11
Ja̱je cui'ne mësaruje̱ yë'ë yo'o i̱ñose'eje̱ pa'ye cui'ne yo'ojë̱'ë.
Cristo yë'ëre yo'o i̱ñose'eje̱ pa'ye yo'oyë,
yë'ëje̱.
Nomiohua'i Maija'quëre Se̱ Hue̱'ña Pa'iye
2 Maija'quë do'ijë,
sihuayë,
mësaru yë'ëre si'anë cuasajë yë'ë ye'yase'eje̱ pa'ye pa'ijëna.
3 Ja̱je pa'iquëta'are iyeje̱ asaja̱jë caquë quëayë.
Cristo cato si'a ë̱mëohua'i mëñe ëjaëpi.
Ë̲jë cato nëjo mëñe ëjaëpi,
cui'ne Diusu cato Cristo mëñe ëjaëpi.
4 Ja̱je pa'ina,
ë̱mëpi i̱ si̱opë ca̱ñapi pu̱ani Maija'quëre se̱quë pa'ito co'aye ña cua̱ñoji.
Ca̱ña pu̱asi do'ipi Cristore ëjaëre pare cuasama'cohua'ipi ja̱je yo'oye pa'iji.
5 Ja̱je cui'ne nomiopi i̱o si̱opë ca̱ñapi pu̱ama'o Maija'quëre se̱co pa'ito pa̱nita'a Maija'quë quë'ro ayere asase'ere quëaco pa'ito,
co'aji ë̱jëni huajëya'ye ña cua̱ñoji,
naña peo hue̱'ñarepa tëase'eje̱ pa'iopi quëa do'ipi.
Ë̲jëpi jerepa pa'i caye i̱ñoñe a'ë,
si̱opëna ca̱ñapi pu̱añe cato.
6 Nomiopi si̱opë pu̱ama'o pani nañare peo hue̱'ñarepa hueo je̱ojaco,
te'ere papi.
Ja̱je pa'ina,
nañare hueo je̱oni huajëya'ye pa'ima'copi cuasani pu̱ajaco,
i̱o si̱opë.
7 Ë̲më cato i̱ si̱opë pu̱añe peoji,
Maija'quëje̱ pa'ire de'huasiquë me pu̱aquë'ni.
Ja̱je pa'ina,
ë̱më cato Maija'quë de'oquërepa pa'iyere i̱ñocai pa'iji.
Ja̱je pa'iquëta'are nomio cato ë̱më de'oquë pa'iyere i̱ñocaio pa'ico.
8 Maija'quë ë̱mëre de'hua maca nomio ayepi neñe pa̱pi.
Nomiota'are ë̱më ayepi de'huapi.
9 Ë̲mëni caquë Maija'quë nomiore nepi.
Nomioni caquë ë̱mëre neñe pa̱pi.
10 Ja̱ do'ire hui̱ñaohua'ire i̱ñoñere caco nomio i̱o si̱opëna ca̱pi pë'pësico pa'iye pa'iji.
11 Ja̱je pa'iquëta'a mai sehuosicohua'i pa'iye cato nomio peoto ë̱më pa'iye peoji.
Ja̱je nomiopi peotoje̱ ë̱mëje pa'iye peoji.
12 Ë̲më ca̱përe i̱ni nomiore de'huapi,
Maija'quë.
Ja̱ yo'ose'e nuñere pa'ë.
Ja̱je pa'iquëta'are yure cato nomiopi ë̱mëre ai de'huaye pa'iji.
Si'aye iye yo'oye Maija'quëpi neñe a'ë.
13 De'oquë nomiopi Maija'quëre se̱o ca̱pi si̱opë pu̱ama'o pa'ito mësarupi ca de'huajë̱'ë,
ñani.
14 Ja̱je pa'ina,
iye yeja ja̱re i̱ose'e maire ë̱mëohua'ire huajëya'ye nëiñe neji,
ë̱mëohua'ipi tsoa naña hue'eto.
15 Nomio cato tsoa naña hue'eni sihuaco i̱o si̱opë pë'pë ja̱'ñere i̱sise'e sëte.
16 Iye ayere yecohua'ipi ja̱je yo'o ma'ñe a'ë cajë sa̱ñope cacohua'i pani iye a'ë quëajë̱'ë,
yëquë asayere ye'yaye.
Yëquë cuasayeje̱ pa'ye yequë hue̱'ña sehuosicohua'ije̱ cuasayë,
iye yo'oyese'e cato.
Ëjaë A̲o A̲i Pa'ise'ere Cuasajë Tayo Yo'ose'e
17 Ja̱je pa'iquëta'are mësaru tsi'sijë yo'oyepi mësarute co̱cati'ñe pa'yepi mësarute co'a de'huaye pa'ina,
asaquë mësaru yo'oye sihuama'ë iye toya ja'hua toyayë.
18 Maija'quë coca cañu'u cajë tsi'si maca tsëcapë̱a huahuejë yo'oyë cajë yë'ëre quëayë.
Quëajëna,
ja̱je pa'iji cayë cuasaye nëiji,
yë'ëpi.
