7 Tiropi Tolemaidana tsiaya saiye sani tëjini Maija'quë do'ijëre pëpani te'e mu'se i̱ti macana pëahuë,

i̱ohua'i ja̱'re co̱ni.

8 Ñatasi mu'se saicohua'ipi Cesareana ti̱'ahuë.

Ti̱'ani Jesús jëjo saocohua'ire co̱caicohua'i siete aquë Felipe huë'ena pëahuë,

de'o coca quëaquë huë'ena.

9 Ja̱ë Felipepi cuatro mamajëre nomi tsi̱re huejama'cohua'ire paquë paji'i.

Ja̱ohua'i cato yequë mu'se pa'i ja̱'ñere quëacohua'i paë'ë,

Maija'quëpi quëaquëna.

10 Ja̱ huë'ere tsoe mu'seña maña pa'ijëna,

daji'i,

Agabo Judeapi.

Ja̱ë cato yequë mu'se yo'o ja̱'ñere quëaquë paji'i.

11 Pa'ipi ti̱tani yëquë ña hue̱'ña Pablo të̱icore i̱ni jë̱ña cui'ne nëcañoa co'ye i̱ja'a hue̱pi,

hue̱ni capi:

“Ñeje iye të̱ica̱ paquëre hue̱ja'cohua'i a'ë,

judío pa̱ipi Jerusalénna ja̱ jeteyo'je ti̱ pa̱ina i̱sija̱'cohua'i a'ë,

i̱te.

Ja̱je caji,

de'o joyopi.”

12 Caquëna,

asani yëquë Pablote co̱cohua'ipi cui'ne ja̱ daripë sehuosicohua'ipi Jerusalénna saima'ë pa'ijë̱'ë,

cajë ë̱sehuë.

13 Ë̲sejë cajëna,

Pablopi capi:

“¿Me yo'ojë oiye'ni,

yë'ëre co'a ju̱'iñe'ni?

Yë'ë Jerusalénna ju̱'iñe de'oji,

hue̱siquëpi mai Ëjaë Jesús yëye yo'oto.”

14 Ja̱je caquë Jerusalénna sasi'i caquëna,

asani i̱te pëajë̱'ë caye je̱oni cahuë:

“Mai Ëjaë yëyeje̱ pa'ija̱quë.”

15 Ja̱ jeteyo'je co'amaña de'hua tëjini Jerusalénna saë'ë.

16 Saijëna,

Cesarea pa̱i sehuocohua'ipi yëquëre co̱ni saijë sahuë.

Sani ja̱ohua'ipi Jerusalénna ti̱'ani Mason huë'ena sahuë,

yëquë pëaja̱'tona.

Mason cato Chipre aquë paji'i,

ai tsoe Maija'quë coca sehuosiquë paji'i.

17 Jerusalénna ti̱'ajëna,

sehuocohua'ipi sihuajë yëquëre pëpahuë.

18 Pëparena,

ñatasi mu'se Pablo ja̱'re co̱ni Jacobo quë'rona do'i saë'ë.

Sa ti̱'ajëna,

ja̱rote cui'ne si'aohua'i sehuocohua'i ëjaohua'i paë'ë.

19 Pa'ijëna,

pëpa tëjini Pablopi si'aye quëapi,

judío pa̱i peocohua'ire quëaroja̱ina,

Maija'quëpi ja̱ohua'ire necaise'ere.

20 Quëaquëna,

asani Maija'quë ai de'oji cani Pablore cahuë:

“Maija'quë do'iquë,

de'oji më'ëre quëañu'u.

Jai pa̱i Israel pa̱i sehuosicohua'i pa'iyë,

i̱ño.

Ja̱ohua'i cato Moisés cua̱ñese'ere yo'oye pa'iji cacohua'i a'ë.

21 Ja̱je cacohua'ipi asayë më'ëpi judío pa̱i yequë pa̱i quë'ro pa'icohua'ire Moisés cua̱ñese'ere yo'oma'pë caquë cui'ne ca̱'nije tëama'pë pa'ijë̱'ë caquë,

cui'ne aiohua'i yo'ose'e yo'oma'pë caquë ye'yaji asayë.

22 Ja̱je asacohua'ipi më'ë i̱ño daise'e asaja̱'cohua'i a'ë.

¿Ja̱je pa'ito me neja'cohua'i a'ni?

23 Iyese'e më'ë yo'oye pa'iji cuasajë,

i̱ñore cajese'e pa'i ë̱mëohua'i pa'iyë i̱ohua'i Maija'quëre ca nëose'ere yo'oja̱'cohua'i.

24 Ja̱ohua'i ja̱'re sani Moisés cua̱ñese'ere yo'oquë ja̱ohua'i ja̱'re te'e si'sire tsoa to̱jë'ë,

nañare tëa cua̱ñoquë.

Cui'ne më'ëpi ja̱ohua'i tëa cua̱ño do'ije̱ sa̱icaijë̱'ë.

Ja̱je yo'oquëna,

si'aohua'i ñani më'ëre sa̱ñope case'e coa case'e a'ë cuasaja̱jë,

Moisés cua̱ñese'ere sehuocai më'ëje yo'oquëna,

ña jujani.

