19
Tbajlenxi jlu o nbiye jun tkꞌajkꞌajel cyuwxix,
tkꞌajkꞌajel cywiꞌ nim cyajlal xjal tuj cyaꞌj,
in cymaꞌn:
Nimanxwit tbi Dios.
Tuꞌn te Kman Dios ma tzaj tkꞌoꞌn colbil ke ex at nim tajwalil ex tipumal;
2 porque axix toc ex tuj tumelxix aju sentens in cub tkꞌoꞌn;
porque ma cub tkꞌoꞌn tcastiw ju xuꞌj jawni twitz cyucꞌil xinak,
tuꞌnju ma che naj xjal tuꞌnju tyaẍbil xuꞌj;
ex ma tzꞌaj tkꞌoꞌn Dios t-xel te xuꞌj tuꞌn cylaj ke tmajen Dios e cub tbyoꞌn,
che chi.
3 Ex cyma juntl maj:
Nimanxwit tbi Dios.
Aju t-sibel nintz tnam cucx in jaw tuj tcyakil tabkꞌiyil te jumajx,
che chi.
4 Ex keju 24 tij xjal ex keju cyaje querubín e cub ẍmejeꞌ tejxi tpon tacl tibaj cywitz twitz txꞌotxꞌ ex e cꞌulun twitz Dios aju kꞌukltok tuj tkꞌukbil jatum in cawin,
ex in cymaꞌn:
—Icxwitju.
Nimanxwit tbi Dios.
5 Etztzun jun tkꞌajkꞌajel twitz tkꞌukbil Dios in tmaꞌn:
Cynimsaꞌnctze tbi Kdios,
cycyakile akeye tmajen,
ex akeye in che xob twitz,
tzaꞌnx keju chꞌin cyoclen ax icx keju maꞌ cyoclen.
Aju nintz waꞌn tiꞌj mejebleꞌn te Tal Ẍneꞌl
6 Ex o nbiye jun tkꞌajkꞌajel ic tzaꞌn tkꞌajkꞌajel cywiꞌ nim xjal ex ic tzaꞌn tkꞌajkꞌajel nim aꞌ in julin,
ex ic tzaꞌn tkꞌajkꞌajel kꞌancyok in julin wen,
in cymaꞌn:
Nimanxwit tbi Dios.
Porque ma tzyet tcawin Kman Dios aju at tipumal tuꞌn tbant tcyakil tuꞌn.
7 Ko tzalajxix ex ko tenx alegr ex knimsaꞌnctz tbi Dios;
porque ma pon tkꞌijlalil tuꞌn toc mejebleꞌn te Tal Ẍneꞌl,
ex ma bant tten ju t-xuꞌjil.
8 Ma tzaj kꞌoꞌn ambil te t-xuꞌjil tuꞌn toc t-xbalumin tib tuꞌn sak xbalun tzꞌumin twitz ex in koptzꞌaj,
binchaꞌmaj tiꞌj nokꞌ lino.
Porque aju sak xbalun tzꞌumin twitz,
atzunju cybinchben ocslal in bant tuj tumelxix.
9 Ex tzaj tmaꞌn anjel weye:
—Tzꞌibancuya aju yol lu:
At tzalajbil cye keju ma che txconjtz tuꞌn cywaꞌn tuj mejebleꞌn te Tal Ẍneꞌl.
Ax icx tzaj tmaꞌn weye:
—Akeju yol lu axix toc tyol Dios ke.
10 Ex in cub ẍmejeꞌye t-xe tkan anjel tuꞌn ncꞌulune twitz.
Atzun te tzaj tmaꞌn weye:
—Bintza,
miꞌn tbinchaya icju;
porque ax tmajen Dios kine ic tzaꞌn teya ex ic tzaꞌn cye termaniya cucx in xi cychicꞌbaꞌn aju ax toc tiꞌj Jesús.
Cꞌuluna twitz Dios.
Porque keju samaꞌn ke tuꞌn Dios tuꞌn t-xi cymaꞌn aju in tzaj tmaꞌn Dios cye,
atzun ke jlu in xi cychicꞌbaꞌn tyol Jesús,
chi anjel.
