“¿Më'ëre sa̱ñope cayere sehuojë̱'ë?”

Caëna,

Pablopi jë̱të mëani ca huëopi,

ñeje:

2 “Israel pa̱i yë'ëre sa̱ñope case'ere yë'ëpi sehuoquëna,

Ëjaë Agripa më'ëpi asaja̱'quë api caquë sihuayë.

3 Si'aye Israel pa̱i ja̱'në yo'ojë pa'ise'e asaquëpi,

cui'ne si'aye ja̱ohua'i ja̱'re yë'ë sa̱ñope coca caye asaquëpi,

yure yë'ëpi quëaquëna,

asa jujama'ë dahuëre asacaijë̱'ë caquë se̱ñe më'ëre.

4 Yë'ë tsoe Jerusalénre po̱së pa'inë pa'ise'e si'a Israel pa̱ipi asayë.

5 Fariseohua'i cato Israel pa̱i yo'oye nuñerepa yo'ocohua'i a'ë,

tayoye pa̱cohua'i a'ë.

Yë'ë fariseo,

de'ose'e Israel pa̱ipi asayë.

Ja̱ohua'ipi yëni Pablo de'oye yo'opi,

caja̱'cohua'i pa'ini.

6 Ja̱je pa'iquëta'are Maija'quë,

yëquë aiohua'ire tsoe acohua'ire,

ca nëose'ere yë'ë ute do'ire sa̱ñope yo'ojë yë'ëre i̱ñona dahuë.

Ju̱'isicohua'i ti̱jupë huëni huajëcohua'i pa'ija̱'cohua'i a'ë,

ca nëose'ere ute do'ire.

7 Ja̱je pa'ina,

si'a Israel pa̱i doce tsëca pa'icohua'i si'a mu'seña si'a ñamiña Maija'quëre se̱jë i̱ ca nëose'ere uteyë.

Ti̱'aquëna,

ñañu'u cajë yë'ë Ëjaë Agripa yë'ëje̱ cui'ne ute do'ire yë'ëre sa̱ñope judío pa̱i cayë.

8 ¿Me yo'ojë mësaru,

Maija'quë ju̱'isicohua'ire huëo ti̱'añe pa̱ji,

cuasaye'ni?

9 Ja̱'në Jesucristo Nazaret aquë cocare ë̱sequë sehuocohua'ire sa̱ñope yo'oye pa'iji,

cuasahuë.

10 Cuasaquë ja̱je Jerusalénna yo'ohuë.

Maija'quë huë'e ñacaicohua'ipi cua̱ñejëna,

jai pa̱ire cohuë,

Jesure sehuocohua'ire.

Yecohua'ipi sehuocohua'ire huani je̱ojëna,

asaquë sihuaquë de'oji cahuë.

11 Jesure sehuocohua'ipi Jesure sehuoye pa̱ñë caja̱'cohua'i a'ë cuasaquë sehuocohua'ire ti̱'ani ai si'sehuë.

Israel pa̱i tsi'si huë̱'ñana cacaroja̱i sehuocohua'ire co'ehuë.

Ja̱ohua'ire ai pë̱i yo'ohuë,

Judea dari jere paje̱ sani co'eroja̱ë'ë,

si'sesi'i caquë.

12 Ja̱je caquë Damascona saë'ë,

Maija'quë huë'e ñacaicohua'i ëjaëpi cua̱ñese'e toyani yë'ëre i̱sini jëjo saoquëna.

13 Saina,

i̱na ëjaë Agripa jopo mu'se pa'i maca,

ma'tëmopi ë̱së jerepa miañepi yë'ëre ju'api,

yë'ëre co̱cohua'ireje̱.

14 Ju'aquëna,

ñani ta̱tajëna,

yë'ose'e asahuë,

hebreo cocapi.

Caquëna,

‘¿Saulo,

Saulo me yo'oquë yë'ëre jo̱sa yo'oquë'ni?

Tarapë jë̱jësë̱ ñacana duruhue̱quë ti̱to pë'iyeje̱ pa'ye më'ëja'a a'si ne ju̱'iñeje yo'oyë,

më'ë.’

15 Caquëna,

yë'ëpi ‘¿ne a'ni,

Ëjaë?’

cahuë.

Caquëna,

‘Jesu a'ë.

Më'ë jo̱sa yo'oquë a'ë.

16 Huëni nëcajë̱'ë,

yë'ë jo'yaëre pa̱ire quëacaiquëre nesi'i,

caquë më'ëre i̱ñoñë.

Më'ëpi yë'ë jo'yaë de'oni yure ñase'ere cui'ne yequë mu'seña yë'ëpi i̱ñoquëna,

pa̱ire quëaye pa'iji.

17 Më pa̱i cui'ne Israel tsëca pa'ima'cohua'i huaiye peoji caquë de'oye ñacaija̱'quë a'ë,

më'ëre.

Yure Israel tsëca pa'ima'cohua'ina jëjo saosi'i,

më'ëpi ye'ya sëtoja̱'quëre.

