—Tzaja tzalu,

cxel nyecꞌune teya aju sentens cbel tibaj ju xuꞌj jawni twitz cyucꞌil xinak,

aju kꞌukl cyibaj nimcu aꞌ.

2 Ke rey twitz txꞌotxꞌ ma che yaẍin tucꞌil,

ex ke xjal najl ke twitz txꞌotxꞌ ma chyoꞌn cywiꞌ tuꞌnju ma txiꞌ cycꞌaꞌn vin tzaj tkꞌoꞌn xuꞌj cye,

aju vin atzun in yolin tiꞌj tyaẍbil xuꞌj.

3 Ic tzaꞌn tuj witzicꞌ tzaj tyecꞌun Xewbaj Xjan weye,

inx kꞌiꞌne tuꞌn anjel tuj lugar mintiꞌ cynajbil xjal tuj.

Ex wile jun xuꞌj kꞌukl tibaj jun txcup cyak tiꞌj,

ex tzꞌiban nimcu biybaj tiꞌj txcup te yasbil tiꞌj Dios,

ex at wuk twiꞌ txcup ex laj tcach.

4 Aju xuꞌj toc t-xbalun tbanilxix,

ẍjulin ex cyak queꞌyin,

ex tbinchan tib xuꞌj wen,

toc kꞌan pwak tiꞌj tucꞌix tal abj tbanilxix cyucꞌix ke tal abj perla cybi,

ex tzyuꞌn jun lak tuꞌn kꞌan pwak ttxꞌotxꞌil,

nojni tuꞌn ttzuwil ex tuꞌn ttzꞌilil tyaẍben.

5 Ex tzꞌiban jun biybaj tibaj twitz xuꞌj,

mlay tzꞌel knicꞌ tiꞌj;

atzun jlu:

Nintz tnam Babilonia,

aju cytxuꞌ ke xuꞌj jawni cywitz cyucꞌil xinak ex ttxuylal aju ttzuwil at twitz txꞌotxꞌ.

6 Ex o wile chyoꞌmni twi xuꞌj tuꞌn cychcꞌel ocslal ex tuꞌn cychcꞌel keju otok che cub byoꞌn tuꞌnju testiw ke tiꞌj Jesús.

Ex tej nlonteye jlu,

biꞌx naj nnable.

7 Atzunte anjel tzaj tmaꞌn weye:

—¿Tikꞌun ma naj tnabla?

Cxel nmaꞌne teya aju naꞌnx tkꞌanchaꞌlin tiꞌj ju xuꞌj lu ex tiꞌj ju txcup aju ikalte xuꞌj,

aju at wuk twiꞌ ex laj tcach.

8 Aju txcup ma tila at nej,

pero mintiꞌtl jaꞌlo;

pero chꞌix tjatz tuj jul jalo ponin t-xeꞌ tuꞌn t-xiꞌ tuj najen;

ex ke xjal najl twitz txꞌotxꞌ che labil tiꞌj,

akeju mya tzꞌiban cybi tuj tuꞌjil chwinklal atxix tej tbant twitz txꞌotxꞌ;

che labil tiꞌj ju txcup oc cylonte,

tuꞌnju at nej,

pero mintiꞌtl jaꞌlo,

ex tzul juntl maj.

9 Atzun tnabl jlu ka ma pujet cyuꞌne:

Aju wuk twiꞌ txcup atzun wuk witzju,

jatum in cub keꞌ xuꞌj cyibaj.

10 Ax wuk rey keju wuk twiꞌ txcup.

Jweꞌ rey o che el,

jun atx jaꞌlo,

atzun juntl naꞌnx tul;

octzun tul,

ilxix tiꞌj tuꞌn tten,

pero mya nim kꞌij.

11 Aju txcup at nej ex mintiꞌtl jaꞌlo,

axtzun twajxakin rey,

ex ax jun cyxol keju wuk,

ex cxeꞌl tuj najen.

12 Ex keju laj cach ma tila,

atzun keju laj rey,

akeju naꞌnx cycꞌmonte cyoclen tuꞌn cycawin;

pero nok junx or tuꞌn tten cyoclen te rey junx tucꞌil ju txcup.

13 Akeju laj rey lu junx cyximbetz,

ex cxel cykꞌoꞌn cyipumal ex cyoclen teju txcup.

14 Che kꞌojlel tiꞌj Tal Ẍneꞌl,

pero cbel cyiꞌj tuꞌn Tal Ẍneꞌl;

porque atzun Cyajaw cycyakil keju at cyoclen,

ex atzun Rey cyibaj cycyakil ke rey;

ex akeju ateꞌ tucꞌil txcoꞌmaj ke tuꞌn Dios ex scꞌoꞌmaj ke tuꞌn ex in japunxix cyuꞌn.

15 Ax icx tzaj tmaꞌn anjel weye:

—Akeju aꞌ ma tila jatum in cub keꞌ ju xuꞌj jawni twitz cyucꞌil xinak,

tnam ke,

ex xjal ke nim cyajlal,

ex nasyon ke,

ex junxilchak cyyol.

16 Ex keju laj tcach txcup ma tila cꞌelel cyicꞌun aju xuꞌj jawni twitz cyucꞌil xinak,

cnajel xuꞌj cyuꞌn,

cyjel cykꞌoꞌn mintiꞌ t-xbalun toc,

cxel cychyoꞌn tchibjal,

ex cbel cypatun tuꞌn kꞌakꞌ.

17 Porque ma tma Dios tuj cyanmi tuꞌn cybinchante ju tajbil,

tuꞌn tmojeꞌ cyyol,

ex tuꞌn t-xi cykꞌoꞌn cycawbil te txcup acutzun in japun tyol Dios.

18 Ex aju xuꞌj ma tila,

atzunju nintz tnam aju in cawin cyibaj ke rey ateꞌ twitz txꞌotxꞌ.