“Maija'quë do'ijë,

iye macaja̱'a Maija'quë ña hue̱'ña yë'ë ai cuasaquë co'a ju̱'i pa'iye pa̱ñë.”

2 Caquëna,

Ananíaspi Maija'quë huë'e ñacaicohua'i ëjaëre papi Pablore ja'ye nëcacohua'ire capi:

“Yë'opona tëtojë̱'ë.”

3 Cua̱ñequëna,

Pablopi i̱te capi:

“Më'ëni coa caquëre Maija'quëpi tëtoja̱'quë api,

më'ë cato Moisés cua̱ñese'epi yë'ë yo'ose'ere asani ne de'huaja̱'quëpi ja'rusiquëpi ñu'iñë,

ja̱ maca.

Ja̱je pa'ita'a ¿me yo'oquë tëtojë̱'ë,

cua̱ñequë'ni?

Ja̱je cani më'ëpi Moisés cua̱ñese'ere sa̱ñope yo'oyë.”

4 Caquëna,

i̱ti maca nëcacohua'ipi i̱te cahuë:

“¿Maija'quë huë'e ñacaicohua'i ëjaëre pare pë̱i sa̱ñope caquë?”

5 Cajëna,

Pablopi capi.

“Do'ijë ëjaëre huesëquë cahuë.

Ëjaëpi asani ja̱je caye pa̱ra'huë.

Maija'quë toya pëpë caji:

‘Pa̱i ëjaëre pë̱i sa̱ñope cama'ë pa'ijë̱'ë.’ ”

6 Cani ja̱ jeteyo'je,

Israel pa̱i yo'oye asani ca tëjicohua'i acohua'ipi saduceo pa̱i cui'ne fariseo pa̱i pa'iyë asani,

Pablopi tutu capi:

“Do'ijë,

yë'ë fariseo'ë.

Fariseo tsëcapë aquë a'ë.

Ju̱'isicohua'i huëiye pa'iji cuasa do'ire tse̱a cua̱ñosiquë pa'iyë.”

7 Ja̱je caëna,

fariseohua'ipi,

saduceohua'i ja̱'re sa̱ñope yo'ojë cajë caya tsëca huahuë,

tsi'sisicohua'ipi.

8 Saduceohua'i cato ju̱'isicohua'i huëiye pa̱ñë,

cui'ne hui̱ñaohua'ije̱ peoyë,

cui'ne joyoje̱ peoyë cacohua'i a'ë.

Ja̱je pa'iquëta'are fariseohua'ipi ju̱'isicohua'i huëiye pa'iji,

cui'ne hui̱ñaohua'ije̱ pa'iyë cui'ne joyoje̱ pa'iji cuasacohua'i a'ë.

Ja̱je pa'ina,

sa̱ñope cahuë.

9 Ai cuijë yo'ojë cajëna,

fariseo acohua'i cua̱ñese'e ye'yacohua'i huëni nëcani cahuë:

“Iquë co'aye yo'ose'e peoji.

Ja̱je pa'ina,

joyopi quëaquëna,

pa̱nita'a hui̱ñaëpi quëaquëna,

casiquëni huesëjë yo'ojë Maija'quëni sa̱ñope yo'oye pa'ini,

cuasayë.”

10 Cajëna,

ai jerepa sa̱ñope yo'ojëna caye paji'i.

Pa'ina,

Coronelpi Pablote yo'ojë huani je̱o ma'ñe caquë ca'raquë i̱ soldado pa̱ire quërëja̱ija'cohua'ire jëjë saopi.

Ja̱ohua'ipi dani etoni soldado pa̱i huë'ena cui'naëni saja̱jë caquë.

11 Se na'isi ñami mai Ëjaëpi ñai nëcani Pablote capi:

Tutu hue'ejë̱'ë,

yo'o jujahuë cuasama'ë.

I̱ño Jerusalén yë'ë coca quëase'eje̱ pa'ye cui'ne quëaye pa'iji,

Roma daripëna yë'ë coca.

12 Ñatasi mu'se Israel pa̱i acohua'ipi Pablote huañu'u cuasa nëohuë.

Cuasani,

Pablote huaima'pë pani a̱iñe cui'ne u̱cuye peoji,

ca nëo huesohuë.

13 Ja̱je,

ca nëosicohua'ipi cuarenta pa̱i jerepa paë'ë.

14 Ja̱ohua'ipi sani Maija'quë huë'e ñacaicohua'i ëjaohua'ire cui'ne Israel pa̱i aiohua'ire quëahuë:

“Yëquëpi Pablote huaima'pë a̱tu yëquëna co'ayepi to̱mejaquë cahuë.

15 Ja̱je pa'ito yure mësarupi cui'ne Israel pa̱i yo'oye asani ca tëjicohua'ipi soldado ëjaëre se̱jë'ë,

Pablote ñamina'a ti̱jupë darena,

yeque dahuëre se̱ni asañu'u pa'iji cajë.

Cajë se̱tena,

dajëna,

yëquë utecohua'ipi i̱te tsi'si hue̱'ña ja̱ ti̱'ama'ëna,

huani je̱oye pa'iji.”

