Maija'quë Joyopi Pa̱i Ñapere Tutu I̱siye
12
Maija'quë do'ijë mësarute quëasi'i,
Maija'quë joyo pa̱i ñapere tutu i̱siyere.
2 Mësarupi asayë,
ja̱ yë'ta'a sehuoma'cohua'i pa'inë pa̱i de'huasi diusuna saijë se̱jë pa'ise'e ti asama'cohua'ina.
3 Ja̱je pa'ina,
yure mësarute quëaye yëyë,
iyere.
Jesús co'aquë api caquë cato Maija'quë joyo tutupi caye pa̱ji,
cui'ne Jesure Ëjaëpi caquë cato de'o joyopi caye pa'iji.
4 Ja̱re te'e Maija'quë joyopi i̱siquëta'a pa̱i ñapere ti̱ñe pa'ye i̱siye pa'iji,
tutu.
5 Ja̱je pa'ina,
pa̱i ñape Ëjaë Jesure necaiye pa'iji,
ti̱ñe pa'ye.
Ja̱je pa'iquëta'are te'i api,
Ëjaë cato.
6 Pa̱i ñape ti̱ñe pa'i co'amañare yo'oye pa'iji.
Ja̱je pa'iquëta'are Maija'quë cato ja̱re i̱pi pa̱i ñapere yo'o huëoquëna,
yo'oyë.
7 Maija'quëpi i̱ joyo ayere pa̱i ñapere i̱siji,
ti̱ñe pa'i tutu si'aohua'i sa̱'ñe co̱caijë de'oye pa'i ja̱'ñere caquë.
8 Yecohua'ini Maija'quë joyopi i̱siji,
Maija'quë yëyere ta̱'ñe asa ti̱'añere.
Yecohua'ini ja̱re ja̱ joyopi i̱siji,
si'ayerepa asacohua'i pa'ijë yecohua'ire ye'ya ja̱'ñere.
9 Yecohua'ini ja̱re ja̱ joyopi i̱siji,
nuñerepa ne ti̱'añe pa'iji asayere.
Cui'ne yecohua'ini ju̱'icohua'ire jujuyere i̱siji.
10 Yecohua'ipi pa̱i yo'o ti̱'a ma'ñere yo'oyere i̱si cua̱ñoñë.
Yecohua'ipi Maija'quë quë'ro ayere asase'ere quëa tuture i̱si cua̱ñoñë.
Yecohua'ipi i̱si cua̱ñoñë,
coso joñoa caye ta̱'ñe asaye cui'ne nuñerepa de'o joyo caye asayere.
Yecohua'ini i̱siji,
yeque ti̱ñe cocapi ca ja̱'ñere.
Cui'ne yecohua'ini ja̱ coca case'ere asani quëayere i̱siji.
11 Ja̱je pa'iquëta'are si'aye ja̱ Maija'quë joyopi yo'oji,
i̱ yëyeje̱ pa'ye pa̱i ñapere.
Sehuosicohua'i Te'e Ca̱pë Pa'iye
12 Pa̱i ca̱pë jaiye te̱'ñapi tsi'sisicopi pa'iji.
Ja̱je pa'icota'a te'e ca̱pë a'ë.
Ja̱je Cristoje̱ pa'iji.
13 Ja̱je pa'ina,
mai si'aohua'i judío pa̱i,
griego pa̱i,
jo'yaohua'i pa̱nita'a jo'yaohua'i peocohua'i si'aohua'i te'e ca̱pë acohua'i pa'iyë,
te'e joyopi dosi do'ire.
Ja̱je pa'ina,
si'aohua'ire maire joyo ayere o̱cuapi.
14 ¿Me pa̱i ca̱pë pa'ico'ni,
te̱'te maca pani?
Ja̱je pa'ina,
jaiye te̱'ñapi pa'icoa.
15 Quë̱opi caco pani ca'ñe pa'io:
“Jë̱tëje̱ ñani yë'ë cato yecoa'ë.”
Ja̱je canije ca̱përe hua sani ti̱o po̱nëni pa'iye peoji.
16 Pa̱nita'a ca̱joropi caco pani ca'ñe pa'io:
“Ñacoaje̱ ñani yë'ë cato yecoa'ë.”
Ja̱je canije ca̱përe hua sani ti̱o pa'iye peoji.
17 ¿Si'a ca̱pë ñacoase'e pa'ito me asara'reni?
pa̱nita'a ¿si'a ca̱pë ca̱jorose'e pa'ito me yë'era're'ni?
