Pablopi Felixre Caye
24
Cinco mu'seña tëto sai maca Maija'quë huë'e ñacaicohua'i ëjaërepa Ananíaspi cui'ne aiohua'i co̱ni daë'ë.
Daijëna,
cui'ne i̱ti coca caquërepa Tertuloje̱ daji'i.
Ja̱ohua'i cato pa̱i ëjaë quë'rona daë'ë,
Pablote sa̱ñope cañu'u cajë.
2 Dani Felix quë'rona tsi'sijëna,
Pablote dahuë.
Darena,
Tertulopi sa̱ñope ca huëopi,
ñeje:
“Ëjaë Felix,
më'ëpi de'oquëpi iye yejaña ñacaina,
ai yo'oye peoyë.
Cui'ne më'ëpi de'oye cuasaquëpi cua̱ñequëna,
yëquë pa̱i si'aohua'i ai jerepa de'oye pa'iyë.
3 Si'a hue̱'ña më'ëre de'oye cayë.
Yëquë romano Ëjaë më'ë Felix ai jerepa pa'i.
Ja̱je pa'ina,
ai sihuayë.
4 Më'ëpi tsoe cajëna,
ai yo'oma'quë cuasajë a'ri maña cañu'u yëquë cuasajë daise'e asacaijë̱'ë,
yëquëre.
5 Iquë ti̱ro saicohua'i Nazareno hue'yosicohua'i ëjaëpi ai jo̱sa yo'oquë api.
Si'a hue̱'ña Israel pa̱ire yequere ye'yaquë cuniroja̱i quëapi,
yequë tsëcapë̱a nequë.
6 Ja̱je pa'ipi Maija'quë huë'e de'oconi si'si nesi'i caquë yo'oquëna,
ñani i̱te tse̱ahuë,
yëquë cua̱ñese'e cayeje̱ pa'ye ne de'huañu'u,
cajë.
7 Ja̱je yo'ojëna,
Soldado pa̱i ëjaë Lisiaspi dani ai tutu jio dani Pablote sapi.
8 Sani Pablote sa̱ñope yo'ocohua'ire cua̱ñepi,
më'ë quë'rona sani quëaye pa'iji caquë.
Yure më'ëpi Pablote se̱ni asajë̱'ë.
Se̱ni asani si'aye yëquë caye nuñerepa sa̱ñope caye a'ë asaja̱'quë a'ë,
më'ë.”
9 Caquëna,
si'a Israel pa̱i nuñerepa caji,
cahuë,
i̱ti maca pa'icohua'i.
10 Cajëna,
romano pa̱i ëjaëpi yure caye pa'iji,
caquë jë̱tëpi i̱ñoquëna,
Pablopi ca huëopi:
“De'oji sihuayë,
tsoe o̱metëcana ëjaë pa'i Israel pa̱i yo'oye asani ne de'huaquëpi asaquëna,
yë'ë yo'ose'ere sa̱ñope sehuoye pa'ina.
11 Coa doce mu'seña pa'iji,
Jerusalénna yë'ë ti̱'ase'e Maija'quëre se̱si'i caquë.
12 Ti̱'asiquëpi pa'i te'ireje̱ sa̱ñope caye pa̱huë.
Jai pa̱i tsi'sini jo̱sa yo'oja̱jë caquë ca huëoyeje̱ pa̱huë.
Maija'quëre se̱ huë'ere pa'i tsi'si huë'ere jai daripëre jo̱sa yo'oye pa̱huë.
13 Yë'ë co'aye yo'oma'ë pa'isiquëre ja̱ohua'i me i̱ñoja'cohua'i a'ni,
më'ëre.
14 Nuñerepa quëasi'i.
Maija'quëre sehuoyë,
ja̱ohua'i ti̱ro sai ma'a'ë cacore.
Maija'quë yëyere yo'oquë pa'iyë.
Si'aye Maija'quë coca toyapë,
Moisés cua̱ñese'e,
Maija'quëre quëacaicohua'i toyase'e si'aye nuñerepa case'e a'ë,
cuasani sehuoyë.
15 Ja̱ohua'i cuasayeje̱ yë'ë cui'ne cuasayë,
yequë mu'seña Maija'quëpi ju̱'isicohua'ire huëoja̱'quë api,
de'ocohua'ire cui'ne co'acohua'ire.
16 Si'a mu'seña Maija'quëpi yë'ëre ñaquëna,
cui'ne pa̱ipi yë'ëre ñajëna,
asani nuñerepa de'oye yo'osi'i caquë ai yo'oyë.
Ja̱je pa'ina,
Maija'quëre ca'raye pa̱ñë,
pa̱ireje̱.
17 Tsoe o̱metëca yequë pa̱i darire pa'isiquëpi i̱ño yë'ë quë'rona co'ihuë.
Co'ini ti̱'ani peocohua'ire co̱casi'i cui'ne Maija'quëre i̱sisi'i caquë Maija'quë huë'ena cacahuë.
18 Cacani Moisés cua̱ñese'e yo'oni si'sire cuya to̱siquë pa'ina,
Asia acohua'i Israel pa̱i acohua'i yë'ëre ñahuë,
jai pa̱i ja̱'re pa'iye pa̱quëna,
cui'ne jo̱sa yo'oma'ë pa'ina.
19 Yë'ë sa̱ñope case'e pa'ito,
yë'ëre ñasicohua'ipi dani caye pa'iji.
20 Judío pa̱i yo'ose'ere asani ca tëji ëjaohua'i tsi'si hue̱'ñare pa'i maca yë'ë co'aye yo'ose'ere ti̱'asicohua'i pani,
icohua'i iye maca pa'icohua'ipi sa̱ñope caja̱jë.
21 Yë'ë te'erepa i̱ohua'i ja̱'re pa'i maca tutu cahuë,
ñeje:
Ju̱'isicohua'i huëiye pa'iji asa do'ire yure mësaru yë'ëre sa̱ñope yo'oye cahuë,
co'aye case'e pani ja̱se'e pati'ñe pa'io.”
22 Ja̱je caquëna,
Felixpi Jesure sehuocohua'i pa'iyere asaquëpi capi:
“Soldado ëjaë Lisiaspi daquëna,
nuñerepa asasi'i mësaru yo'ojë caye.”
23 Cani Capitánre cua̱ñepi Pablote coma'ë ñajë'ë.
I̱ cajeohua'ipi dani i̱te co̱caija̱'cohua'i a'ë.
Ja̱ohua'i cacaye de'oji,
capi.
24 A'ri maña tsoe mu'seña pa'i maca Felixpi cui'ne i̱ paco Drusila co̱ni daji'i.
Ja̱o cato Judía pa̱io paco'ë.
Felixpi dani Pablore quërëja̱ijë'ë,
caquë cua̱ñeina.
Quërëja̱tena,
dani Jesucristore sehuoni pa'iyere Pablopi quëaquëna,
asapi.
25 Asaquëna,
Pablopi nuñerepa pa'iyere cui'ne yëyere quëco saojë pa'iyere,
cui'ne yequë mu'se pa̱i ñape yo'ose'e ca de'hua ja̱'ñere quëaquëna,
asani Felixpi quëquëpi.
Quëquëni capi:
“Saijë̱'ë,
yure cato yequë mu'se më'ëre soini asasi'i.”