Jesucristo Jëjo Saosicohua'i Nese'e
4
Ja̱je pa'ina,
yëquëre cato Cristore necaicohua'i a'ë cuasajë ñajë'ë.
Yëquë cato Diusu cuasa nëose'e ña ti̱'a ma'ñe quëacaija̱'cohua'ire nesicohua'i a'ë.
2 Ja̱ do'ire necaiquë cato i̱ ëjaë cua̱ñese'ere si'a yë'quë maca yo'oquëna,
necaiquëre papi yecohua'ije̱ cuasajë ñajëna,
yo'oquë api.
3 Ja̱je pa'iquëta'are yë'ë cato ai co'a ju̱'iñe pa̱ñë.
Mësarupi cui'ne yecohua'ipi yë'ëre de'oye yo'opi pa̱nita'a co'aye yo'opi cayere cui'ne yë'ëja̱'a co'ye de'oye yo'oyë ca ti̱'añeje peoyë.
4 Yë'ë cuasayepi yë'ëre sa̱ñope caye peoquëna,
sihuaquë nuñerepa pa'i a'ë cuasaye peoji.
Ja̱ do'ire Ëjaëpi caye pa'iji,
de'oji pa̱nita'a co'aji.
5 Ja̱je pa'i do'ire mësaruse'e de'oye yo'oquë api pa̱nita'a tayoquë api caye pa̱jë'ë.
Utejë̱'ë,
Ëjaë dai macaja̱'a,
Ëjaëpi dani ti̱ña i̱ñoja'quëre.
Ja̱ maca pa̱i ñape joñoa cuasase'e ñañe pa'iji.
Ja̱ maca Diusupi pa̱i ñape yo'ose'eje̱ pa'ye i̱sija̱'quë api,
pa̱i ñapere.
6 Maija'quë do'ijë,
mësaru de'oye cuasajë pa'i ja̱'ñere i̱ñosi'i caquë Apolos pa'iye cui'ne yë'ë pa'iye i̱ñoquë quëahuë,
mësarupi toyase'e pa'ina,
sa tëto saipe yo'oma'pë pa'ija̱jë caquë.
Ja̱ do'ire yëquë quëase'ere ye'yeni te'ire jerepa pa'i api cuasajë cui'ne yequëni co'aquë api cuasama'pë pa'ijë̱'ë.
7 Maija'quë mësarute de'ocohua'ire nepi.
Mësaru tutupi ti̱'añe pa̱huë.
Ja̱je pa'ina,
Maija'quë coa i̱sise'ere paye sëte jerepa pa'iohua'i a'ë cuasama'pë pa'ijë̱'ë.
8 Yure mësaru si'aye payë,
mësaru yëye.
Ja̱ do'ire mësaru pa̱i ëjaohua'ije̱ pa'iohua'irepa nëina,
pa'iyë.
Ja̱je nëina,
yëquëre hua̱nëyei'ë,
mësaru.
Sihuara'huë,
mësarupi nuñerepa ëjaohua'i pa'ito,
mësaru ja̱'re te'e co̱ni cua̱ñesi'i caquë.
9 Yëquëre Jesucristo jëjo saocohua'ire Diusupi jeteyo'jena nëcopi cuasayë,
huani je̱oja'cohua'ire nëcose'eje̱ pa'iohua'ire.
Ja̱je pa'ina,
hui̱ñaohua'i cui'ne si'a pa̱i yëquëse'ere ñañë,
i̱ohua'i yo'ojëna,
ñañu'u cajë.
10 Cristo do'ire yëquëre huesëohua'ire cayë,
pa̱i.
Cajëna,
mësarupi Cristo ayere ai asasicohua'i a'ë cuasajë sihuayë.
Yëquëpi tutu peocohua'i pa'ijëna,
mësarupi tutu quë'iohua'i pa'iyë.
Yëquëre cato pa̱i coeyë,
ñañe.
Mësaruni ëjaohua'i a'ë cajë ñañë.
11 Yureje̱ ai yo'ojë a̱o ëa ju̱'ijë,
oco ëa ju̱'ijë,
ca̱ñaje peoquëna,
pa̱ije co'aye yo'ojëna,
cui'ne huë'eje̱ peocohua'ipi ai yo'ojë pa'iyë.
12 Yëquë jë̱ñapi ai tutu nejë,
cui'ne pa̱ipi pë̱ijë tea ju̱'itoje̱ Maija'quëpi de'oye ñacaija̱quë cahuë.
Pa̱ipi jo̱sa yo'otoje̱ quëcoyë.
13 Co'aye yo'ocohua'i a'ë cayë,
yëquëre.
Ja̱je catoje̱ dahuëre quëcojë yëhuoyë,
de'oyepi.
Iye yeja ja̱'ju co'amaña nejose'eje̱ pa'iohua'ire ñañë,
yëquëre iye mu'seje̱.
14 Ja̱je toyani toyama'ë paë'ë,
mësaruni huajëya'ye ca quëcosi'i caquë.
Coa ai jerepa yë'ë mamajëre sëte yëhuosi'i caquë toyahuë.
15 Mësarupi Cristo coca ye'yacohua'ire diez mil pa̱ire pare patoje̱ yë'ë te'i pa'iyë,
mësaru ja'quëje̱ pa'i,
yë'ëpi mësarute huaso coca du'ru quëasi do'ire.
Ja̱ do'ire mësaruje̱ Cristore sehuohuë.
16 Ja̱je pa'ina,
mësarute cayë.
Yë'ë yo'oquëna,
ñase'ere mësaruje̱ yo'ojë̱'ë.
17 Ja̱re caquë mësaru quë'rona jëjo saoyë,
Timoteore,
yë'ë oiquëni,
mai Ëjaë do'ire yë'ë mamaquëje̱ pa'ini,
nuñerepa pa'ini.
Ja̱ëpi mësarute quëaja̱'quë api,
yë'ë Cristo Jesure sehuosiquë yo'oquë pa'iye cui'ne yë'ë si'a hue̱'ña sehuosicohua'i tsëcare ye'yaroja̱iñe quëase'ere.
18 Mësaru acohua'i yecohua'i yë'ë sani ñama'ë pa'ija̱'quë api cajë jerepa pa'iohua'i a'ë cuasajë yo'oyë.
19 Ja̱je pa'iquëta'are Ëjaëpi yëto esa sani ñaja'quë a'ë,
mësarute.
Ja̱ maca ñasi'i,
jerepa pa'iohua'i a'ë cuasacohua'i nejë pa'iye,
coa cacohua'i pa'ima'pë caquë.
20 Maija'quë cua̱ñe te̱'te cato cocase'e caye peoji.
Maija'quë tutupi yo'ojë pa'iye a'ë.
21 ¿I̱quere yëye'ni,
mësaru,
yë'ëpi sani tarapëpi si'seyere yëye,
pa̱nita'a ai oi sani ñañere yëye?