18 Ja̱ohua'i cato ca̱isicohua'ije̱ pa'iohua'i pa'iyë.

Ja̱ohua'i cato coa huesëjë yo'ocohua'i a'ë.

Ja̱je pa'ina,

mëna jo'yaohua'i pa'iyë.

Ja̱ohua'ire ye'ya sëtosi'i caquë më'ëre jëjo saosi'i,

ja̱ohua'ire quëa sëtoja̱'quëre,

më'ëpi quëaquëna,

asa sëtani po̱nëni Maija'quë jo'yaohua'i pa'ijë,

nuiñe yo'ocohua'i,

yë'ëre sehuocohua'i.

Sehuojë i̱ohua'i co'aye yo'ose'ere sa̱i de'hua cua̱ñosicohua'i pa'ijë yë'ëre yecohua'i sehuosicohua'i ja̱'re co̱ni te'e pa'ijë sehuosicohua'i pa ja̱'ñere paja̱'cohua'i a'ë.’

19 Ja̱je pa'ina,

ëjaë Agripa,

Jesús ma'tëmo aye i̱ñose'e asani de'oye sehuohuë.

20 Sehuoni du'ru macarepa Damasco pa'icohua'ini quëahuë.

Jeteyo'je Jerusalén pa'icohua'ire quëahuë.

Cui'ne si'a Judea yeja pa'icohua'ire quëahuë.

Cui'ne Israel pa̱i peocohua'ireje̱ quëahuë,

ñeje:

‘Tsoe pa'ise'e je̱oni Maija'quëre sehuojë̱'ë.

Sehuoni sehuosicohua'i yo'oyere yo'ojë̱'ë.’

21 Ja̱ yo'o do'ire Israel pa̱i pë̱ijë yë'ëre huani je̱oñu'u cajë Maija'quë huë'ena tse̱ahuë.

22 Ja̱je pa'iquëta'are Maija'quëpi co̱caina,

nuñerepa saiyë.

Ja̱ yë'ta'api yureje̱ si'aohua'ire Maija'quë coca quëaquë,

ëjaohua'ire cui'ne ëjaohua'i peocohua'ireje̱ quëahuë,

Maija'quëre tsoe quëacaicohua'ipi cui'ne Moisés tsoe quëase'eje̱ pa'ye.

23 Ja̱re quëahuë,

ñeje:

Cristopi ai yo'oni ju̱ni huesëye pa'iji.

Jeteyo'je i̱pi du'ru huëni de'o pa'iyere,

huasoyere i̱ñoja'quë api,

maire Israel pa̱ire cui'ne Israel pa̱i peocohua'ire.”

24 Pablopi i̱te sa̱ñope cayere sa̱ñope ja̱je caquëna,

asani Festopi ai tutu capi:

“Pablo më'ë cuepequë cayë.

I̱tise'e ñaquë ye'ye huesëni.”

25 Caquëna,

Pablopi sehuopi:

“Pa̱ni ëjaë Festo,

cuepema'ë nuñerepa cayë.

Ja̱je pa'ire paji cuasajë asayere.

26 I̱que mai ëjaë Agripa yë'ë caye si'aye asaji.

Ja̱je pa'ina,

ca'rama'ë cayë si'aye i̱ ña hue̱'ñana,

nuñerepa yë'ë caye ëjaëpi asa ti̱'aji,

huesëma'ë cuasayë.

Cama'ë pa'iyë,

yequë hue̱'ñana pa̱i ñama'tona tëto saise'ere.

27 Ëjaë Agripa,

¿Maija'quë coca tsoe quëacaicohua'i case'ere nuñerepa coca'ë cuasaquë?

Asayë,

më'ë.

¿Ja̱je pa'ima'quë?”

28 Caquëna,

ja̱ maca Agripa Pablote capi:

“Më'ëpi quëaquëna,

Jesús cocare sehuoye ja'i maca yo'ohuë,

më'ë capi.”

29 Caquëna,

Pablopi capi:

“Më'ë sehuoquëna,

cui'ne si'aohua'i iye mu'se yë'ëre asacohua'ije̱ sehuoja̱'cohua'i a'ë cuasaquë Maija'quëre se̱ñë.

Yë'ëje̱ pa'iohua'i sehuosicohua'i pa'ijëta'a sëa mea peocohua'ipi sehuosicohua'i pa'ija̱jë caquë se̱ñë.”

30 Pablopi ñeje ca tëji maca Ëjaë Agripa huëni nëcaquëna,

cui'ne ja̱ yeja cua̱ñequëje̱ cui'ne Bereniceje̱ cui'ne si'aohua'i i̱ti maca ducohua'ije̱ huëni nëcahuë.

31 Huëni sani ti̱ropi i̱ohua'ise'e sa̱'ñe coca cahuë,

ñeje:

“¿Iquë co'aye yo'oma'quëre me huani je̱oñe'ni,

cui'ne cosiquëpi pa'iyeje̱ peoji,

iquëre?”

32 Caquëna,

ja̱ maca Agripapi Festore capi:

“Romano ëjaërepapi ne de'huaja̱quë i̱pi cama'quë pa'ito yurepi i̱te joyeni etora'huë.”