Yo'o Ma'ñere Yo'ojëna, Ca De'huaye
5
Mësaru aquëpi sehuoma'cohua'ije̱ yo'o ma'ñere yo'oquë pëca ja'quë nëjoni nëjore payeje̱ paji cajëna asayë.
2 Ja̱je pa'iquëta'are mësaru ti co'aye yo'oji cama'pë Cristore sehuocohua'ire pa'ë cuasajë pa'iyë,
ti co'a ju̱'ima'pë.
Ja̱je pa'ijëna,
yë'ëpi yure cayë,
ja̱ co'ayerepa yo'osiquëre eto saojë̱'ë,
mësaru ja̱'re pa'ima'ë pa'ija̱'quë.
3 Ja̱ro yë'ë pa'ima'ë panije ja̱ co'aye yo'ose'e asani ai coeyë.
Ja̱je pa'ina,
yë'ëpi ja̱rore pa'iyeje̱ pa'yerepa i̱ti co'aye yo'osiquëre coequë tsoe co'aji,
cayë.
4 Ja̱ do'ire mai Ëjaë Jesucristo do'ipi mësaruse'e tsi'sijë̱'ë.
Tsi'sini yo'ojëna,
yë'ë ja̱rote mësaru ja̱'re te'e pa'iyeje̱ pa'ye pasi'i,
yë'ë joyopi.
Cui'ne Ëjaë Jesucristo tutupi ja̱rote pa'ija̱'coa,
mësaru ja̱'re co̱ni.
5 Ja̱ maca tsi'si sitopi co'aye yo'oquëre huati ëjaëna i̱sijë̱'ë,
i̱ ca̱pë yëyere nejoja'quëna,
nejoquëta'are joyose'e huaso cua̱ñoja'quëre Ëjaë Jesucristo dai maca.
6 Jerepa pa'iohua'i a'ë cuasama'pë pa'ijë̱'ë.
A'ri maña o'sacopi huajë së̱pëna co̱'meto si'a së̱pë o'saye pa'iji caye mësarupi asacohua'i a'ë,
aiohua'i case'e.
7 Ai hua̱no o'sa së̱pëje̱ pa'ire co'aquëre eto saojë̱'ë,
mësaru de'ocohua'ise'e pa'ija̱'cohua'i,
huajë së̱pëje̱ pa'iohua'ise'e.
Egíptopi judío pa̱i etajë pa'ise'ere cuasajë a̱iñeje pa'i pan pa'ijë̱'ë,
ti co̱'mema'cohua'i.
Cristo mai do'ire ju̱cacaji'i.
Ja̱je pa'ina,
ja̱ë api,
yëi ñama mai eta huajëse'ere cuasajë yo'oquë.
8 Ja̱je pa'ina,
mai eto huaso cua̱ñosi mu'sere sihuajë nuñere papi cui'ne ta̱'ñere papi sihuañu'u,
o'saye co̱'mema'a a̱oje pa'yere papi.
Si'sipi cui'ne tayo yo'oyepi co̱ni sihuaye pa̱ñu'u.
Ja̱ cato ai o'sa së̱pëje̱ pa'ye a'ë.
9 Ja̱'në toya saocore toyahuë,
co'aye yo'ocohua'ire cui'ne nëjo peoconi yo'ocohua'ire tsioma'pë pa'ijë̱'ë caquë.
10 Ja̱je tsioma'pë pa'ijë̱'ë cani cama'ë paë'ë,
iye yeja pa̱ini tsioma'pë caquë jaiye co'amaña yëcohua'ini,
co'amaña yahue i̱macohua'ini,
yequere Maija'quë a'ë cuasacohua'ini cui'ne nomiohua'ire yo'ocohua'ini.
Ja̱je yo'oye pa'ito mësaru iye yeja pa'iye peora'pi.
11 Yë'ë cato ñeje cahuë,
tsioma'pë pa'ijë̱'ë,
sehuohuë caquëpi ja̱ yë'ta'a yahue nomiore yo'oquëre,
co'amaña yahue i̱maquëre,
jaiye co'amaña yëquëre,
Maija'quëre cuasaye jerepa co'amañase'e cuasaquëre,
co'a coca caquëre co̱no cuepequëre.
Ja̱je pa'ire cato co̱ni tsioni a̱ima'pë pa'ijë̱'ë,
cahuë.
12-13 Sehuoma'cohua'ini tayoyë,
maipi caye peoji.
Maire cato sehuosicohua'ise'ere ñaquë ca de'huaye pa'iji.
Sehuoma'cohua'ire cato Maija'quëpi co'aji caye pa'iji.
Ja̱je pa'ina,
mësarupi sehuosicohua'i aquëpi tayoto ca de'huaye pa'iji.
Ja̱ do'ire ja̱ëte tayo yo'oquëre mësaru ja̱'re pa'iquëre eto saoye pa'iji,
po̱nëma'quë pani.