Aju xjal tjax tibaj jun chej sak tiꞌj
11 Entons o wile cyaꞌj catl;
ex wile jun chej sak tiꞌj,
ex aju tjax tibaj chej,
atzun tbi jlu:
In japunxix tuꞌn ex axix toc tyol.
Tuj tumelxix in cawin,
ex in kꞌojin tuj tumelxix.
12 Ke tbakꞌ twitz ic che queꞌyin ic tzaꞌn tkan kꞌakꞌ,
ex tjax nim coron tuj twiꞌ,
ex tzꞌiban jun tbi tiꞌj,
ex mi jun xjal el tnicꞌ tiꞌj tbi,
nok oꞌcx te nneꞌl tnicꞌ tiꞌj.
13 Ex toc jun t-xbalun otok cuꞌx muꞌn tuj chicꞌ;
atzun tbi jlu:
TYOL DIOS.
14 Ex ke soldad ateꞌ tuj cyaꞌj nim cyajlal,
lepchkeꞌctok tiꞌj,
toc cyxbalun sak,
tzꞌumin twitz ex sakxix wen,
binchaꞌmaj tiꞌj nokꞌ lino,
ex cyjax cyibaj chej sak cyiꞌj.
15 Ex tuj ttziꞌ nneꞌtz jun spad banin ttziꞌ tuꞌn cyoc cꞌixbiset ke nasyon tuꞌn;
ex octzun ccawil cyibaj xjal tuꞌn jun tvar cꞌuxbil;
ex che bel tcꞌixbisaꞌn ic tzaꞌn jun xjal in cub twaban twitz uva tuj putzꞌbil te,
atzun nimxix tkꞌoj Dios jlu tuꞌn tcub jun cycastiw maꞌxix.
Ate Dios at tipumal tuꞌn tbant tcyakil tuꞌn.
16 Atzun tbi jlu tzꞌiban tiꞌj t-xbalun ex tiꞌj tcux:
Atzun Rey cyibaj cycyakil ke rey,
ex atzun Cyajaw cycyakil keju at cyoclen.
17 Ex o wile jun anjel waꞌltok tuj kꞌij,
ex jaw tkꞌajkꞌajel twiꞌ cyuwxix,
xi tmaꞌn cye cycyakil jil in che lipan twitz cyaꞌj:
—Cytzaje ex cychmoꞌn baj cyibe tuꞌn cytene tuj nintz waꞌn ma tzaj tkꞌoꞌn Dios,
18 tuꞌntzun t-xi cychyoꞌne cychibjal rey,
ex cychibjal capitán,
ex cychibjal keju at cyipun,
ex cychibjal ke chej,
ex cychibjal keju cyjax cyibaj chej,
ex cychibjal cycyakil,
keju tzokpiꞌn ke ex keju majen tzyuꞌn,
keju chꞌin cyoclen ex keju maꞌ cyoclen,
chi anjel.
19 Entons o wile aju txcup cyucꞌix ke rey ateꞌ tuj tcyakil twitz txꞌotxꞌ ex cyucꞌix ke cysoldad nim cyajlal,
cychmon cyib tuꞌn cykꞌojin tiꞌj ju tjax tibaj chej,
ex cyiꞌj ke t-soldad nim cyajlal.
20 Ex tzyettzun ju txcup tucꞌix ju pacbal nicꞌal yol,
aju otok tbincha ke señ twitz txcup,
ex tuꞌnju señ e sbunjtz ke xjal akeju oc techal txcup cyiꞌj ex otok che cꞌulun twitz ju tilbilal.
Akeju cabe lu e cuꞌx xoꞌn itzꞌx ke tuj jun najab in cꞌant tuꞌn kꞌakꞌ ex tuꞌn azufre.
21 Atzun ke mastl e baj cyim tuꞌn spad aju nneꞌtz tuj ttziꞌ ju tjax tibaj chej,
ex cycyakil ke jil in che lipan twitz cyaꞌj e noj tuꞌn cychibjal ke cyimni.