3 Ñatasi mu'sepi Sidón yo sa'rona ti̱'ahuë.

Ja̱rona ti̱'arena,

Juliopi de'oye yo'oquë Pablo cajeohua'ipi necaija̱jë cuasaquë Pablote eto saoquëna,

sani i̱ cajeohua'ire,

pëpaquë yo'opi.

4 Tutu ju'ama' të'huija̱'a Sidónpi saicohua'ipi ai tutu sa̱ñope ju'a do'ire Chipre saodohuë yë'quë macaja̱'a saë'ë.

5 Saicohua'ipi Cilicia yeja cui'ne Panfilia yeja je̱'ñerepa sa sani Mira daripëna ti̱'ahuë.

Mira cato Licia yeja daripë aco paji'i.

6 Ja̱rona Capitánpi yequë jai yohuë ti̱'api,

Alejandría daripëpi daisiconi.

Ja̱ yohuëpi Italia yejana saija̱'coni asani Capitánpi aya mëijë'ë,

cua̱ñepi.

Cua̱ñeina,

aya mëteña.

7 Tutu sa̱ñope ju'a do'ire dahuëre saë'ë,

ai tsoe mu'seña.

Ai yo'ojë Gnidona ti̱'ahuë.

Ai tutuquëna,

jerepa saiye co'api.

Co'aquëna,

Creta saodohuë tutu ju'ama'a të'huija̱'a të'ija̱ni saë'ë,

Salmón daripë je̱'ñere paja̱'a.

8 Të̱'tëpaja̱'a saijë ai yo'ojë De'o Yo Sa'ro hue'yosi yo sa'rona ti̱'ahuë,

Lasea daripë quë'rona.

9 Tsoe ne huesëni yo'oroja̱iñe sëte ai huajëya'ye nëji'i,

ja̱ yë'ta'api yohuëja̱'a saiye tsoe je̱'nërepa oco tëcahuë ti̱'añe sëte.

Ja̱je pa'ina,

asaquë Pablopi yëhuoquë capi:

10 “Ë̲mëohua'i yohuëja̱'a mai saini ai yo'oja̱'cohua'i a'ë,

si'aye mai saye,

cui'ne yohuë nejoja'cohua'i a'ë,

cui'ne maije ju̱ti'ñe pa'iohua'i a'ë.”

11 Caquë yëhuoquëna,

Capitánpi sehuocaiye pa̱quë coa asa to̱pi,

Pablo caye.

I̱ti yohuë paquë cayere cui'ne yohuë quëhuiquë cayere sehuocaji'i.

12 Ja̱je pa'ina,

si'aohua'i cuasahuë iye yo sa'ro cato co'aji oco tëcahuë pëani tëto saiye.

Sañu'u,

Fenicena ë̱së du'ina ti̱ñarepa ña sa'rona.

Ja̱rona oco tëcahuë jëañu'u,

cuasahuë.

13 Ja̱je cuasajëna,

huë'ehuë te̱'tepi a'ri ja'ye tutu ju'aquëna,

saiye de'oji cuasajë yohuë dëquëye ne huahuase'e naë mëa saoni ayani saë'ë,

Creta të̱'tëpaja̱'a.

14 Saijë pa'i maca ë̱mëje'e të'hui jai tuturepa daiyepi dani yohuëre tutu sao.

15 Tutu saocona,

sa̱ñope yo'o jujarena,

tutupi quëconi sao.

Sacona,

i̱o jëjo saoyeje̱ saë'ë.

16 Saicohua'ipi te'e a'ri saodohuë Clauda hue'eco jeteyo'jena ti̱'ahuë,

ai tutuma'tona ti̱'ani.

Ja̱rona ai yo'ojë a'ri yohuë pa̱ire huaso yohuë ayahuë.

17 Aya tëjini jai yohuë joima'coni cuasajë jai yëi meapi hue̱huë yohuë,

cui'ne a̱'ji mejahuëana Sirte hue'eyena ju'a huesë ma'ñe cajë ca'rajë dëquëyere jopoja̱'a je̱a dëso neñahuë,

yohuëpi ju'aye pa̱jaco cajë.

Ja̱je yo'oni coa huahuajë tutu sao cua̱ñohuë.

18 Ñatasi mu'seje̱ ai tutuquëna,

ña jujani i̱ti saicohua'ipi yohuë sayere tsiayana moe dëso huëohuë.

19 Toaso̱ mu'se acona yureta'a i̱ohua'i jë̱ñare papi ñajë je̱a dësohuë,

yohuë pa'ise'e.

20 Ai tsoe mu'seña ë̱sëre cui'ne ma'ñocore ñama'pë pa'ijë cui'ne ai tutu ju'aquëna,

tutu sao cua̱ñojë yureta'a ti ne huesëre pahuë cuasahuë.

21 Ai tsoe a̱ima'pë pa'iye sëte,

Pablopi si'aohua'i jopona huëni nëcani capi:

“Yë'ë Cretana pëañu'u caye asani sehuocaisicohua'i pa'ito de'ora'pi.

Ja̱rona pëasicohua'i pani si'aye iye ai yo'oye pa̱ra'huë.

22 De'oji,

yure ai cuasama'pë,

tutu mañare hue'ejë̱'ë,

si'aohua'i mësaru huajëja̱'cohua'i a'ë,

yohuëse'e ne huesëtoje̱.

