I̱tire Pa'ë Cuasayere Sa̱ñope Saquë Yëhuoye
10
Maija'quë do'ijë mësarute quëasi'i,
mai aipë yo'ojë pa'ise'e,
si'aohua'i mai aipë Maija'quë sirio huë'ehuëre pa'a̱huë'ë.
Cui'ne si'aohua'i jai Maja'iñaje je̱'a'huë'ë.
2 Iye yo'o ja̱'ñepi si'aohua'i Moisésre tuicohua'i pa'iye i̱ñoa'ji'i,
oco do cua̱ñoñeje sirio huë'ehuëre cui'ne jai Maja'iñaje tëto saijë pa'i ja̱'ñepi.
3 Cui'ne si'aohua'i Maija'quë i̱sisi a̱o a̱'ahuë'ë.
4 Cui'ne si'aohua'i Maija'quë i̱sisi oco o̱cua'a̱huë'ë,
joyo ayere u̱cuhuë.
I̱ohua'ire sai saquë Cristo quë̱naoje pa'irepa joyo ocore o̱cua'a̱huë'ë.
5 Ja̱je pa'iquëta'are jai pa̱i ñasicohua'ita'a,
cue̱ne yejana ju̱jua'huë'ë,
Maija'quë yëyeje̱ yo'oma'pë pa'isicohua'ire.
6 Iye yo'ose'e cato maire quëaye a'ë,
ja̱ohua'i yo'ose'eje̱ pa'ye yo'oma'pë pa'ijë̱'ë caquë.
Ja̱ohua'i cato co'ayere yë do'ire ju̱jua'huë'ë.
7 Ja̱je pa'ina,
mësaru cato pa̱i de'huasi diusuohua'ini se̱ñu'u cajë yo'oma'pë pa'ijë̱'ë,
ja̱ohua'i yo'ose'eje̱ pa'ye.
Maija'quë coca toyase'e caji:
“A̲o a̱ijë co̱no u̱cujë,
ja̱ jeteyo'je jai pa̱i tsi'sijë pairajë sihuajë yo'ohuë.”
8 Ja̱je yo'ocohua'ipi te'e mu'sepi veinte y tres mil ju̱jua'huë'ë,
yequë nomiohua'ire cui'ne yequë ë̱mëohua'ire yo'o do'ire.
Ja̱je pa'ina,
ja̱ohua'i yo'ose'eje̱ pa'ye yo'oma'pë pañu'u,
mai cato.
9 Maija'quëre neñañu'u cajë sa̱ñope yo'o do'ire a̱ñani a̱o ju̱jua'huë'ë.
Ja̱je pa'ina,
Maija'quëre sa̱ñope yo'oye pa̱ñu'u.
10 Maija'quë de'oye yo'oma'aji'i,
caroja̱ë'ë.
Ja̱je yo'ojë ca do'ire hui̱ñaëpi dani huani je̱a'ji'i,
ja̱ohua'ire.
Ja̱je pa'ina,
Maija'quëre co'aye yo'oji caroja̱iñe pa̱ñu'u,
mai cato.
11 Si'aye mai aipëre yo'ose'e cato maire i̱ñoñe a'ë,
tëji mu'seña pa'icohua'ire,
maipi cui'ne yo'oye pa̱jajë caquë.
12 Nuñerepa de'oye pa'iyë cuasaquë pani,
de'hua ñajë'ë yo'oquë ta̱'añe.
13 Neñañe pa'ina,
mësaru ai yo'oyeje̱ pa'ye yecohua'ije̱ ai yo'ojë pa'iyë.
Mësaruse'e ai yo'oye pa̱ñë.
Neñañe cato cui'ne pa'ye a'ë,
si'aohua'ire.
Ja̱je pa'iquëta'are Maija'quëpi mësarute mësaru quëco ti̱'añe jerepa neñañe ë̱seja̱'quë api.
Ja̱je pa'ina,
Maija'quëna quëco pajë̱'ë,
ja̱ëpi necaija̱'quë api cuasajë.
Ja̱je pa'ina,
neñañepi pa'ina,
Maija'quëpi eto huasoja̱'quë api,
ai yo'oyere quëcoja̱jë caquë.
14 Si'aye Maija'quërepa peoyere Maija'quë api cuasajë yo'oye yo'oma'pë pa'ijë̱'ë,
Maija'quë do'ijë maña.
15 Mësaru cato ta̱'ñe pa'iohua'i a'ë.
Ja̱je pa'ina,
cayë se mësarupi yë'ë case'ere ai cuasani ñañe pa'iji.
16 Mai de'o u̱cu duruhuë u̱cuyë Maija'quëre de'oji,
cajë pëpa maca Cristo tsie da'cana tsioyë,
te'ije̱ pa'iohua'i i̱na.
