22
Ax icx tzaj tyecꞌun anjel jun aꞌ weye sakxix,
aju aꞌ te chwinklal,
in koptzꞌaj ic tzaꞌn vidr,
atzun nneꞌtz ju aꞌ lu twitz tkꞌukbil Dios ex tkꞌukbil Tal Ẍneꞌl.
2 Ex in bet ju aꞌ tmijil cay tuj tnam,
ex tuj cycabil pacꞌ ttzi aꞌ ateꞌ ke tzeꞌ te chwinklal,
in cykꞌoꞌn cablaj maj cywitz tuj abkꞌi.
Tcyakil xjaw in cykꞌoꞌn cywitz;
atzun cyxak tzeꞌ in ajben te kꞌanbil cye nasyon.
3 Ex mintiꞌtl jun tuꞌn tten tjakꞌ sentens,
ex aju tkꞌukbil Dios ex te Tal Ẍneꞌl atzun ctel tuj tnam,
ex ke tmajen che cꞌulul twitz.
4 Cꞌoquel cyqueꞌyin twitz,
ex ju tbi cꞌoquel ten tibaj cywitz.
5 Mintiꞌtl konicꞌan ctel tuj tnam;
ex mintiꞌtl tajben t-spicꞌumal lámpara cye xjal,
mi t-spicꞌumal kꞌij;
porque axte Kman Dios cbel ten t-spicꞌumal cyibaj;
ex che cawil tuj tcyakil tabkꞌiyil te jumajx.
Chꞌix tul tkꞌijlalil tuꞌn tul Jesucrist juntl maj
6 Ex tzaj tmaꞌn anjel weye:
—Akeju yol lu axix toc ex baꞌn tuꞌn tkeꞌ cycꞌuꞌje cyiꞌj.
Ate Kman Dios ma tzaj t-samaꞌn t-anjel tuꞌn ttzaj tyecꞌun cye tmajen tcyakilju chꞌix tul,
ic tzaꞌn tzaj tchicꞌbaꞌn tyol cye t-sanjel ojtxi,
chi anjel.
7 —Lu chin ul naje.
At tzalajbil cye ke xjal in japun cyuꞌn aju yol tzꞌiban tuj uꞌj lu,
aju ma tzaj tmaꞌn Dios cye t-sanjel,
chi Jesucrist.
8 Akine Juan o nbiye ex o wile tcyakil jlu.
Ex tej nbinteye jlu ex tej nlonteye,
in cub ẍmejeꞌye t-xe tkan anjel tuꞌn ncꞌulune twitz,
aju anjel tzaj yecꞌunte jlu weye.
9 Pero tzaj tmaꞌn weye:
—Bintza,
miꞌn tbinchaya icju;
porque ax tmajen Dios kine junx tucꞌila ex cyucꞌil ke termaniya akeju t-sanjel Dios,
ex cyucꞌil keju in japun ju yol cyuꞌn aju tzꞌiban tuj tuꞌjil lu.
Cꞌuluna twitz Dios.
10 Ex tzaj tmaꞌn weye:
—Miꞌn cyaj tlamoꞌna ju libro jatum tzꞌiban ju yol lu,
aju ma tzaj tmaꞌn Dios cye t-sanjel,
porque chꞌix tul canun tkꞌijlalil tuꞌn tjapun.
11 Aju xjal mya baꞌn,
cucx tuꞌn tten mya baꞌn;
ex aju xjal tzꞌil,
cucx tuꞌn tten tzꞌilx;
ex aju xjal tzꞌaklxix,
cucx tuꞌn tbinchante aju tzꞌaklxix;
ex aju xjal ma txi tkꞌon tib tuꞌn tajben oꞌcx te Dios,
cucx tuꞌn tajben te Dios.
12 Lu kine chin ul naje;
ex tzul wiꞌne jun oyaj tuꞌn t-xi nkꞌoꞌne chojbil te teyle junjun ic tzaꞌnx tbinchben.
13 Akine atine t-xe tnejel,
ex cucx chin tele oc tjapun baj mancbil tkꞌijlalil,
akine tnejel ex mancbil,
ic tzaꞌn ju letr A ex Z.
14 At tzalajbil cye keju nneꞌl cytxꞌjoꞌn tiꞌj cyxbalun,
tuꞌntzun tten cyoclen tiꞌj ju tzeꞌ te chwinklal,
ex tuꞌn cyocx ttzi tpwertil tnam.
15 Atzun ke xjal jumajx mya baꞌn cybinchben che cyjel ten tiꞌjxi tnam,
cyucꞌix ke xjal baꞌn che cyꞌaꞌn,
ke yaẍil,
ke byol xjal,
ke cꞌulul cywitz ke tilbilal,
ex cycyakil keju at-xix cygan tiꞌj tuꞌn cynicꞌan yol.
16 Akine Jesús ma tzaj nsamaꞌne n-anjele tuꞌn ttzaj tchicꞌbaꞌn tiꞌj tcyakil jlu cye cycyakil ocslal tuj junjun tnam.
Akine tiyjil David,
akine ju cheꞌw in jaꞌwil oc in tzaj t-xe cyaꞌj ex in koptzꞌaj,
chi Jesús.
17 Aju Xewbaj Xjan tucꞌix ju t-xuꞌjil Tal Ẍneꞌl in cymaꞌn:
—Tzaja.
Ax icx alcye ma binte,
kꞌmanx:
—Tzaja.
Ex alcye at txketleꞌn tiꞌj,
e ttzaj;
ex alcye tajbil tuꞌn tcꞌan,
cꞌanx ju aꞌ te chwinklal nok cucx.
18 Ax toc cxel nmaꞌne cye cycyakil keju ma che binte tyol Dios tzꞌiban tuj uꞌj lu:
Ka at jun ma tzꞌoc ttzꞌaksaꞌn juntl yol tiꞌj ju yol tzꞌiban tuj uꞌj lu,
ctzajel tkꞌoꞌn Dios cꞌixbisabl tibaj,
akeju cꞌixbisabl tzꞌiban tuj uꞌj lu.
19 Ex ka at jun ma tzꞌel kꞌinte jun tyol Dios tzꞌiban tuj tuꞌjil lu,
cꞌelel tiꞌn Dios toclen tiꞌj ju tzeꞌ te chwinklal.
Ex mintiꞌtl toclen tiꞌj ju nintz tnam xjan.
Tcyakil jlu tzꞌiban tiꞌj tuj uꞌj lu.
20 Aju in chicꞌbante tiꞌj tcyakil jlu in tmaꞌn:
—Ax toc,
chin ul naje,
chi.
Bant-xwit icju.
Tzaja Kajaw Jesús.
21 Aju t-xtalbil Kajaw Jesucrist tenwt cyucꞌile cycyakile.
Icxwitju.