Biꞌx ma naj tnam Babilonia
18
Tbajlenxitzun jlu o wile juntl anjel nim tipumal cuꞌtz tuj cyaꞌj ex cub spicꞌeꞌ twitz txꞌotxꞌ tuꞌn t-spicꞌumal.
2 Ex jaw tkꞌajkꞌajel twiꞌ cyuwxix,
ex tma:
Ma cub xitj,
ma cub xitj aju nintz tnam Babilonia,
ex ma tzꞌoc te cynajbil cycyakil txcaj juꞌẍ puro ploj ke,
ex ma tzꞌoc te cyja cycyakil jil in che lipan twitz cyaꞌj tzuꞌw cyiꞌj ex icꞌbilxix ke.
3 Porque cycyakil nasyon ma che oc cꞌal kꞌeꞌn tuꞌn Babilonia tuꞌnju vin xi tkꞌoꞌn cye;
aju vin atzun in yolin tiꞌj ju tyaẍbil Babilonia;
ex ke rey twitz txꞌotxꞌ ma che yaẍin tucꞌil,
ex ke comersyant twitz txꞌotxꞌ ma che kꞌinumax tuꞌnju nimxix tachbil.
4 Ex o nbiye juntl tkꞌajkꞌajel wibaj tzaj tuj cyaꞌj in tmaꞌn:
—Akeye xjal etzan wuꞌne,
cyetze tuj tnam lu tuꞌn miꞌn cybinchane il junx tucꞌil,
ex tuꞌn miꞌn cycꞌixbisanjtze junx tucꞌil.
5 Porque ma chmet nimxix til,
ex ma tzaj tnaꞌn Dios ju tbinchben mya baꞌn.
6 Cykꞌonxe te ic tzaꞌnx te tzaj tkꞌoꞌn cyeye,
ex cykꞌonxe cab maj t-xel ic tzaꞌnx tbinchben;
tuj ju vas jatum cuꞌx tkꞌoꞌn ju cꞌabj cye mastl,
cybinchame cab maj t-xel,
cykꞌonxe te tcꞌa.
7 Ic tzaꞌn te ma jaw tniman tib ex ma ankꞌin tuj achbil,
icxtzun cykꞌonxe cꞌixbisabl te ex tuꞌn tjaw okꞌ;
porque in tmaꞌn tuj tanmi:
Rey kine,
kꞌukl kine tuꞌn ncawine,
ex mya meba xuꞌj kine,
mlay tzaj okꞌel wiꞌje,
chi xuꞌj.
8 Cyjaꞌtzun,
tuj junx kꞌij ctzajel cꞌixbisabl tibaj;
ctzajel camic tucꞌix okꞌel tucꞌix weꞌyaj tiꞌj,
ex cꞌoquex patun tuj kꞌakꞌ;
porque at tipumal Kman Dios aju ma cub kꞌonte tcastiw.
9 Ex ke rey twitz txꞌotxꞌ,
akeju ma che yaẍin tucꞌil ex ma che ankꞌin tucꞌil tuj achbil,
che okꞌel ex che wuꞌyil tiꞌj oc cylonte t-sibel tkꞌakꞌal.
10 Najchak che tzajel weꞌ tuꞌn xobajil tuꞌnju cꞌixbisabl te,
ex oc cyma:
—Becꞌbil twitza,
becꞌbil twitza,
nintz tnam Babilonia,
aya jun tnam at tipuna,
porque tuj junx or ma tzaj jwisi tibaja.
11 Ex ke comersyant twitz txꞌotxꞌ che okꞌel ex che wuꞌyil tiꞌj tnam lu,
porque mi aꞌl jun xjal tuꞌn tlakꞌonte cycꞌaꞌẍ.
12 Atzun cycꞌaꞌẍ jlu:
Kꞌan pwak,
tucꞌix sak pwak,
tucꞌix tal abj tbanilxix,
tucꞌix tal abj perla tbi,
tucꞌix xbalun sakxix ex tzꞌumin twitz binchaꞌmaj tiꞌj nokꞌ lino,
tucꞌix xbalun tbanilxix binchaꞌmaj tiꞌj nokꞌ seda,
tucꞌix xbalun ẍjulin ex cyak queꞌyin,
tucꞌix tcyakil tzeꞌ at tcꞌocꞌjal,
tucꞌix tcyakil tiꞌxti binchaꞌmaj tiꞌj marfil,
ex tcyakil tiꞌxti binchaꞌmaj tiꞌj tzeꞌ tbanilxix,
ex tiꞌj kꞌan cꞌuxbil,
ex tiꞌj cꞌuxbil,
ex tiꞌj sak abj mármol tbi,
13 tucꞌix canela,
tucꞌix tcꞌocꞌjal t-sem tib,
tucꞌix storac,
tucꞌix tkꞌolil tzeꞌ mirra tbi,
tucꞌix perjum,
tucꞌix vin,
tucꞌix aseyt,
tucꞌix arin,
tucꞌix triw,
cyucꞌix wacẍ,
cyucꞌix ẍneꞌl,
cyucꞌix chej,
cyucꞌix carwaj,
cyucꞌix ke xjal majen in cheꞌx cꞌaꞌyin.
14 Ex cxel cymaꞌn xjal teju nintz tnam cyjaꞌ:
—Tcyakilju tbanil lobj pon tcꞌuꞌja tiꞌj mintiꞌtl in cꞌayinjtz jaꞌlo;
tcyakilju achbil ex ju tbanil at teya ma che cub naj,
mlayx che cnet juntl maj tuꞌna,
che chi.
15 Akeju cꞌayil tcyakil jlu ex ma che oc kꞌinun tuꞌn nintz tnam lu,
najchak che tzajel weꞌ tuꞌnju in che xob tuꞌn tlaj ju cꞌixbisabl te,
in che okꞌ ex in che wuꞌyin,
16 in cymaꞌn:
—Becꞌbil twitz,
becꞌbil twitz aju nintz tnam lu,
aju toc t-xbalun sakxix ex tzꞌumin twitz binchaꞌmaj tiꞌj nokꞌ lino,
toc t-xbalun ẍjulin ex cyak queꞌyin,
ex tbinchan tib toc kꞌan pwak tiꞌj cyucꞌix ke tal abj tbanilxix cyucꞌix ke tal abj perla cybi,
17 porque tuj junx or ma naj tcyakil tkꞌinumabl.
Cycyakil ke yucul barc,
cyucꞌix ke onil cye,
cyucꞌix keju in che bet tuj barc,
cyucꞌix cycyakil keju in che akꞌnan tuj mar,
e tzaj weꞌ najchak;
18 ex tej cylonte t-sibel tkꞌakꞌal e jaw schꞌin:
—¿Atpe juntl tnam ic tzaꞌn ju nintz tnam lu?
Che chi.
19 Ex jax cychitun kuk tuj cywiꞌ,
ex e jaw schꞌin,
in che okꞌ ex in che wuꞌyin,
in cymaꞌn:
—Becꞌbil twitz ju nintz tnam.
Porque cycyakil ke tajaw barc tuj mar ma che kꞌinumax tuꞌn tkꞌinumabl,
ex tuj junx or biꞌx ma naj.
20 Aya cyaꞌj,
tzalajxa tiꞌj,
ax icx cyeye ocslal,
ex apostl,
ex t-sanjel Dios,
che tzalajxe tiꞌj;
porque ma cub t-sentens tuꞌn Dios tuꞌn tlaj e cꞌixbisanjtze tuꞌn,
che chi.
21 Ex at jun anjel nim tipumal,
jaw tiꞌn jun abj ic tzaꞌn jun cyaꞌ maꞌxix te chebl triw,
ex xi t-xoꞌn anjel ju abj tuj mar,
ex tma:
—Icxtzun cxel xoꞌna aya nintz tnam Babilonia,
ex mlayx cneta juntl maj.
22 Ex mlay binjtz juntl maj tkꞌajkꞌajel twiꞌ chnab arpa cyuj ke cay ateꞌ tuja,
mi tkꞌajkꞌajel bitz,
mi tkꞌajkꞌajel twiꞌ xux,
ex mi tkꞌajkꞌajel twiꞌ chun;
ex mlay che tentl tuja ke xjal junxilchak cyakꞌun,
ex mlay binjtz juntl maj tkꞌajkꞌajel twiꞌ cyaꞌ tuja.
23 Mlay spicꞌbanjtz juntl maj tuja tuꞌn t-spicꞌumal candil,
ex mintiꞌtl ninkꞌij te mejebleꞌn cꞌoquel tuja.
Ke comersyant ateꞌtok tuja nej,
atzun keju maꞌ cyoclen ateꞌ twitz txꞌotxꞌ,
ex tuꞌn cycyꞌabene ma che sbunjtz cycyakil nasyon.
24 Ex atzun ma cnet cychcꞌel ke t-sanjel Dios ex cychcꞌel ke ocslal,
ex cychcꞌel cycyakil keju o che cub byoꞌn twitz txꞌotxꞌ tuꞌn tlaj cyocslabl tiꞌj Dios.