Aju acꞌaj cyaꞌj ex ju acꞌaj txꞌotxꞌ
21
Tbajlenxi jlu o wile jun acꞌaj cyaꞌj ex jun acꞌaj txꞌotxꞌ;
porque aju tnejel cyaꞌj ex ju tnejel txꞌotxꞌ otok che cub naj,
ex mintiꞌtl mar.
2 Akine Juan o wile aju nintz tnam xjan,
aju acꞌaj Jerusalén cyjaꞌ tcuꞌtz tuj cyaꞌj,
tzaj tucꞌil Dios tbinchan tib ic tzaꞌn jun xuꞌj banin tten tuꞌn tmojeꞌ tucꞌil tchmil.
3 Ex o nbiye jun tkꞌajkꞌajel cyuwxix tzaj tuj cyaꞌj,
in tmaꞌn:
—Ma tzul Dios cyxol xjal,
ex ax cnajal Dios cyucꞌil;
che oquel xjal te jun tnam etzan tuꞌn Dios,
ex axte Dios ctel cyucꞌil te Cydios.
4 Ex cꞌelel t-suꞌn Dios taꞌl cywitz cycyakil;
ex mintiꞌtl camic,
ex mintiꞌtl bis,
ex mintiꞌtl okꞌel,
ex mintiꞌtl cꞌixcꞌoj;
porque akeju at tnejel ma che naj,
chi ju tzaj yolin.
5 Ex tma Dios aju kꞌukl tuj tkꞌukbil jatum in cawin:
—Tcyakil cꞌoquel te acꞌaj wuꞌne.
Ex tzaj tmaꞌn weye:
—Tzꞌibancuya,
porque akeju yol lu axix toc ex baꞌn tuꞌn tkeꞌ cycꞌuꞌje cyiꞌj.
6 Ex tzaj tmaꞌn weye:
—Ma bant.
Akine atine t-xe tnejel ex cucx chin tele oc tjapun baj mancbil tkꞌijlalil,
ic tzaꞌn ju letr A ex Z.
Alcye at txketleꞌn tiꞌj,
nok cucx cxel nkꞌoꞌne aꞌ te,
aju cjawitz tuj twi aꞌ te chwinklal.
7 Alcye ma cub tiꞌj mya baꞌn tuꞌn,
oc tcꞌmaꞌ tcyakil tuꞌn toc te tetzbil;
akine chin oquele te Tdios,
atzun te cꞌoquel te ncꞌwaꞌle.
8 Pero akeju cye che xob,
ex keju mya ocslal,
ex keju icꞌbil ke,
ex keju byol xjal ke,
ex keju yaẍil,
ex keju baꞌn che cyꞌaꞌn,
ex keju cꞌulul cywitz tilbilal,
ex cycyakil ke nicꞌal yol,
atzun che xeꞌl tuj najab in cꞌant tuꞌn kꞌakꞌ ex azufre,
atzun tcabin camicju.
Aju acꞌaj tnam Jerusalén
9 Tzajtzun jun anjel wucꞌile,
jun cye keju wuk anjel akeju o wile nej tzyuꞌn wuk lak cyuꞌn nojni tuꞌn wuk mancbil cꞌixbisabl,
ex tzaj tmaꞌn weye cyjaꞌ:
—Tzaja tzalu,
cxel nyecꞌune teya aju xuꞌj banin tten tuꞌn tmojeꞌ,
aju t-xuꞌjil Tal Ẍneꞌl.
10 Ic tzaꞌn tuj witzicꞌ tzaj tyecꞌun Xewbaj Xjan weye,
inx kꞌiꞌne tuꞌn anjel twiꞌ jun witz maꞌxix ex maꞌ twaꞌl,
ex tzaj tyecꞌun weye aju nintz tnam xjan Jerusalén cyjaꞌ tcuꞌtz tuj cyaꞌj,
tzaj tucꞌil Dios.
11 In koptzꞌaj tnam tuꞌn t-spicꞌumal Dios,
in koptzꞌaj ic tzaꞌn jun tal abj wiꞌyilxix,
ic tzaꞌn ju tal abj jaspe tbi,
kꞌanchaꞌl tuꞌn tex kqueꞌyin tuj ic tzaꞌn cristal.
12 At jun muro maꞌxix ex maꞌ twaꞌl tiꞌjele tnam,
ex at cablaj tpwertil,
ex at junjun anjel ttzi junjun pwert;
ex tzꞌiban cybi cablaj cꞌloj cyiyjil aj Israel cyiꞌj pwert.
13 At ox pwert ttxlaj tnam te ocni,
ex at ox pwert ttxlaj tnam te jawni,
ex at ox pwert ttxlaj tnam te cubni,
ex at ox pwert ttxlaj tnam te elni.
14 Ex aju ma tij muro tiꞌjele tnam at cablaj t-simyentil,
ex tzꞌiban tbi junjun apostl tiꞌj junjun simyent,
atzun cybi ke cablaj apostl te Tal Ẍneꞌl.
15 Aju anjel o yolin wucꞌile at jun echbil kꞌiꞌn tuꞌn ic tzaꞌn ajlaj,
kꞌan pwak ttxꞌotxꞌil,
tuꞌn tcub techan aju tnam tucꞌix tpwertil ex tucꞌix ju ma tij muro toc tiꞌjele.
16 Aju tnam at cyaje ttxlaj junx taꞌ cywitz;
junx taꞌ tnukbil tucꞌil twitz;
ex cub techan anjel ju tnam tuꞌnju ajlaj,
at cab mil tucꞌ 200 kilómetro tnukbil;
aju tnukbil tucꞌix twitz tucꞌix twaꞌl junx taꞌ echbin te.
17 Ex cub techan ju ma tij muro,
at 72 var twaꞌl muro,
ic tzaꞌn in xi techan jun xjal tuꞌn tkꞌab,
icxtzun xi techan anjel.
18 Aju ma tij muro binchaꞌmaj tiꞌj abj jaspe tbi,
atzunju tnam junxte kꞌan pwak tbanilxix,
ic queꞌyin ic tzaꞌn vidr kꞌanchaꞌl tuꞌn tex kqueꞌyin tuj.
19 Atzun ke t-simyentil muro tiꞌj tnam binchaꞌmaj tiꞌj tcyakil txcaj abj tbanilxix.
Aju tnejel simyent binchaꞌmaj tiꞌj abj jaspe;
atzun tcabin simyent binchaꞌmaj tiꞌj abj zafiro;
atzun toxin simyent binchaꞌmaj tiꞌj abj ágata;
atzun tcyajin simyent binchaꞌmaj tiꞌj abj esmeralda;
20 atzun tjweꞌyin simyent binchaꞌmaj tiꞌj abj ónice;
atzun tkakin simyent binchaꞌmaj tiꞌj abj cornalina;
atzun twukin simyent binchaꞌmaj tiꞌj abj crisólito;
atzun twajxakin simyent binchaꞌmaj tiꞌj abj berilo;
atzun tbelajin simyent binchaꞌmaj tiꞌj abj topacio;
atzun tlajin simyent binchaꞌmaj tiꞌj abj crisopraso;
atzun tjunlajin simyent binchaꞌmaj tiꞌj abj jacinto;
ex atzun tcablajin simyent binchaꞌmaj tiꞌj abj amatista.
21 Akeju cablaj pwert cablaj perla ke;
jun perla junjun pwert.
Ex ju cay tuj tnam puro kꞌan pwak tujile,
ic queꞌyin ic tzaꞌn vidr kꞌanchaꞌl tuꞌn tex kqueꞌyin tuj.
22 Ex mintiꞌ tja Dios o wile tuj tnam porque ate Dios aju Kman aju at tipumal tuꞌn tbant tcyakil tuꞌn,
atzun tja Diosju at tuj tnam,
tucꞌix ju Tal Ẍneꞌl.
23 Ex mya il tiꞌj tuꞌn t-spicꞌbanjtz tuj tnam tuꞌn tkan kꞌij ex tuꞌn tkan xjaw;
porque tuꞌnx t-spicꞌumal Dios in spicꞌbanjtz tuj.
Ex ate Tal Ẍneꞌl kꞌolte spicꞌun tuj.
24 Ex ke nasyon otok che clet oc che betel tuj t-spicꞌumal tnam;
ex ke rey twitz txꞌotxꞌ tzul cyiꞌn cykꞌinumabl ex cyoclen tuj.
25 Ke tpwertil tnam mlay che lamet kꞌijl,
porque mintiꞌ konicꞌan tuj tnam lu.
26 Ex ke nasyon tzul cyiꞌn cykꞌinumabl ex ju cyoclen tuj tnam.
27 Pero mlay tzꞌocx jun tiꞌxti tzꞌil tuj tnam lu,
ex mi keju binchal icꞌbilxix twitz Dios,
ex mi keju nicꞌal yol;
nok oꞌcx che oquex keju tzꞌiban cybi tuj tuꞌjil chwinklal aju te Tal Ẍneꞌl.