Cui'ne panre huahueni a̱inije Cristo ca̱pëna tsioyë,
te'ije̱ pa'iohua'i i̱na.
17 Jai pa̱i mai pa'ijëta'a te'oni si'aohua'i pan a̱i do'ire te'e ca̱pë acohua'i pa'iyë.
18 Ja̱je pa'ina,
ñajë'ë,
cui'ne judío pa̱ini.
Ja̱ohua'i je̱'quë Maija'quëna i̱siyë cajë yo'osicohua'ire a̱i do'ire i̱oja'a i̱ohua'i acohua'irepa pa'iyë.
19 Ja̱je cani cama'ë pa'iyë,
pa̱i de'huasi diusupi do'i quë'ye a'ë caquë.
Pa̱nita'a pa̱i de'huasi diusuna hua'i i̱sise'epi jerepa do'i quë'ye pa'iji cama'ë pa'iyë.
20 Yë'ë cato cayë sehuoma'cohua'ipi Maija'quëna hua'i i̱siyë cajë yo'oni huatiohua'ina i̱siyë.
Ja̱je pa'ina,
yë'ë cato mësarute ë̱seyë,
huatiohua'i ja̱'re co̱ni pa'iye.
21 Huati u̱cu duruhuë u̱cuye ti peoji,
mai Ëjaë u̱cu duruhuë u̱cucohua'ipi.
Ëjaë mesana a̱o a̱icohua'ipi huati mesa a̱iñe ti peoji.
22 Ëjaëpi oi pë̱ijaquë cajë huatire sihuajë yo'oye co'aji.
I̱ jerepa tutu quë'iohua'i peoyë,
coa teaye pa'iohua'i mañapi.
Sehuosicohua'i Yo'oye Cui'ne Oiye
23 Maipi si'aye yo'oye neñe pa'iji.
Ja̱je pa'iquëta'are yeque cato co̱cai ma'ñe a'ë.
Si'aye yë'ë yëyeje̱ pa'ye yo'oye pa'iji.
Ja̱je pa'iquëta'are yeque cato joyo pa'iye ñese mëiñe co̱cai ma'ñe a'ë.
24 Ja̱je pa'ina,
yecohua'i de'oye pa'i ja̱'ñere cuasajë de'oye yo'oye pa'iji.
Co'ye de'oye pa'iyere cuasajë yo'oye co'aji.
25 Ja̱je pa'ina,
a̱o huero hue̱'ña i̱siyere coa hueroni a̱ijë'ë.
De'huasi diusuna i̱sise'e pa'ima'quë cuasajë se̱ma'pë pa'ijë̱'ë,
ai cuasaye peoja̱quë.
26 Iye yeja cui'ne si'aye i̱ote pa'iye Maija'quë tse̱ a'ë.
27 Pa̱nita'a sehuoma'quëpi a̱o a̱ijë'ë caquë huëouna,
sehuoni i̱ huë'ena saisicohua'i pani,
de'huasi diusure i̱sise'e pa'ima'quë cuasajë se̱ma'pë coa si'aye i̱ a̱oñe a̱ijë'ë.
28 Ja̱je pa'iquëta'are yequëpi mësarute quëa'ñe pa'i api,
iye hua'i pa̱i de'huasi diusure i̱sise'e a'ë caquë.
Ja̱je quëaru a̱ima'pë pa'ijë̱'ë.
Mësarute quëasiquë cuasayere co'a de'huayere coejë a̱iñe pa̱jë'ë.
29 Iye cato cayë yequë co'aye a'ë,
cuasayere.
Mësaru cuasayere cama'ë pa'iyë.
Ja̱je pa'iquëta'are pa̱ipi se̱ti̱'ñe pa'iohua'i a'ë.
¿Me neni yë'ë yëyeje̱ yo'oyere yequëpi ñaquë yo'oji ca de'huaye pa'iquë'ni?
30 Yë'ëpi tsoe Maija'quëre se̱ni de'huani a̱iquë pa'ito ¿me neni yë'ë a̱iñere yecohua'ipi ca de'huaye pa'iquë'ni?
31 A̲iñepi u̱cuyepi,
cui'ne co'amaña yo'oyepi Maija'quë de'oquëre pa'ni cajë sihuayere yo'ojë̱'ë.
32 Sehuosicohua'ire,
judío pa̱ire cui'ne judío pa̱i peocohua'ireje̱ si'aohua'ire co'aye ne i̱ñoma'pë pa'ijë̱'ë.
33 Ja̱je pa'ina,
yë'ë si'aohua'ire de'oye yo'osi'i caquë yo'oyë.
Yë'ë yëyere yo'oma'ë pa'iyë.
Ja̱ohua'ije̱ si'aohua'i de'oye cuasajë huaso cua̱ñosicohua'i pa'ija̱jë caquë yo'oyë.