Malta Saodohuëre Pa'iye
28
Si'aohua'i yejana de'hue ti̱'asicohua'i pa'ijë ja̱ saodohuë mami asahuë,
Malta.
2 Si'aohua'ire yëquëre i̱ti maca pa'icohua'ipi de'oye yo'ohuë.
Ja̱je yo'ojë toa suani dani cu̱ijë'ë,
cahuë.
Ja̱ mu'se cato ocoquë sësëye pa'iji.
Ja̱je pa'ina,
si'aohua'ire huëohuë,
cu̱ija'cohua'ire.
3 Ja̱ maca Pablo ja̱'ju jeca mañare co'eni suaquëna,
toapi uquëna,
etacopi,
a̱ña cu̱co'ë,
jë̱tëna.
4 Pablo jë̱tëna a̱ñapi cu̱ni decona,
ñani i̱ti maca pa'icohua'i sa̱'ñe cahuë:
“Iquë pa̱ire huaiquë pa'ima'quë,
ja̱je pa'ipi jai tsiaya mamini jëasiquë pa'itoje̱,
ja̱ yë'ta'api i̱te de'oye pa'iye peoyerepa Maija'quëpi yo'oma'quë.”
5 Pablopi a̱ñare toana ya'cue to̱ni ti a'si ju̱'iñe peoyerepa paji'i.
6 Pa'ina,
si'aohua'i je sa'yëhua cotoja̱'quë api,
pa̱nita'a huajërepa ju̱ni ta̱ija'quë a'ni cuasajë utehuë.
Utejëna,
ai yo'oye pa̱quëna,
ña jujani ti̱ñe cuasaye po̱nani Diusu api,
cahuë.
7 Yëquë pëa sito quë̱no macare Publio hue'equë jai tsio paji'i.
Ja̱ë cato saodohuë ëjaërepa paji'i.
Ja̱ëpi yëquëre i̱ huë'ena de'oye pëpani tres mu'seña a̱o a̱oquë ñacaji'i.
8 Ja̱rote Publio pëca ja'quë su̱ña dahuëna cui'ne tsie ë̱ta dahuë co̱ni ju̱'iquë paji'i.
Pa'ina,
Pablopi cacani ñani Maija'quëre se̱ni tëjini i̱te jë̱ñapi patoquëna,
co'yapi.
9 Co'yaëna,
asani i̱te saodohuë acohua'ipi jai pa̱i ju̱'icohua'ipi daë'ë.
Daijëna,
si'aohua'ire jujupi.
10 Ja̱je jujuquëna,
ñani sihuajë ai de'oye yo'ohuë.
Yo'ocohua'ipi yequë yohuëna aya mëni sai huëo maca yëquë saijë a̱i ja̱'ñe cui'ne si'aye jopo caraye i̱sihuë.
Pablo Romana Ti̱'añe
11 Toaso̱ ñañëohua'ire saodohuë pani tëjini yureta'a jai yohuëna ayamë'ë,
Alejandría acona,
oco tëcahuë pa'ina,
pëasicona,
Castor cui'ne Póluz diusuohua'i a'ë cajë nesicohua'ipi quë'iona ayamë'ë.
12 Aya mëni saicohua'ipi Siracusana ti̱'ahuë.
Ti̱'ani toaso̱ mu'seña pëahuë.
13 Pëasicohua'ipi tsiaya të̱'tëpaja̱'a saicohua'ipi Regiona ti̱'ahuë.
Ti̱'ani ñatasi mu'se saijëna,
huë'ehuë te̱'tepi ai tutu ju'api.
Ja̱je ju'aquëna,
saicohua'ipi se ñatasi mu'se ti̱'ahuë,
Puteolina.
14 Ti̱'ani ja̱rona ñahuë,
Maija'quë do'icohua'ire.
Ñajëna,
ja̱ohua'ipi pëajë̱'ë cajëna,
siete mu'seña pëani paë'ë.
Pani saicohua'ipi yureta'a Romana ti̱'ahuë.
15 Yëquë saiye tsoe asani pa'icohua'ipi Maija'quë do'ijëpi sa̱ñope dani ti̱'ahuë,
yëquëre.
Forona Apio quë'rona,
toaso̱ co̱no u̱cu huë̱'ña pa'i hue̱'ña,
ja̱ Romarepa ti̱'ama'në.
Ja̱ maca Pablo ña huajëni sihuaquë Maija'quëre de'oji caquë pëpapi.
16 Ja̱je Romana ti̱'asi maca ëjaohua'ipi te'i pa'ija̱quë Pablo cani te'e soldadore i̱te ñaja'quëre nehuë.
Neni te'ire pëpahuë.
Romare Pablo Pa'iye
17 Toaso̱ mu'seña Roma pëani pa'iquëpi Pablo jëjo saopi,
judío pa̱i ëjaohua'ire soija̱'cohua'ire.