25 Tsoe toyahuë,

yëquë cuasase'e judío pa̱i peocohua'ipi sehuosicohua'i yo'o ja̱'ñe.

Ja̱ohua'i cato yo'oye pa'iji,

a̱iñe peoji de'huasi diusuna i̱sisihua'i.

Tsieje̱ a̱iñe peoji,

cui'ne quio hue̱asicohua'ire a̱iñe peoji.

Huejama'cohua'ipi ë̱mëre nomiore yo'oye peoji.

Ja̱je toyahuë.”

26 Ja̱je casi maca Pablopi cuatro ë̱mëohua'ire sapi.

Sani ñatasi mu'se i̱ohua'i ja̱'re te'e si'sire cuya to̱ni Maija'quëre se̱ huë'ena cacapi,

i̱ohua'i ca nëosi mu'se ti̱'aja'a mu'se quëasi'i caquë.

Ja̱je cani cayë,

pa̱i ñape Maija'quëre coa i̱siyere daja̱'a mu'se ti̱'aëna yo'o ja̱'ñere.

27 Je̱'në siete mu'seña sa tëto saiye ja'i maca pa'ina,

Asia yeja acohua'ipi Israel pa̱ipi Maija'quëre se̱ huë'ere Pablo pa'ina,

ñani pa̱ire ca huëohuë.

Ca huëojë Pablo quë'rona sa to̱mejaë'ë,

28 tutu cuijë:

“Israel pa̱i co̱caijë̱'ë.

Iquëpi si'a hue̱'ña cu'i maire sa̱ñope caquë ye'yaquë cui'ne Moisés cua̱ñese'e cui'ne iye huë'e sa̱ñope caquë ye'yaquë.

Ja̱je pa'ipi yure Maija'quë huë'ena griego pa̱ire dapi,

iye de'o huë'ere si'si necai,

cahuë.”

29 Ja̱je cahuë,

Pablopi Efeso aquë Trófimo ja̱'re co̱ni Jerusalénre pa'ina,

ñasicohua'ipi,

judío pa̱i peocohua'i ja̱'re co̱ni Maija'quë huë'ena cacapi cuasajë ja̱je cahuë.

30 Ja̱je yo'ojëna,

si'a ja̱ daripë pa'icohua'i asani pë̱ijë tsi'sini Pablote tse̱ani hue'sena quërëjë sahuë.

Hue'sena quërë etoni,

Maija'quë huë'e eta sa'noa si̱'ñe saohuë.

31 Pablote ja̱ maca huani je̱oñu'u cajë yo'ojëna,

yecohua'ipi soldado pa̱i ëjaëre Coronelre,

si'a Jerusalén acohua'i ai jo̱sa yo'oyë,

quëahuë.

32 Quëarena,

Coronelpi asani i̱ soldado pa̱i ja̱'re co̱ni i̱ti yo'o hue̱'ñana huë'huëhuë.

Huë'huë ti̱'ajëna,

ñani Pablote huaiye je̱ohuë.

33 Ja̱ maca Coronelpi ti̱'ani i̱ soldadore cua̱ñepi.

Pablote tse̱ani caya quë̱na meapi hue̱jë'ë caquë ja̱ maca Pablote se̱ji'i:

“¿I̱que mami a'ni?”

caquë,

cui'ne “¿i̱quere yo'oquëna,

më'ëre sa̱ñope yo'oye'ni?”

caquë.

34 Se̱ina,

yecohua'ipi ai tutu cajëna,

yecohua'ipi yequere tutu ai cajëna,

asama'ë soldado daripëna sajë̱'ë,

cua̱ñepi.

35 Cua̱ñeina,

sacohua'ipi je̱'nërepa soldado pa̱i daripë mëicona ti̱'ani soldado pa̱ipi coa cua̱ijë sahuë,

Pablote huajo yëcohua'ipi ai jo̱sa yo'o do'ire.

36 Sajëna,

jai pa̱i tutu cuihuë:

“I̱te huaijë̱'ë”.

37 Sajëna,

soldado huë'e caca maca Pablopi Coronelre capi,

griego cocapi:

“A'ri maña më'ëre casi'i.”

Caquëna,

soldado ëjaëpi capi:

“¿Më'ë griego cocare caquë aë?

38 Më'ë pa'ima'quë Egípto pa̱i ëjaëre sa̱ñope yo'oquëpi,

cuatro mil ë̱mëohua'i huaicohua'i ja̱'re co̱ni pa̱i peo hue̱'ñaja'a saisiquë.”

39 Caquëna,

Pablopi capi:

“Pa̱ni,

yë'ë cato Israel pa̱i a'ë.

Cilicia yeja Tarso daripë aquë a'ë.

Ja̱je pa'ina,

më'ëre se̱ñë,

ja̱ohua'ire coca casi'i.”

40 Caquëna,

de'oji,

caëna.

Caquëna,

Pablopi soldado huë'e mëiconi nëcaquë jë̱tëpi ja'jëquëna,

ñani coca caye je̱orena,

Pablopi hebreo cocapi capi,

Israel pa̱ire: