6 Mësaruni yëhuoquë caquë cua̱ñema'ë pa'iyë.

7 Yë'ë cato si'aohua'i yë'ëje̱ pa'iohua'ise'e pa'ijë̱'ë,

cuasayë.

Cuasaquëta'are Maija'quëpi pa̱i ñapere ti̱ñe tutu i̱sipi.

8 Huejama'cohua'ire cui'ne hua'jeohua'ire cayë,

huejaye pa̱to jerepa de'oji,

yë'ëje̱ pa'iohua'i pa'ito.

9 Ja̱je pa'iquëta'are quëco ti̱'añepi peoto huejayepi de'oji.

Co'aji,

coa ëa ju̱'ijë ai yo'ojë pa'iye.

10 Huejasicohua'ire cato cua̱ñeñë,

ë̱jëre je̱ocoye ti peoji.

Ja̱ cato yë'ëse'e caye pa̱ñë.

Ëjaërepaje̱ ja̱je cua̱ñeji.

11 Ja̱je pa'iquëta'are nëjopi ë̱jëre je̱ocosico pani yequëre huejaye peoji,

pa̱nita'a cui'naëna co'i co̱ñe pa'iji.

Ë̲jëje nëjore je̱ocoye peoji.

12 Iye cato yë'ëpi cayë,

Ëjaërepa case'ere caye pa̱ñë.

Sehuosiquëpi sehuoma'coni nomiore paquëna,

i̱opi de'oye i̱ ja̱'re pasi'i cuasaco pa'ito je̱ocosi'i caquë yo'oye pa̱jë'ë.

13 Yeque sehuosicopi sehuoma'quëni pacona,

i̱pi de'oye i̱o ja̱'re pasi'i cuasaquë pa'ito je̱ocosi'i caco yo'oye pa̱jë'ë.

14 Ja̱je pa'ina,

sehuoma'quëpi nëjo sehuosicore pa do'ire Maija'quëna i̱sisiquëje̱ pa'iji.

Cui'ne nomioje sehuoma'copi sehuosiquëni ë̱jëre pa do'ire Maija'quëna i̱sisicoje̱ pa'ico.

Ja̱je yo'oye peoto mësaru mamajëpi sehuoma'cohua'i mamajëje pa'iohua'i co'acohua'i patira'huë.

Ja̱je patira'sicohua'ita'a yure cato de'ocohua'i pa'iyë,

Maija'quë ña hue̱'ña.

15 Ja̱je pa'iquëta'are sehuoma'quëpi pa̱nita'a sehuoma'copi je̱osi'i cato de'oji cajë̱'ë,

ai oima'pë sehuosiquëpi pa̱nita'a sehuosicopi ai yo'ojë pa'ito co'aji.

Maija'quë cato de'oye sihuajë pa'ijë̱'ë caquë soipi,

maire.

Ja̱je pa'iquëta'are ai yo'ojë pa'ito co'aji.

16 Nëjo sehuosicopi ë̱jë sehuoma'quëre huasora'se'ere huesëco pa̱nita'a ë̱jë sehuosiquëpi nëjo sehuoma'core huasora'se'ere huesëji.

17 Mësarute soi maca pa'ise'eje̱ pa'ijë,

pa̱i ñapere Ëjaë nejë'ë caquë i̱sise'eje̱ pa'ye yo'ojë pa'ijë̱'ë.

Ja̱je cua̱ñequë ye'yayë,

si'a hue̱'ña sehuosicohua'i pa'i tsëcare.

18 Cui'ne cuiri ca̱'ni tëasiquëni Maija'quëpi soisiquë pa'ito ja̱re ja̱je pa'ipi Maija'quëre tuijë̱'ë.

Ca̱'ni tëama'quëni soisiquë pa'ito ja̱re tëama'quëpi tuijë̱'ë,

Maija'quëre.

19 Ti co̱cai ma'ñe a'ë,

cuiri ca̱'ni tëaye cui'ne tëa ma'ñeje.

Ti co̱caiye cato Maija'quë cua̱ñeñere de'oye sehuoye a'ë.

20 Ja̱je pa'ina,

pa̱i ñape pa'iye pa'iji,

Maija'quë i̱ soima'në pa'ise'eje̱ pa'iohua'i.

21 Jo'yaë pa'isiquë pani,

co'a ju̱'ima'ë pa'ijë̱'ë.

De'hue eta huajëye pa'ito eta huajëjë̱'ë.

22 Jo'yaë pa'ina,

Maija'quëpi soisiquë pa'ito jo'yaë peoquë po̱nëji,

mai Ëjaëre necaiquë po̱nëni.

Jo'yaë peoquëni Cristopi soina,

Cristo jo'yaë de'oye pa'iji.

23 Mësarute Maija'quëpi jai do'i hueropi.

Ja̱ do'ire pa̱i jo'yaohua'i pa'ima'pë pa'ijë̱'ë.

24 Ja̱je pa'ina,

Maija'quë do'ijë ja̱ yë'ta'a Maija'quë mësarute soima'në pa'isi macare pa'ijëta'a Maija'quë ña hue̱'ñana de'oyerepa pa'ijë̱'ë.

