3 Yë'ëre sa̱ñope cacohua'ire ñeje sa̱ñope sehuoquë quëayë.

4 Yë'ë si'aye a̱oñe cui'ne o̱cuaye a̱iñe pa'iji,

cui'ne u̱cuye pa'iji,

Maija'quë jëjo daoquë pa'i do'ire.

5 Cui'ne sehuosiconi huejani cuaroja̱iñe de'oji.

Mai Ëjaë jëjo daocohua'i cui'ne i̱ yo'je tsi̱ cui'ne Pedro yo'oyeje̱ pa'ye yo'oye de'oji.

¿Me ta̱'tëpo pa'iquë'ni,

yë'ëse'ere?

6 ¿Bernabé cui'ne yë'ë co̱ni Maija'quë do'ijë co̱caima'pëna yëquë jë̱ñapi co'amaña nejë Maija'quë coca quëajë pa'iye pa'iji,

cuasaye mësaru?

7 ¿I̱queipi soldado de'oni i̱ pa'i do'i sa̱iquë pa'iye pa'iquë'ni?

¿I̱queipi tsio neni quë̱quëna,

tëani a̱ima'quë pa'iquë'ni?

¿I̱queipi yëi ñama oje dë'sequëta'a u̱cuma'quë pa'iquë'ni?

8 Ja̱je pa'ina,

pa̱ise'e cuasaquë caye a'ë cuasama'pë pa'ijë̱'ë.

Moisés cua̱ñese'eje̱ cui'ne caji yë'ëse'e caye pa̱ñë.

9 Cua̱ñese'epi toya pëpëna toyase'e pa'iji,

ñeje:

“I̱ti ca̱ po'te saihuë të'ija̱i po'tequëre duruhue̱quëre yë'opo sëama'pë pa'ijë̱'ë,

i̱se'e a̱i nejaquë.”

Ja̱je cani Maija'quë duruhue̱quëse'ere oi cama'ë paji'i,

10 maini caquë coa i̱ñoquë.

Ja̱ cato capi,

maire.

Yecohua'i co̱cai ja̱'ñere capi.

Ja̱je pa'ina,

sehuosicohua'ipi Maija'quë coca quëacaicohua'ire co̱caiye pa'iji,

co'amañapi.

Ta̱ja'to a̱'ji yeja nequë cui'ne huea po'tequë i̱ohua'i tsio quë̱ise'ere paja̱jë cuasajë yo'oyë.

11 ¿Ja̱je pa'ito mësaru joyo pa'i cocare pare quëasicohua'ini mësarupi mësaru co'amañapi co̱caiye co'aquë?

Pa̱ni de'oji,

yëquëre co̱caiye.

12 Yecohua'ire ai pa̱'ñe pa'iohua'ini mësaru de'oye co̱caicohua'i a'ë yëquëre jerepa co̱caiye pa'iji,

mësarute Maija'quë coca quëasicohua'ire.

Ja̱je pa'iquëta'are yëquë mësarute co̱caijë̱'ë caye pa̱huë.

Coa ai jerepa quëcojë yëquë jë̱ñapi nejë a̱ë'ë.

Cristo coca quëayere mësarupi jo̱sa yo'oye a'ë,

cuasama'cohua'ini cajë.

Ja̱je yo'ohuë.

13 Mësarupi tsoe asacohua'i a'ë.

Maija'quë huë'e ñacaicohua'i cato i̱ote pa'i co'amañapi pa'icohua'i a'ë,

cajë.

Hua'ire ëojë Maija'quëre se̱ hue̱'ña co̱caicohua'ije̱ Maija'quëna i̱sisi hua'ire a̱icohua'i a'ë.

14 Huaso coca quëacaicohua'i cato,

huaso coca quëa do'ipi pa'iye pa'iji caquë mai Ëjaë nepi.

15 Yë'ë ja̱je quëa do'ire sa̱i cua̱ñoñe pa'iquëta'a sa̱i cua̱ñoñe pa̱huë.

Cui'ne ja̱je toyani toyama'ë pa'iyë,

mësarupi i̱sija̱jë caquë.

Coa ai jerepa yë'ë ne do'i sihuayere yecohua'ipi sioyere coeyë.

