Aju cbajel tuj jun mil abkꞌi
20
Ex o wile jun anjel cyjaꞌ tcuꞌtz tuj cyaꞌj,
kꞌiꞌn tal ja tuꞌn te jul jalo ponin t-xeꞌ,
tucꞌix jun caden maꞌxix tzyuꞌn tuꞌn.
2 Ex tzyet aju jil dragón tuꞌn,
aju ojtxi lobaj,
atzun tajaw ilju ex Satanás;
ex bajtzun cꞌaloꞌn tuꞌn anjel tuꞌn tten cꞌaloꞌn tuj jun mil abkꞌi.
3 Ex cuꞌx t-xoꞌn tuj jul jalo ponin t-xeꞌ,
ex cyaj tlamoꞌn,
ex cyaj t-seyarin tibaj tuꞌn miꞌn t-sbun mastl cyiꞌj ke nasyon,
ocxi tjapun baj jun mil abkꞌi.
Ex tbajlenxitzun jun mil abkꞌi ctzokpeteltzun,
pero mya nim kꞌij.
4 Ex o wile ke kꞌukbil jatum tuꞌn cycawin keju otok cycꞌam cyoclen tuꞌn tcub cysentens xjal cyuꞌn;
ex e cub keꞌ cyibaj cykꞌukbil.
Ex o wile cyanmi keju el tamtzꞌuꞌn cywiꞌ tuꞌn tlaj xi cychicꞌbaꞌn ax toc tiꞌj Jesús,
ex tuꞌn tlaj tyol Dios,
akeju mintiꞌ e cꞌulun twitz txcup ex mi twitz tilbilal txcup,
ex mintiꞌ o cycꞌam tuꞌn toc techal txcup tibaj cywitz ex ka tiꞌj cykꞌab.
Ex o wile e jaw ankꞌin ex e cawin tucꞌil Crist jun mil abkꞌi.
5 Atzun tnejel ankꞌibl jlu.
Atzun ke mastl cyimni mintiꞌ e jaw ankꞌin,
maxitzun e jaw ankꞌin tej tjapun jun mil abkꞌi.
6 Akeju che jawil ankꞌin tuj tnejel ankꞌibl at tzalajbil cye,
ex ma che el tpaꞌn Dios tuꞌn cyajben oꞌcx te.
Aju tcabin camic mintiꞌ toclen cyiꞌj jlu,
nok oꞌcx che oquel te pal tuꞌn cyajben te Dios ex te Crist,
ex che cawil tucꞌil Crist jun mil abkꞌi.
7 Octzun tjapun baj jun mil abkꞌi,
cꞌeletztzun tzokpiꞌn Satanás tuj presbil te.
8 Ex cꞌelextzun sbul cye nasyon ateꞌ tuj tcyakil twitz txꞌotxꞌ,
aju nasyon Gog tucꞌix Magog,
tuꞌntzun cyoc tchmoꞌn tuꞌn cykꞌojin;
ic cyajlal ic tzaꞌn ttxa tzꞌaꞌn ttzi mar.
9 Ex e tzaj tuj tcyakil twitz txꞌotxꞌ,
ex baj cytxolban cyib tiꞌjele cycampament ocslal ex tiꞌjele ju tnam cꞌujlaꞌnxix tuꞌn Dios;
cuꞌtztzun kꞌakꞌ tuj cyaꞌj tuꞌn Dios,
ex biꞌx e cub tzꞌeꞌy tuꞌn.
10 Ex aju tajaw il aju o sbun cye,
cuꞌx xoꞌn tuj najab in cꞌant tuꞌn kꞌakꞌ ex tuꞌn azufre,
jatum taꞌtok ju txcup tucꞌix ju pacbal nicꞌal yol;
ex che cꞌixbisetel kꞌijl ex konicꞌan tuj tcyakil tabkꞌiyil te jumajx.
Oc cyoc xjal tuj xjel twitz tkꞌukbil Dios
11 Ex o wile jun kꞌukbil maꞌxix ex sak jatum in cawin Dios,
ex o wile aju kꞌukl tuj kꞌukbil.
El ok txꞌotxꞌ twitz tucꞌix cyaꞌj,
ex biꞌx e cub naj.
12 Ex o wile ke cyimni,
keju maꞌ cyoclen ex keju chꞌin cyoclen,
waꞌl ke kwitz Dios;
ex e jaket ke libro,
ex at juntl libro jaket,
aju libro te chwinklal.
Cubtzun cysentens ke cyimni,
ex ju cysentens cub ic tzaꞌnxju cybinchben tzꞌiban cyuj libro.
13 Ex xi tkꞌoꞌn mar ke cyimni ateꞌ tuj;
ex ju camic tucꞌix ju cynajbil cyimni xi cykꞌoꞌn ke cyimni ateꞌ cyuj;
ex teyle junjun cub t-sentens ic tzaꞌnxju tbinchben.
14 Atzunju camic tucꞌix ju cynajbil cyimni e cuꞌx xoꞌn tuj najab in cꞌant tuꞌn kꞌakꞌ.
Atzun tcabin camic jlu.
15 Ex alcye mintiꞌ cnet tbi tzꞌiban tuj tuꞌjil chwinklal,
cuꞌx xoꞌn tuj najab in cꞌant tuꞌn kꞌakꞌ.