'ne ja̱re tsihua'ë cuasayepi cui'ne tsihua'ë asaquë yo'oyepi yo'ohuë.
Yo'osiquëpi yureta'a ai ë̱më de'oni si'aye tsihua'ë pa'inë yo'ose'e je̱ohuë.
12 Ja̱je pa'ye yure,
mai coa huesë ëaye Maija'quë coca asayë.
Ai tsi̱ña de'hua poresicore ñañeje pa'ye asayë,
mai.
Ja̱je pa'isicota'are ti̱ñarepa ñaja'cohua'i a'ë.
Yë'ë yure cato coa te̱'te maca ñañë.
Ja̱je pa'iquëta'are yequë mu'se Diusute ñaja'quë a'ë,
yë'ëre i̱ ñañeje pa'yerepa.
13 Maija'quëre necaiquëre pare asaye,
pa̱ire oiye,
cui'ne yequë mu'se pa'i ja̱'ñere uteye iye cato ti pani huesë ja̱'ñe a'ë.
Si'aye jerepa pa'ye cato pa̱ire oiye a'ë.