16 Ja̱ ca nëose'ere Pablo yo'jeo mamaquëpi asani soldado daripëna cacani Pablote quëapi.

17 Quëaquëna,

asani Capitánre te'ire soini i̱te capi:

“Iquë po̱sëre sajë̱'ë,

më ëjaë Coronel quë'rona,

i̱te quëaye paji.”

18 Caëna,

capitánpi po̱sëre soldado ëjaë quë'rona sani capi:

“Pablo cosiquëpi yë'ëre soini iquë po̱sëre më ëjaë quë'rona sajë̱'ë.

Quëaye paji,

se̱ji'i,

yë'ëre.”

19 Caquëna,

soldado ëjaë pa̱i peo hue̱'ñana tsihua'ëre jë̱tëna tse̱ani sani te'ire se̱ji'i:

“¿I̱quere quëaja̱'quë a'ni,

yë'ëre?”

20 Caquëna,

tsihua'ëpi capi:

“Israel pa̱i acohua'ipi te'e ja̱je yo'oñu'u cuasasicohua'ipi më'ëre se̱ja'cohua'i a'ë,

ñamina'a Pablote saja̱quë cajë ca tëji ëjaohua'i ña hue̱'ñana,

ai dahuërerepa i̱ yo'ose'e se̱ni asañu'u cajë cayeje̱ pa'ye caja̱'cohua'i a'ë,

coa yequere cuasajë.

21 Ja̱je se̱to sehuocaima'ë pa'ijë̱'ë.

Cuarenta pa̱i jerepa catini uteyë,

Pablote huani je̱oma'pë pani a̱iñe cui'ne u̱cuye pa̱ñu'u ca huesësicohua'ipi.

Ja̱ohua'ipi yure cui'ñani uteyë,

coa më'ë sehuoyese'e uteyë.”

22 Caquëna,

soldado ëjaëpi tsihua'ëre yureta'a yecohua'ire quëama'ë pa'ijë̱'ë yë'ëre quëase'e cani jëjo saopi.

23 Soldado pa̱i ëjaëpi cayaohua'ire i̱ Capitán acohua'ire soini iye ñami a las nueve pa'i maca Cesareana saiyeque pa'iji ne de'huajë̱'ë docientos soldado pa̱ire yeja saija̱'cohua'ire,

setenta caballoja̱'a saija̱'cohua'ire,

cui'ne docientos uitu saja̱'cohua'ire,

caquë cua̱ñepi.

24 Cui'ne Pablo ñu'i saija̱'quëre caballore ne de'huajë̱'ë,

ëjaë Felix quë'rona huajëquëre jëasiquëni de'oye ñacaijë sacaijë̱'ë,

cua̱ñepi.

25 Ja̱ohua'i ja̱'re co̱ni toyasicore jëjo saopi.

Toyase'e cato caji:

26 “Romano ëjaë jerepa pa'i,

më'ëre pëpayë.

Yë'ëpi Claudio Lisiaspi.

27 Israel pa̱ipi iquëre Pablote tse̱ani huani je̱oñu'u cajë yo'ojëna,

yë'ëpi romano api asani yë'ë soldado pa̱i ja̱'re sani i̱te huasohuë.

28 Israel pa̱i i̱te sa̱ñope case'ere asasi'i caquë ja̱ohua'i ëjaohua'i tsi'si hue̱'ñana Pablote sahuë.

29 Sani asaquëna,

Pablopi i̱ohua'i cua̱ñese'e cayere yo'oma'ë ti̱ñe yo'o do'ire sa̱ñope caye pa'iji.

Ja̱je pa'ina,

huani je̱oñe peopi,

i̱te.

Cui'ne co'acohua'ire co hue̱'ñana coyeje̱ peopi.

30 Ja̱je pa'iquëta'are judío pa̱ipi huani je̱oñu'u cuasajë yo'oyere asa ti̱'ani iquëre më'ë quë'rona jëjo saoyë.

Jëjo saoquë cui'ne i̱te sa̱ñope yo'ocohua'ireje̱ se̱i'ë,

më'ë asa hue̱'ñana sani i̱te sa̱ñope payere cajë̱'ë,

caquë.

Ca tëjihuë.”

31 Ja̱ maca soldado pa̱i i̱ti cua̱ñese'eje̱ ñami saijë Pablote Antípatris daripëna sahuë.

32 Ñatasi mu'se soldado pa̱i quë̱o saicohua'ipi huë'ena co'ihuë.

Co'ijëna,

caballo saicohua'ise'e Pablo ja̱'re co̱ni saë'ë.

33 Ñatasi mu'se Cesareana ti̱'ani toya ja'hua romano ëjaëna i̱sijë cui'ne Pablote i̱sihuë.

34 I̱sirena,

toya ja'hua se̱ña tëjini Pablote se̱ji'i:

¿I̱que yeja aquë a'ni?

Se̱ina,

Cilicia yeja aquë a'ë capi.

Caquëna,

asani,

35 capi:

“Më'ëre co'aye cacohua'ipi datena,

më'ëre asasi'i.”

Ja̱je caquë Herodes huë'ena iquëre sani de'hua ñajë'ë,

capi,

Felix.