5 Ja̱ maca capi:

“Mësaru ëjaohua'ipi yë'ë ja̱'re co̱ni Cesareana saijë̱'ë.

Sani sa̱ñope i̱te coca pa'ito ja̱rona quëajë̱'ë.”

6 Festopi ocho mu'seña panita'a diez mu'seña Jerusalén pani tëjini Cesareana co'ipi.

Co'ini ñatani pa̱i yo'oye ne de'hua hue̱'ñana sani ja'runi ñu'i Pablote dajë̱'ë,

cua̱ñepi.

7 Cua̱ñeina darena,

Israel pa̱i Jerusalén daisicohua'ipi jaiye co'aye yo'osiquë api cahuë.

Ja̱je i̱ohua'i sa̱ñope caye pa'iquëta'are i̱ yo'ose'ere i̱ñojë quëayere pa̱huë.

8 Pa̱jëna,

Pablopi sa̱ñope i̱ohua'i cayere caquë capi:

“Co'aye ti yo'oma'quë a'ë,

yë'ë.

Judío pa̱i cua̱ñese'ere sa̱ñope yo'oma'quë a'ë,

yë'ë.

Maija'quëre se̱ huë'eje̱ sa̱ñope yo'oma'quë a'ë,

cui'ne romano pa̱i ëjaëreje̱ sa̱ñope yo'oma'quë a'ë.”

9 Caquëna,

Israel pa̱ipi sihuaja̱jë cuasaquë Festopi Pablote se̱ji'i:

“¿Jerusalénna saiye yëma'quë?

Ja̱rona yë'ëpi më'ëre sa̱ñope case'e ne de'huaja̱'quëre se̱ji'i.”

10 Se̱ina,

Pablopi capi:

“Romano pa̱i ëjaëpi pa̱i yo'ose'e asani ne de'hua hue̱'ña'ë,

i̱ño.

Yë'ë tayose'e pa'ito ne de'hua hue̱'ñare pa'iyë.

Tsoe më'ëpi yë'ë quëaye asahuë,

judío pa̱ire sa̱ñope co'aye yo'oye pa̱se'e.

11 Yë'ëpi ai co'aye yo'osiquë pa'ito huani je̱oñe de'oji,

ju̱'iñe pa̱si'i cama'ë pa'iyë.

Ja̱je pa'iquëta'are yë'ëre sa̱ñope cayepi nuñerepa yo'ose'ere pare caye peoto,

yë'ëre te'ije̱ ja̱ohua'ina i̱si ti̱'añe peoji.

Ja̱je pa'ina,

se̱ñe romano pa̱i ëjaëre papi yë'ë tayose'e pa'ito asani ca de'huaja̱quë.”

12 Caëna,

Festopi i̱te co̱cohua'ire sa̱'ñe coca cani cuasani Pablote caëña:

“Romano ëjaërepa quë'rona saiye se̱to ja̱rona saiye pa'iji.”

13 Casiquëpi pa'ina,

ëjaë Agripa i̱ paco Berenice co̱ni Festore pëpañu'u cajë Cesareana dateña.

14 Dani pa'ijëna,

Festo ja̱ohua'ire quëapi.

Pablo tse̱a cua̱ñosiquë pa'iye quëaquë capi:

“Te'i ë̱më Felix cosiquë i̱ño pa'iji.

15 Jerusalénre pa'ina,

Israel pa̱i ëjaohua'ipi cui'ne Israel pa̱i aiohua'ipi Pablote sa̱ñope coca quëajë i̱te huaijë̱'ë.”

16 Cajëna,

yë'ë cahuë:

“Romano pa̱i ëjaohua'i cato te'ire pa̱ire coa huëoni ja̱ asama'pë huani je̱oñena cua̱ñema'cohua'i a'ë.

Ja̱je yo'oma'pë i̱ti ca cua̱ñoquëni i̱te sa̱ñope cacohua'ini sa̱ñoperepa ñaquë i̱ohua'i sa̱ñope i̱te cayere sa̱ñope i̱ohua'ire sehuoyere i̱sicohua'i a'ë,

caquë quëaja̱quë cajë.

17 Ja̱je pa'ina,

Israel pa̱ipi i̱ñona datena,

ñatasi mu'sepi pa̱i yo'ose'ere ne de'hua hue̱'ñare ñu'i Pablote dajë̱'ë,

cua̱ñehuë.

18 Cua̱ñeina,

i̱re sa̱ñope cacohua'ipi quëahuë.

Ai co'aquë ai co'aye yo'osiquë api,

caja̱'cohua'i a'ë,

cuasaquëta'are.

19 Coa Israel pa̱i aiohua'i case'ere yo'oma'quë api,

cahuë.

Cui'ne yequë Jesús cocare ja̱re cahuë.

Jesús ju̱'isiquëpi huëni huajëquë api,

caquë api Pablo.

20 Ja̱ mañase'e cajëna,

me yo'oja̱'quë a'ni,

cuasaquë Pablote se̱i'ë.

Jerusalénna saiye de'oma'quë,

ja̱rona asani ne de'huaye,

de'oma'quë cahuë.

21 Caquëna,

Pablopi romano ëjaëpi ne de'huaye pa'iji,

caquë api.

Caquëna,

de'oji i̱ñore cosiquë pa'ijë̱'ë cahuë.

Yequë mu'seña jëjo saosi'i,

romano ëjaërepa quë'rona,

cahuë.”

22 Caquëna,

ëjaë Agripapi Festore caëña:

“Yë'ëje̱ i̱pi caquëna,

asasi'i.”

Caquëna,

Festopi capi:

“Ñamina'a i̱te asa'ñe pa'io.”

23 Ñataquëna,

ai de'o ca̱ña su̱ñasicohua'ipi ëjaë Agripa i̱ paco co̱ni,

jo'yaohua'i co̱ni pa̱i yo'ose'e asa tu'rihuëna cacareña.

Ja̱ro soldado ëjaohua'ipi cui'ne Cesarea daripë ëjaohua'ipi tsi'sireña.

Cacarena,

Festopi Pablote dajë̱'ë,

cua̱ñeiña.

24 Festopi cua̱ñequëna,

dareña.

Dani caëña:

“Ëjaë Agripa cui'ne si'aohua'i asajë̱'ë.

Si'a Israel pa̱i Jerusalén acohua'i cui'ne i̱ño acohua'i Pablote huaiye pa'iji,

ca jujama'cohua'i a'ë.

25 I̱ yo'ose'ere asani i̱te huaiye peoji,

cuasahuë.

Pablopi yë'ë yo'ose'ere ëjaërepa Augustopi ne de'hua'ñe pa'i api,

caquëna,

ja̱rona jëjo saosi'i,

cuasahuë.

26 ¿Ja̱je pa'ina,

co'aye yo'oma'quëni me toyaye'ni,

mai Ëjaëre?

cuasaquë Pablote dahuë,

i̱ño.

Më'ëpi i̱te asani quëajë̱'ë,

mai Ëjaëre toya ja̱'ñe.

27 ¿I̱ co'aye yo'ose'ere huesëquë me cosiquëre jëjo saoye'ni,

mai Ëjaë quë'rona?”