23 Yë'ë pacacai necaiquëpi Maija'quëpi iye ñami i̱ hui̱ñaëre jëjo daouna,

dani capi,

ñeje:

24 ‘Pablo ca'rama'ë pa'ijë̱'ë,

César quë'rona saiyeque pa'iji.

Ja̱je pa'ina,

më'ë i̱ño pa'i do'ire Maija'quëpi si'aohua'ire më'ë ja̱'re yohuë pa'icohua'ire huasoja̱'quë api,

ju̱'iñere.’

25 Ja̱je pa'iye sëte ëjaohua'i tutu mañare hue'ejë̱'ë,

yë'ë cato Maija'quëpi i̱ case'eje̱ ñacaija̱'quë api cuasayë,

cui'ne hui̱ñaë quëase'eje̱ pa'ye pa'ija̱'coa cuasayë.

26 Mai cato saodohuëna yohuëse'e ju'a huesëcona,

tu̱masicohua'i pa'ija̱'cohua'i a'ë.”

27 Tutupi tutu saosicohua'ipi jai a̱si tsiaya Adríaticore huahuahuë,

jopo ñami pa'i maca,

catorce mu'seña pa'i maca ja̱ maca,

ñami jopo pa'i maca yohuë ñajë sacohua'ipi je̱'nërepa yeja ti̱'añë cuasahuë.

28 Asani hua̱iñere cue̱cuejëna,

treinta y seis metros paji'i,

hua̱iñe.

Pa'ina,

ai se̱ña maca sani ti̱jupë cue̱cuejëna,

veintisiete metros paji'i.

29 Pa'ina,

jai quë̱na pë̱ana ju'a huesë ma'ñe cajë ca'rajë yo sëtipëja̱'a cuatro quë̱na ca'huanoa je̱o dësohuë,

i̱ti dëquëco naupa ja̱'ñere.

Yo'ojë esa ñatama'coni cuasahuë.

30 I̱ti yohuë sacohua'ire papi yahuerepa jai huëre je̱o sañu'u cajë ea du'iona,

jëa yohuëre a'ri yohuëre tsiayana casa huahuoñu'u cajë yo'ohuë,

quë̱na ca'huanoare corohuë quë'rona je̱a dësoñu'u cajë yo'oyeje̱ pa'ye yo'ohuë.

31 Yo'ojëna,

Pablopi quëapi,

Capitánre cui'ne i̱ soldado pa̱ire ñeje caquë:

“Iye yohuë sacohua'ipi iye yohuëre pa'ima'pë pa'ito mësaru huajëcohua'i pa'iye peosipi.”

32 Ja̱je caquëna,

asani soldado acohua'ipi a'ri yohuë sëa mea tëa je̱oreña.

33 Ñata maca Pablopi si'aohua'ire a̱o huëopi ñeje caquë:

“Mai catorce mu'seña a̱ima'cohua'i a'ë,

mai pa'i ja̱'ñere huesëjë.

34 Ja̱je pa'iquëta'are yureta'a a̱ijë'ë,

tutu paja̱'cohua'i,

mësaru naña me macaje̱ ne huesëye peoji.”

35 Ja̱je ca tëjini a̱ore i̱ni Maija'quëre se̱ni tëjini yëtoni a̱i huëouña.

36 A̲i huëoquëna,

ñani quëcojë a̱ore a̱teña.

37 Yohuë pa'icohua'i cato,

docientos setenta y seis pa̱i pateña.

38 A̲ni tëjini trigore tsiayana ña'ñe dësoreña,

peoja̱co cajë.

39 Ñata to̱mesi maca yohuë sacohua'ipi i̱ti yeja mamire huesëcohua'i paë'ë.

Pa'ijë mejahuëre ñani,

ja̱ona së'añu'u cuasajë yo'ohuë.

40 Ja̱je yo'ojë yohuë jëaye sëani huahuasi mea yë'te tëteni i̱ti hue̱'ñana quë̱na ca'huanoa je̱a coehuë,

cui'ne yohuë tayo peruje̱ joyehuë,

i̱ti po̱'neñeje.

Ja̱je yo'oni tutuquëna,

sai ca̱ñare mëohuë.

Mëorena,

yohuëpi mejahuëna tsioja̱i huëo.

41 Tsioja̱ijëna,

jai yohuë corohuëpi mejahuëna ju'anëni huesëo.

Ja̱ maca yureta'a yo sëtipëja̱'a joni saco'ë,

ai tutu to̱'aquë ju'ayepi.

42 Ja̱ maca soldado pa̱ipi cosicohua'ire huani je̱oñu'u cajë yo'ohuë,

ja̱ohua'ipi mamini catire paja̱'cohua'i a'ë cuasajë.

43 Ja̱je yo'ojëna,

Capitánpi Pablore huasosi'i caquë yo'oma'pë pa'ijë̱'ë,

capi.

Cani si'aohua'ire cua̱ñepi mamicohua'i cato du'ru du'teni mamijë'ë,

caquë.

44 Ja̱ jeteyo'je yecohua'ipi yohuë to̱ñana tse̱ani mamijë saijë̱'ë,

capi.

Caëna,

ja̱je yo'ojë si'aohua'i huajëcohua'i yejana ti̱'ahuë.