25 Huejama'cohua'ire cato mai Ëjaë cua̱ñese'e peoji.

Ja̱je pa'iquëta'are yë'ë cuasayepi caye yëyë,

mësarute.

Mai Ëjaëpi yë'ëre oi huasosiquë sëte nuñerepa caji cajë asacaiquëre papi cayë.

26 Mësarute cayë,

huejama'pë pa'ito jerepa de'oji.

Cui'ne quëasi'i,

iye mu'seña co'a mu'seña'ë.

Ja̱je pa'ito me huejaye'ni.

27 Huejasiquë cato nëjore je̱ocoye peoji.

Huejama'quë pani huejasi'i caquë nomiore co'ema'ë pa'ijë̱'ë.

28 Ja̱je pa'iquëta'are më'ëpi huejaquë pani co'aye yo'oye pa̱ñë.

Nomi tsi̱opi huejaco panije co'aye yo'oye pa̱co.

Ja̱je pa'iquëta'are huejasicohua'i cato ai yo'oja̱'cohua'i a'ë.

Ja̱je pa'ina,

yë'ë cato iye ai yo'oyepi peoja̱quë caquë huejaye pa̱ñepi jerepa de'oji cayë.

29 Maija'quë do'ijë,

mësarute cayë,

mai iye yeja pa'iye a'ri tëcahuë maca pa'iji.

Ja̱je pa'ina,

yure cato huejasicohua'ipi hueja ma'ñeje pa'iohua'i pa'iye pa'iji,

mai Ëjaë co'amañare jerepa cuasajë.

30 Iye yeja mai pa'iye caraja̱ija'coa.

Ja̱ do'ire oicohua'i panije oima'pë pa'ijë̱'ë.

Sihuacohua'i pa̱nije sihuama'cohua'ije̱ pa'iye pa'ijë̱'ë.

Co'amañare huerosicohua'i panije co'amañare peocohua'ije̱ pa'iye pa'ijë̱'ë,

mai Ëjaë ayere neja'quë caquë.

31 Iye yeja co'amañare de'oye a̱'jiñe ti̱'ajë jaiye pacohua'i pani co'amañare sihuama'pë pa'ijë̱'ë.

Peocohua'i pa'iyeje̱ pa'ijë̱'ë.

Mësarupi asayë,

iye yeja caraja̱ija'coa cajë.

Ja̱ do'ire iye yeja co'amaña sihuaye peoji.

32 Yë'ë cato yëyë,

mësarupi iye yeja co'amañare ai cuasajë co'a ju̱'ima'pë pa'iyere.

Ja̱je pa'ina,

ë̱mëpi huejama'quë pani Ëjaë co'amañase'e cuasaquë i̱te de'oye i̱ñoñere caquë yo'oji.

33 Ja̱je pa'iquëta'are huejasiquë cato iye yeja co'amañare cuasaquë co'a ju̱'iji,

nëjore de'oye necaiyere cuasaquë.

Ja̱je pa'ina,

cayaye cuasaye pa'iji.

34 Ja̱je cui'ne huejasi nomioje iye yeja co'amañare co'a ju̱'ico i̱o ë̱jëre de'oye yo'ocaiyere cuasaco.

Ja̱je pa'iquëta'are nomi tsi̱o cato mai Ëjaë co'amañase'e cuasaco i̱o ca̱pë cui'ne i̱o joyo Maija'quëna i̱sisicopi pa'ico.

35 Ja̱je cani mësaru de'oye pa'iyere caquë cayë.

Huejama'pë pa'ijë̱'ë caye pa̱ñë.

Coa ai jerepa Ëjaë yëyese'e cuasajë de'oye pa'ijë i̱se'ere necaiyere caquë quëayë.

36 Te'ipi i̱ huejaja̱'co ai de'o huesëo cuasaquë i̱ona yëyere quëcoma'quë pani huejajë̱'ë.

Co'aye yo'oye pa̱ji.

De'oye yo'oji.

37 Ja̱je pa'iquëta'are yequëpi i̱ yëyere meñe quëcoquë pani huejaja̱'core huejaye pa̱si'i cuasa nëopi.

Ja̱ yo'oquëna,

i̱ joyopi cuasaquë yo'o do'ire de'oye yo'oji.

38 Ja̱je pa'ina,

huejaja̱'core huejasiquë cato de'oye yo'oji.

Cui'ne huejaja̱'core huejama'quë jerepa de'oye yo'oji.

39 Nëjo cato ë̱jëni tsiosico paco'ë,

te'i de'ojëna.

Ë̲jë ju̱'isi maca te'o de'oni ja̱ maca yureta'a nomi tsi̱oje pa'io de'oco.

Ja̱ maca huejaye yëni huejaye pa'iji,

Maija'quëre sehuosiquëni.

40 Ja̱je pa'iquëta'are yë'ë cato cuasayë,

hueja co̱ñe pa̱ñepi jerepa de'oji.

Ja̱je cani yë'ëje̱ Maija'quë joyo paquëpi cayë cuasayë.