19 Mësarute tsëcapë̱ase'e huahueni pati'ñe nëiñe jëa ti̱'añe peoji.
Ja̱re ja̱je huahueye pa'iji.
Ja̱je yo'ojëna,
nuñerepa sehuosicohua'i pa'iye ñañe pa'iji.
20 Ja̱je pa'iquëta'are mësaru tsëcapë̱a huahueni tsi'sini a̱o a̱iñe nuñerepa mai Ëjaë tse̱ peoji,
21 mësaru a̱o a̱i maca ti̱'aëna,
pa̱i ñape a̱o du'ruja̱'a a̱i do'ire,
yecohua'ipi a̱o ëa ju̱'ijëna,
yo'o do'ire cui'ne yecohua'ipi ñese co̱no u̱cu cuepere pajë yo'o do'ire.
22 ¿Huë'e pacohua'i sëte me yo'ojë huë'ena u̱cujë a̱i ma'ñe'ni?
Mësaruse'e a̱ijëna,
nuñerepa peocohua'i mañapi huajëya'ye nëina,
ñañë.
Ja̱ yo'oyepi Maija'quë tse̱cohua'ini co'aye yo'oyë,
mësaru.
¿Ja̱je yo'oto yë'ë me mësaru yo'oye de'oyerepa yo'oyë cacaiye'ni?
¡Mësaru yo'oye sihuacaiye pa̱ñë!
Ëjaë A̲o A̲iñe
23 Yë'ë mësarute ye'yase'e Ëjaëna ye'yese'e paji'i.
Ja̱re ye'yahuë,
mësarute.
I̱te cajei yo'oyeje̱ pa'ye yo'oquë cosoquë tse̱a je̱o cua̱ñoja'a ñami na'iquëna,
Ëjaë Jesupi jujuma' a̱o i̱ni,
24 Maija'quëre pëpani a̱ore yeteni huahuequë capi:
“A̲ijë'ë.
Iye a̱iñe cato yë'ë ca̱pë a'ë.
Mësaru de'oye pa'i ja̱'ñere caquë i̱siye a'ë.
Yë'ë yo'ose'eje̱ pa'ye yo'ojë̱'ë,
yë'ëni cuasajë.”
25 Cui'ne a̱o a̱ni tëjisi jeteyo'je u̱cu duruhuë i̱ jë̱ñapi i̱ni capi:
“Iye u̱cu duruhuë pa'iye cato yë'ë tsie a'ë.
Iye do'ipi Maija'quë mami huajë ca nëose'e pa'iji.
Ja̱je pa'i do'ire u̱cuye ñape yë'ëni cuasajë yo'ojë pa'ija̱'cohua'i pa'ijë̱'ë.”
26 Ja̱je yo'oni mësaru i̱ ju̱'ise'ere quëa i̱ñojë yo'oyë,
a̱o a̱iñe ñape cui'ne iye u̱cu duruhuë u̱cuye ñape,
i̱ dai macaja̱'a.
Ja̱je yo'ojë pa'ijë̱'ë.
Ñeje Yo'oye Pa'iji, Ëjaë A̲i Pa'ise'ere Cuasajë Yo'oye
27 Ëjaëre pa'ë cuasama'pë mai Ëjaë a̱i pa'ise'ere coa huëojë a̱ini,
cui'ne coa huëojë u̱cuni sa̱ñope mai Ëjaë ca̱përe cui'ne i̱ tsiere yo'oyë,
co'ayere.
28 Ja̱ do'ire ja̱ yë'ta'a iye a̱o a̱ima'në cui'ne u̱cuma'në pa̱i ñape joñoa co'ye ñañe pa'iji.
29 Ja̱je pa'ina,
Ëjaë ca̱pë ayere cuasama'ë coa huëoquë iyere a̱ini cui'ne iyere u̱cuni ja̱ co'ayere do'iquëpi yo'oji.
30 Ja̱je pa'ina,
jai pa̱i mësaru acohua'i ju̱'icohua'i cui'ne tutu peocohua'i pa'iyë.
Ja̱je yo'ojë yecohua'i ju̱juhuë.
31 Ja̱je pa'iquëta'are mai joñoa co'aye pa'iyere nejojë ñare pajë a̱ito Ëjaë maire sa̱ñope yo'o do'i quë'iohua'ire ñañe pa̱ji.
32 Ja̱je pa'iquëta'are Ëjaëpi maire tayojëna,
sa̱ñope caquë si'seji,
maipi iye yeja acohua'i ja̱'re co̱ni toa yejana saiye pa̱jajë caquë.
33 Ja̱je pa'iye sëte Maija'quë do'ijë maña Jesús ju̱'ise'ere cuasajë tsi'sisicohua'i pani yecohua'ire uteni si'aohua'i tsi'sirena,
te'e a̱ijë'ë.
34 A̲o ëa ju̱'icohua'ipi cui'na maca tsioni yo'osi do'ire Maija'quë si'sema'ë pa'ija̱quë cani yecohua'ini a̱o ëato huë'ere pana a̱iñe pa'iji.
Yequeta'a yë'ëpi sani ne de'huasi'i,
mësarute do'i ña maca.