4 Maipi asayë,

pa̱i de'huasi diusuna a̱o i̱sise'e ayere a̱iñere cayë.

Pa̱i de'huasi diusu iye yeja coa pa'iji,

te'i Maija'quëse'e i̱repa pa'iji,

yequë diusu peoyë.

5 Ja̱ yë'ta'a ma'tëmore cui'ne iye yejare jai pa̱i diusuohua'i cui'ne ëjaohua'i pa'iyë cuasato,

jai pa̱i diusu cui'ne ëjaohua'ije̱ pa'iyë.

6 Ja̱je pa'ijëta'are maire cato te'i Diusu pa'iji,

Maija'quëse'e.

Maija'quëpi si'aye de'huapi.

Ja̱je pa'ina,

i̱ do'ipi pa'iyë,

mai.

Cui'ne te'i Ëjaë pa'iji.

Ja̱ë cato Jesucristo api.

I̱ja'a do'ire pa'iji,

si'aye cui'ne maije.

7 Ja̱je pa'iquëta'are yecohua'i iye yë'ë yure quëaye asa ti̱'añe pa̱ñë.

Ja̱je pa'ina,

sehuosicohua'ita'a pa̱i de'huasi diusuni i̱ohua'i se̱jë ye'yase'epi ja̱ yë'ta'a pa'ina,

pa̱i de'huasi diusuni i̱sisi hua'i co'aji a̱iñe cuasayë.

Cui'ne i̱ohua'i cuasaye tutu peo do'ire si'si a'ë cuasayë,

co'a diusure i̱sise'ere a̱ini.

8 Mai a̱o a̱iñepi Maija'quë maire oiye ti̱'añe peoji.

Ja̱je pa'ina,

a̱isi do'ipi de'ocohua'i pa'iyeje̱ peoji.

Cui'ne a̱isi do'ire jerepa co'acohua'i pa'iyeje̱ peoji.

9 Ja̱je pa'iquëta'are de'hua ñajë'ë,

yo'ojë si'aye asa ti̱'ama'cohua'ini tutu peocohua'ini co'a de'huaye mësaru si'aye de'oye a̱i do'ipi.

10 Ja̱je pa'ina,

më'ëpi si'aye asaquëpi pa̱i de'huasi diusure i̱sise'ere a̱i ñu'ina,

si'ayerepa asa ti̱'ama'quëpi ñaji.

Ñani i̱je a̱iji ja̱ yë'ta'a co'aji cuasaquëta'a.

11 Ja̱je cuasaquëta'a a̱i do'ire më'ëpi do'i quë'i pa'iyë,

a̱ni i̱ño do'ire ja̱ maca yureta'a më'ëpi Cristo i̱te ju̱cacaisi do'ire sehuosiquëni si'aye më'ë asa ti̱'a do'ipi i̱ asayere nejocaiyë.

12 Tutu peocohua'i Maija'quëre a'ri maña cuasayere nejocai do'ire,

mësaru Cristoni sa̱ñope yo'oyë.

13 Ja̱ do'ire a̱iñe pa̱ñepi jerepa de'oji.

Co'aji,

yë'ë a̱i do'ire Maija'quë do'iquëre ne ta̱o.