18 Ja̱je pa'ina,
Diusupi ñaquë si'a te̱'ñare tsioni te'ore nepi,
i̱ yëyeje̱ ja̱rote ja̱opi pa'ija̱co caquë.
19 Ja̱je pa'ina,
si'a ca̱pë te'ese'e pa'ito,
¿jerore patira'oni yeque yo'oye?
20 Jaiye te̱'ñapi pa'iquëta'are yure cato te'e ca̱pë pa'iji.
21 Ñacoapi jë̱tëre ca ti̱'añe peoji:
“Më'ëre ne cua̱ñoñe pa̱ñë.”
Cui'ne si̱opëpi quë̱ore,
“më'ëre ne cua̱ñoma'o pa'iyë,”
ca ti̱'añe peoji.
22 Coa ai jerepa tutu peoye co̱cai ma'ñeje pa'ye nëiñepi ai jerepa maire co̱caiye a'ë.
¿Ja̱ peoto me pa'iye'ni?
23 Ja̱je pa'ina,
i̱ti mai ai a'ri maña do'i quë'ye a'ë cayere jerepa ñare pajë su̱'ñecaiyë,
cui'ne ti̱ñarepa i̱ñoñe peoyere ai de'oye ñacaiyë.
24 Ti̱ña ñañe cato airepa de'oye ñacaiye pa̱ñë.
Ja̱je pa'ina,
Maija'quëpi pa̱i ca̱pë de'huapi,
do'i peoye ña cua̱ñoñepi jerepa do'i quë'ye pa'ija̱quë caquë.
25 Ja̱je pa'ina,
pa̱i ca̱pë cato si'a te̱'ñapi tsiosicopi te'ere cuasajëje̱ pa'ye sa̱'ñe co̱caio pa'ico.
26 Ja̱je pa'ina,
te'e te̱'te ca̱pë a'si ju̱'ito si'a ca̱pë ai yo'oye pa'iji,
cui'ne yequeje̱ te'e te̱'te de'oye ne cua̱ñoto si'a ca̱pë sihuaye pa'iji.
27 De'oji,
ja̱je pa'iye sëte.
Mësaru sehuosicohua'i cato mësaru pa̱i ñape Cristo ca̱pë acohua'i a'ë.
28 Ja̱je pa'ina,
Maija'quëpi sehuosicohua'ire ñacaija̱'cohua'i ñeje pa'ija̱jë cuasapi.
Ja̱je pa'ina,
nepi,
du'ru macare pare i̱ doce jëjo saocohua'ini.
Ja̱ jeteyo'je Maija'quë cayere asani quëacohua'ire nepi.
Cui'ne ja̱ jeteyo'je Maija'quë coca ye'yacohua'ire nepi.
Ja̱ maca ai jeteyo'jerepa pa̱i yo'o ti̱'a ma'ñe yo'ocohua'ire nepi.
Cui'ne ju̱'icohua'ire ne co'yacohua'ire nepi.
Cui'ne pa̱ire de'oye cuasayepi cua̱ñecohua'ire nepi.
Cui'ne yequë cocapi cacohua'ire nepi.
29 ¿Si'aohua'irepa i̱ doce jëjo saoyeje̱ pa'iohua'ise'e pa'iye?
Pa̱ñë.
¿Si'aohua'irepa Maija'quë quë'ro aye asase'e quëacohua'ise'e pa'iye?
Pa̱ñë.
¿Si'aohua'i Maija'quë coca ye'yacohua'ire pase'e pa'iye?
Pa̱ñë.
Pa̱nita'a ¿Si'aohua'i pa̱i yo'o ti̱'a ma'ñe yo'ocohua'ise'e pa'iye?
Pa̱ñë.
30 ¿Si'aohua'i ju̱'icohua'ire ne co'ya tutu pacohua'ire pase'e pa'iye?
Pa̱ñë.
¿Si'aohua'i ti̱ñe coca cacohua'ire pase'e pa'iye?
Pa̱ñë.
¿Si'aohua'i ti̱ñe coca asani se quëacaicohua'ise'e pa'iye?
Pa̱ñë.
31 Ja̱je pa'ina,
mësaru cato ai de'o tuture pañu'u cuasajë yëjë̱'ë.
Ja̱je pa'ina,
yë'ëpi mësarute ai jerepa tutu de'oye quëasi'i.