Sehuosicohua'ise'e Sa̱ñope Caye Pa'ito Ne De'huaye
6
Je̱'nërepa mësaru aquëpi yequëni sa̱ñope caye pani tsoe saiji,
pa̱i yo'oye ña ëjaë quë'rona ne de'huacaija̱'quëre.
¿Me yo'ojë ja̱je yo'oye'ni,
Maija'quëre sehuocohua'ina quëama'pë?
2 Maija'quëre sehuocohua'ina quëaye de'oji,
ja̱ohua'ipi asani ne de'huaja̱'cohua'ire.
Iye yeja pa̱i yo'ose'e mësarupi ca de'huaja̱'cohua'i a'ë case'e asacohua'i a'ë,
sehuoma'cohua'ire.
Mësarupi ja̱je yo'oja̱'cohua'i sëte iye a'ri co'a coca mësaruse'e ca de'huajë pa'ijë̱'ë.
3 Cui'ne yequeje̱ asacohua'i a'ë,
mësaru,
sehuosicohua'ipi hui̱ñaohua'i yo'ose'e ca de'huaye pa'iji,
case'e.
Ja̱je yo'oja̱'cohua'i sëte ai jerepa iye yeja yure pa'iye mësaruse'e ne de'huaye pa'iji.
4 Ja̱je pa'iohua'ita'a mësaru,
iye yeja pa'iyere sa̱'ñe coca pani tsoe sehuoma'cohua'ina sani quëayë,
sehuosicohua'i pa'iye ti asama'cohua'ina.
5 Mësarupi pa̱ñete yo'ore'ni cajë ai cuasajë oija̱jë caquë cayë.
¿Mësaru aquë ta̱'ñe asaquë ti peoquëna,
ja̱je yo'ore,
sehuosicohua'i aquëpi iye yo'oye ca de'huaquë ti peoquëna,
yo'ore?
6 Sehuosiquëpi cajë sehuosiquëre sa̱ñope caye payere iye yeja ëjaë sehuoma'quëna quëaye co'aji.
7 Mësaru sa̱ñope yo'ojë cayepi tsoe co'a de'osico pa'iji.
Ja̱je pa'ito ¿Me yo'ojë quëco ma'ñe'ni,
më'ëre sa̱ñope yo'oyere,
cui'ne më'ë co'amañare i̱ma cua̱ñonije?
8 Ja̱je pa'iquëta'are mësarupi Maija'quë do'ijëre nuñerepa yo'oma'pë co'amañare yahue i̱majë yo'oyë.
9 Mësarupi asayë,
nuñerepa yo'oma'cohua'i Maija'quë cua̱ñe te̱'te co̱ni pa'iye ti peoye.
Ja̱je pa'ito co'ye mësaruja̱'a cosoma'pë pa'ijë̱'ë.
Maija'quë cua̱ñe te̱'te pa'iye peoji,
pa̱i de'huasi diusuohua'ire se̱cohua'i,
huejama'cohua'ipi yo'ocohua'i,
huejasicohua'ipi yequë nomiore pa̱nita'a ë̱mëre yo'ocohua'i,
ë̱mëohua'ija̱'a yo'ocohua'i.
10 Cui'ne co'amaña yahue i̱macohua'i,
co'amañase'e ai oicohua'i,
co̱no cuepecohua'i,
co'a coca yequëna quëacohua'i jerepa jaiye curiquë neñu'u cajë cosojë necohua'i,
si'aohua'i ja̱je yo'ocohua'i ti̱'añe pa̱ja'cohua'i a'ë.
11 Ja̱je pa'iohua'i paë'ë,
mësaru acohua'i.
Pa'isicohua'ipi yure cato mai Ëjaë Jesucristo yo'o do'ipi cui'ne Maija'quë joyo yo'o do'ipi tsoa to̱sicohua'i pa'iyë.
Maija'quëna i̱sisicohua'ipi pa'iyë,
Maija'quë cajeohua'i de'oni.
Mai Ca̱pë Cato Maija'quë Tse̱
12 Si'aye yo'oye pa'iyë,
mai.
Ja̱je pa'iquëta'a yeque yo'oye cato co̱cai ma'ñe a'ë,
maire.
Ja̱je pa'ina,
de'hua ñaquë pa'iyë,
te'e co'amaña ai yë huesëna,
ja̱ yëyepi jo'ya ne huesoyere coequë.
13 Ë̲tatu'u cato a̱o a̱ija'copi pa'iji cani pa̱i nuñerepa cayë.
Ja̱je pa'iquëta'are Maija'quëpi ë̱tapë cui'ne a̱o nejoja'quë api.
Pa̱i ca̱pë coa si'a nomiohua'ire yo'oyere caquë pa'iji cani coa tayo cayë.
Pa̱i ca̱pë cato Ëjaëni pacacaico cui'ne Ëjaëpi pa̱i ca̱përe pacacaiji.
14 Ja̱je pa'i do'ire maire Diusupi i̱ tutupi ju̱'isicohua'ini huajëcohua'ire huëoja̱'quë api,
Jesucristore huëose'eje̱ pa'ye.
15 Pa̱i ñape mësaru Cristo ca̱pë acohua'i a'ë.
¿Yë'ë Cristo ca̱pë aquëpi si'a ë̱mëohua'ire yo'ocona tsioye de'oquë?
Ai co'aji,
me neni tsioye'ni.
16 Mësarupi tsoe asayë,
ë̱mëpi si'a ë̱mëohua'ire yo'ocona tsioni i̱o ca̱pëna tsioye pa'iji.
Ja̱je caji toyase'e iyere ñajë'ë:
“Te'ije̱ pa'iohua'i tsioye pa'iji,
cayaohua'i pa'isicohua'ita'a caji.”
17 Ja̱je pa'ye pa̱ipi Jesucristona tsioni te'ije̱ pa'iohua'i de'oyë,
i̱ joyona tsiosicohua'i pa'i do'ire.
18 Huejama'cohua'ipi pani nomiore yo'oyere yo'oma'pë catijë̱'ë.
Ja̱ cato ca̱pë nejoñe a'ë.
Yeque tayo yo'oye cato ë̱mëje'ese'e co'aye neñe a'ë.
Ja̱ do'ire ti ja̱ yo'oma'pë pa'ijë̱'ë,
ca̱pë co'a de'huaye a'ë.
19 Mësaru ca̱pë Maija'quë joyo pa'i huë'e a'ë.
I̱pi mësarute pa'iji.
Ja̱je pa'ina,
mësaru ca̱pë mësaru tse̱co peoji,
Maija'quë tse̱coa.
20 Maija'quëpi jai do'i hueropi,
mësarute ai yo'osi do'ipi.
Ja̱ do'ire mësaru Maija'quëre ai oijë mësaru ca̱pëpi i̱ de'oyerepa necaiye i̱ñoñe pa'iji.