Ju̱'iñere jerepa de'ora'pi cuasayë,

yë'ë ne do'i sihuayere sioto.

16 Jerepa pa'i a'ë cuasaquë quëaye pa̱ñë,

Maija'quë coca quëani.

Yë'ëre cua̱ñe nëose'ere ne ti̱'añe pa'iji.

Yë'ëpi Maija'quë coca quëama'quë pani teaye pa'iyë.

17 Ja̱je pa'ina,

yë'ëpi neñe yë'ë sihuaquë yo'onita'a yë'ë do'ire i̱sise'e payë.

Ja̱je pa'iquëta'are yë'ëpi jo̱sa coenije neñe pa'iji,

cua̱ñe nëose'e pa'ito me pa̱ñe'ni.

18 Huaso coca quëa do'ire se̱'ñe pa'ita'a sihuaquë se̱ma'ë pa'iyë,

huaso cocare asacohua'ipi sa̱iñe peoja̱quë caquë.

Ja̱re cayë,

yë'ë sihuayere.

19 Pa̱i jo'yaë peoquëta'a si'aohua'i jo'yaë de'ohuë,

Cristona jai pa̱ire dacasi'i caquë.

20 Judío pa̱i ja̱'re co̱ni pa'ini judío pa̱i yo'oyeje̱ pa'ye yo'oquë pa'iyë,

judío pa̱ini Maija'quë te̱'tena dasi'i caquë.

Ja̱je cani cayë,

Moisés cua̱ñese'ere sehuojë yo'ocohua'ire nesi'i caquë yo'oyere.

Yë'ë cato nuñerepa ja̱ cua̱ñeñere pa'ima'quëta'a i̱ohua'ire Maija'quëna dasi'i caquë yo'oyë.

21 Cui'ne Moisés cua̱ñese'ere asama'cohua'i ja̱'re pa'i i̱ohua'ije̱ pa'i de'oyë,

Maija'quëna i̱ohua'ire dasi'i caquë.

Ja̱ yë'ta'a Diusu cua̱ñese'ere pa'iyë,

Cristo cua̱ñeñere sehuoquë pa'i do'ire.

22 Tutu peocohua'ire Cristona dasi'i caquë i̱ohua'ije̱ pa'i de'ohuë.

Pa̱i ñapeje̱ pa'i de'ohuë,

de'hue te'ohua'ise'e huaso cua̱ñosicohua'i pa'ija̱jë caquë.

23 Ja̱je yo'oyë,

huaso coca quëayere pa̱ipi jerepa asaja̱jë caquë.

Cui'ne huaso cocapi de'o co'amaña i̱siyere yecohua'i co̱ni paja̱jë caquë yo'oyë.

24 Huë'huëni co'amaña i̱mañu'u cajë huë'huëcohua'i cato si'aohua'i huë'huë huëocohua'i a'ë.

Ja̱je yo'osicohua'ita'a ti̱'ama'cohua'i a'ë,

co'amaña.

Ti̱'ama'pëna,

coa te'i i̱ti de'hue nesiquëse'e co'amaña saquë api.

Ja̱je pa'ito mësaruje̱ ai cuasajë huë'huëjë̱'ë,

co'amaña i̱ñu'u cajë huë'huëyeje̱ pa'ye.

25 Si'aohua'i sa̱ñope yo'ojë ca̱'a yo'ocohua'i si'aye ca̱'a yo'oroja̱iñe je̱oni ñare pajë yo'ocohua'i a'ë,

coa caraja̱i co'amañare i̱mañere cajë yo'ojëta'a.

Ja̱je pa'iquëta'are mai cato ti pani huesëyere pare ti̱'añu'u cajë yo'oyë.

26 Ja̱je pa'ina,

yë'ë cato coa huesë huë'huëma'ë pa'iyë,

cui'ne peo de'otona të'caquë,

huaiyeje̱ pa'ye yo'oma'ë pa'iyë.

27 Ca̱përe cua̱ñeñë,

coa ai jerepa yë'ë ca̱përe të'caquë yo'oyë,

de'oye sehuocaiyere caquë.

Yecohua'ise'ere de'oye sehuoye pa'iji caquë ye'ya tëjini yë'ëpi ye'yama'quë pa'ija̱'quë caquë eto cua̱ñoñere coequë ja̱je yo'oyë.