22
“A'yë dohuë,
cui'ne ja'quëohua'i asajë̱'ë si'aye quëasi'i,
mësarute.”
2 Ja̱je hebreo cocapi caquëna,
asani Pablo caye ai jerepa jo'cua je̱oni cama'pë asajëna,
capi:
3 “Yë'ë Israel pa̱i a'ë.
Cilicia yeja Tarso daripëna co̱asiquë a'ë.
Ja̱je pa'ipi iye daripë Jerusalénna ai de'ohuë.
Ai de'oquëna,
Gamalielpi yë'ëre ye'yapi,
mai aiohua'i cua̱ñese'ere si'aye.
Ye'yasiquëpi si'aye Maija'quë yëye yo'osi'i caquë de'hue yo'ohuë,
mësaru yo'oyeje̱ pa'ye cui'ne.
4 Jesús ye'yase'ere ë̱sequë i̱te sehuocohua'ire huani je̱osi'i caquë i̱te sehuocohua'ire tse̱ani si'seni co hue̱'ñana jëjo saohuë,
ë̱mëohua'ire cui'ne nomiohua'ire.
5 Maija'quë huë'e ñacaicohua'i ëjaërepa cui'ne si'a Israel aiohua'i asayë.
Yë'ë ja̱je yo'ose'e,
ja̱ohua'ipi Damasco acohua'ina Israel pa̱ina toyani jëjo saohuë,
Jesure sehuocohua'ire co'equë tse̱ani i̱ño Jerusalénna dani si'seye pa'iji caquë.
Pablopi I̱ Sehuose'ere Quëapi
6 Ma'aja'a sai Damasco ti̱'añe ja'i maca pa'ina,
jopo mu'se ma'tëmopi ai miañerepa yë'ëna ju'api.
7 Ju'aquëna,
yejana to̱mehuë.
Ja̱ macapi asahuë,
yë'ose'e:
‘¿Saulo,
Saulo me yo'oquë yë'ëre jo̱sa yo'oquë'ni?’
8 Caquëna,
sehuohuë.
‘¿Ne a'ni ëjaë?’
cahuë.
Caquëna,
capi:
‘Yë'ë Jesu a'ë.
Nazaret aquë a'ë,
më'ë jo̱sa yo'oquë.’
9 Caquëna,
yë'ëre co̱cohua'i cato miañe ñajëta'a Jesús cayete asama'pë quëquësicohua'i pateña.
10 Pa'ijëna,
Jesús caquëna,
asani cahuë:
‘¿I̱quere yo'oja̱'quë a'ni,
Ëjaë?’
Caquëna,
mai Ëjaëpi capi:
‘Huëni Damascona saijë̱'ë.
Ja̱ropi më'ë yo'o ja̱'ñe quëaye pa'iji.’
11 Ai miañepi ju'a huesouna,
ñama'quë de'ohuë.
Yë'ëre co̱cohua'ipi jë̱tëre tse̱'ejë sahuë,
Damascona.
12 Ja̱rote Ananías Moisés cua̱ñese'e yo'oquëpi Damascore pëasiquëpi paji'i.
Ja̱ë cato ai de'oquë api,
si'aohua'i judío pa̱i cajëna,
pa'iquë paji'i.
13 Damascona ti̱'ani pëahuë.
Pëaëna,
Ananíaspi dani nëcaquë capi:
‘Saulo yë'ë yo'jei,
yure më'ëpi ñañe pa'iji.
Caquëna,
ñahuë,
i̱ti macapi.’
14 Ja̱ maca yë'ëre capi:
‘Mai aiohua'i Diusupi i̱ yëyere asaquë yo'oja̱quë caquë më'ëre jo'ya nepi,
nuñe pa'ini ñaquë cui'ne Jesús cayere asaquë yo'oja̱'quëni soipi.
15 Ja̱je pa'ina,
më'ë ñase'ere cui'ne asase'ere si'aohua'ire quëaye pa'iji.
Më'ë cato i̱ pa'iyere quëacaiquë pa'ija̱'quë a'ë.
16 ¿Yure me yo'oquë utequë'ni?