Soina,
judío pa̱i tsi'sirena,
capi:
“Do'ijërepa yë'ë judío pa̱ire co'aye sa̱ñope yo'oma'quë a'ë,
cui'ne ja̱'në aiohua'i case'eje̱ sa̱ñope yo'oma'quë a'ë.
Ja̱je pa'iquëta'are yë'ëre Jerusalénre pa'ina,
tse̱ani romano pa̱ina i̱sihuë.
18 I̱sirena,
ja̱ohua'ipi si'aye yë'ë yo'ose'e se̱ni asa tëjini huani je̱oñe peoquëna,
etoñu'u cahuë.
19 Cajëna,
judío pa̱ipi asani ë̱sehuë.
Ë̲sejëna,
se̱i'ë.
Ja̱je pa'ito romano pa̱i ëjaëre papi Césarpi yë'ë yo'ose'e asani ne de'huaja̱quë caquë,
nuñerepa yë'ë pa̱ire sa̱ñope caye peoquëta'a ja̱je cahuë.
20 Ja̱je pa'ina,
mësarute soihuë,
ñaquë coca caja̱'cohua'ini,
yë'ë iye maca tse̱a cua̱ñosiquëpi quë̱na me së'i pa'iyë,
mai Israel pa̱i utejë pa'iyere cuasa do'ire.”
21 Ja̱je caquëna,
i̱ohua'ipi cahuë:
“Yëquë më'ëre sa̱ñope cajë toyase'e ñama'cohua'i a'ë,
Judea pa'icohua'i toya daose'e cui'ne ja̱ropi do'ijërepa judío pa̱i daisicohua'ije̱ më'ëre co'aye yo'oquë api cayeje̱ pa̱'ahuë'ë.
22 Ja̱je pa'ina,
yëquë asaye yëyë,
më'ë cuasayere.
Yëquë i̱ño asajë pa'iyë,
si'a hue̱'ña pa'icohua'ipi huajëya'yere sa̱ñope cajëna.”
23 Ja̱je cani i̱ti tsi'sija̱'a mu'se ca nëohuë ca nëosicohua'ipi jai pa̱i tsi'sihuë,
Pablo pëani pa'i hue̱'ñana.
Tsi'sirena,
Pablopi nea hue̱'ña huëosiquëpi neatorepa quëa tëjipi ma'tëmo pa'i te̱'te ayere,
Maija'quëre quëacaicohua'i toyase'epi cui'ne Moisés cua̱ñese'epi co̱ni i̱ñoquë quëapi,
Jesús ayere care paji cajë sehuoja̱jë caquë.
24 Ja̱je caquë quëaquëna,
yecohua'ipi Pablo caye sehuocaë'ë,
yecohua'ipi sehuocaiye pa̱huë.
25 Ja̱je yo'ojë te'e cuasaye peoquëna,
sai huëohuë.
Sai huëojëna,
Pablopi capi:
“Maija'quë de'o joyopi nuñerepa capi,
mësaru aipëre i̱te quëacaiquë Isaías yë'opoja̱'a ñeje:
26 Sani quëajë̱'ë,
ja̱ daripë pa̱ire.
De'huarepa asanije asa ti̱'añe pa̱ja'cohua'i a'ë.
De'huarepa ñanije ña ti̱'añe pa̱ja'cohua'i a'ë.
27 I̱ohua'i cuasajë pa'iyepi cara huesësico pa'i do'ire,
Ca̱jonoaje ta'pise'ere hue'eyë.
Cui'ne ñaco ca̱je si̱ose'ere hue'eyë,
ñañe pa̱ñë.
Asayeje̱ pa̱jë,
cui'ne ja̱je pa'iquë cuasajë asa ti̱'añe pa̱jajë caquë nëina,
Cui'ne yë'ëna co'iye pa̱jëna,
yë'ëpi i̱ohua'ire jujucaiye pa̱jaquë cajë ja̱je yo'oyë.
28 Ja̱je pa'ina,
yure iyere asajë̱'ë,
iye Maija'quë huaso cocare judío pa̱i peocohua'ina quëaye pa'iji.
Ja̱ohua'ita'a de'oye asacaija̱'cohua'i a'ë.”
29 Ja̱je Pablo caquëna,
judío pa̱ipi pë̱ijë sa̱ñope cajë saë'ë.
30 Pablopi ja̱rona caya o̱metëcahuë̱a pëani paji'i,
i̱ pa'i huë'e do'i i̱pi sa̱iquë.
Ja̱rore pa'i si'aohua'ire i̱te do'i saicohua'ire de'oye pëpaquë yo'opi.
31 Yo'oquë pa'i Maija'quë cua̱ñe te̱'te ayere ca'raye peoyerepa quëaquë cui'ne Ëjaë Jesucristo ayere ye'yapi,
yecohua'ipi ti jo̱sa yo'oma'pëna.