Huëni do cua̱ñojë'ë,
mai Ëjaë mamire cuasaquë më'ë co'aye yo'ose'e tsoa to̱siquë pa'iquë.’
Judío Pa̱i Peocohua'ire Quëaquë De'ose'ere Quëaye
17 Jeteyo'je Jerusalénna co'ini Maija'quëre se̱ huë'ena cacani Maija'quëni se̱i ca̱ni ñañeje pa'ye ñahuë.
18 Ñaquëna,
Ëjaëpi yë'ëre capi:
‘Esa Jerusalénpi etani saijë̱'ë.
Iye daripë pa'icohua'i yë'ë coca më'ë quëaye asacaiye pa̱ja'cohua'i a'ë.’
19 Caquëna cahuë:
‘Ëjaë,
me ja̱ohua'ire quëaye'ni,
tsoe ja̱ohua'ipi yë'ë më'ëre sehuocohua'ire judío pa̱i tsi'si hue̱'ñana sai tse̱aquë të'caquë cui'ne co hue̱'ñana coquë yo'ose'e asacohua'ire.
20 Cui'ne më'ë jo'yaë Estebanre huani je̱ojëna,
yë'ëpi huaicohua'i ca̱ña ñacai nëcaquë huaiye de'oji cuasahuë.
Si'a pa̱i asayë,
yë'ë yo'ose'e.’
21 Caquëna,
mai Ëjaëpi yë'ëre capi:
‘Saijë̱'ë.
So'ona jëjo saosi'i,
yë'ë cocarepa yequë pa̱ire quëaja̱'quëre,
Israel pa̱i peocohua'ini,’
capi.”
Coronel Yo'oye
22 De'oye iye ca macaja̱'a asa tëjini ai tutu cui huëohuë:
“Huajëquë pa'ito co'aji.
Me huajëquë pa'ija̱'quë.”
23 Ja̱je je̱oñe peoyerepa ai tutu cuijë pë̱ijë i̱ohua'i ju'i sara du'teni je̱ajë cui'ne ya'o ne'ñare ë̱mëje'ena je̱ajë yo'ohuë.
24 Yo'ojëna,
soldado huë'ena Pablore coni ca̱'ni mepi si'sejë̱'ë.
¿Si'sejëna,
quëaja̱quë i̱ co'aye yo'ose'e.
I̱quere yo'oquëna,
ai sa̱ñope caye'ni?
Asasi'i caquë cua̱ñepi,
Coronelpi.
25 Si'señu'u cajë hue̱ni yo'ojëna,
Pablopi Capitánre capi:
“Yë'ë yo'ose'e asama'pë si'seye peoji.
Cua̱ñese'e pa'iji,
yë'ë romano a'ë.”
26 Caquëna,
Capitánpi asani sani i̱ ëjaëre capi:
“Iquëre de'hua ñani yo'ojë̱'ë.
Romano api.”
27 Caquëna,
Coronelpi dani capi:
“Yë'ëre quëajë̱'ë.
¿Romano a'ë,
më'ë?”
Caquëna,
Pablopi capi:
“Jë̱jë'ë.”
28 Caquëna,
Coronelpi capi:
“Jaiye curiquë sa̱ini yë'ë romano pa̱i de'ohuë.”
Caquëna,
Pablopi capi:
“Yë'ë sa̱iñe pa̱huë.
Yë'ë cato tsi̱'nëna romano pa̱i a'ë.”
29 Caquëna,
si'señu'u cajë yo'osicohua'ipi i̱te je̱oni sateña.
Cui'ne Coronelpi romanore hue̱jë'ë cua̱ñesiquëpi quëquëpi.
Judío Pa̱i Ëjaohua'ire Pablo Case'e
30 Ñatasi mu'se Coronelpi Israel pa̱i Pablote sa̱ñope case'ere asasi'i i̱que do'ire sa̱ñope caye'ni caquë Maija'quë huë'e ñacai ëjaohua'ire cui'ne judío pa̱i yo'oye asani ca tëji ëjaohua'ire tsi'sopi.
Aiohua'ire tsi'soni Pablote quë̱na mea joyeni tsi'si hue̱'ñana daëña.