Aju castiw tcuꞌx tuj wuk lak
16
Entons o nbiye jun tkꞌajkꞌajel wibaj cyuwxix etz kꞌajt tuj tja Dios,
ex xi tmaꞌn cye keju wuk anjel:
—Cyxiꞌye ex cykonxe twitz txꞌotxꞌ aju tcuꞌx tuj wuk lak,
aju castiw in tzaj tkꞌoꞌn Dios.
2 Xiꞌtzun tnejel anjel,
ex xi tkoꞌn twitz txꞌotxꞌ aju tcuꞌx tuj tlak.
Ex e jawil txꞌaꞌc plojxix ex nim taꞌw cyiꞌj ke xjal,
akeju toc techal txcup cyiꞌj,
ex in che cꞌulun twitz ju tilbilal txcup.
3 Atzunju tcabin anjel xi tkoꞌn tibaj mar aju tcuꞌx tuj tlak,
ex oc mar te chicꞌ ic tzaꞌn tchcꞌel jun xjal byoꞌn in cub,
ex e baj cyim cycyakil keju najl ke tuj mar.
4 Atzunju toxin anjel xi tkoꞌn aju tcuꞌx tuj tlak,
xi tkoꞌn cyibaj ke aꞌ ex cyibaj twi aꞌ,
ex ke aꞌ e oc te chicꞌ.
5 Ex xi nbiꞌne tyol ju anjel tajaw aꞌ,
tma:
Aya Kman,
aya at jaꞌlo,
aya at ojtxi,
ex aya Xjan,
tuj tumelxix ma cub cycastiw jlu tuꞌna.
6 Porque el cychcꞌel ke ocslal ex cychcꞌel ke t-sanjela cyuꞌn,
ax icx cye jaꞌlo ma tzaj tkꞌoꞌna chicꞌ te cycꞌa;
porque tuj cyilx jlu.
7 Ex o nbiye at juntl tzaj kꞌajt twitz altar,
tma:
—Ax toc Kman Dios,
at tipumala tuꞌn tbant tcyakil tuꞌna,
axix toc ex tuj tumelxix aju cysentens ma cub tkꞌoꞌna.
8 Atzunju tcyajin anjel xi tkoꞌn tiꞌj kꞌij aju tcuꞌx tuj tlak,
ex xi kꞌoꞌn ambil te kꞌij tuꞌn cytzꞌeꞌy ke xjal tuꞌn taꞌw kꞌij.
9 Ex e baj tzꞌeꞌy xjal tuꞌnju nim cyak;
pero mintiꞌ ajtz tiꞌj cyanmi tuꞌn tjaw cynimsaꞌn tbi Dios,
nok oꞌcx e oc ten yasul tiꞌj Dios aju at tipumal tuꞌn cytzaj tkꞌoꞌn ke cꞌixbisabl lu.
10 Atzunju tjweꞌyin anjel xi tkoꞌn aju tcuꞌx tuj tlak,
xi tkoꞌn tibaj tkꞌukbil txcup jatum in cawin,
ex aju tcawbil txcup biꞌx cyaj ten tuj klolj,
ex cub cytxꞌaꞌn cyakꞌ xjal tuꞌn taꞌw cꞌixbisabl.
11 Masque icju,
pero mintiꞌ ajtz tiꞌj cyanmi tiꞌj cybinchben mya baꞌn,
nok oꞌcx e oc ten yasul tiꞌj Dios aju at tuj cyaꞌj,
tuꞌn tlaj cꞌixcꞌoj cyiꞌj ex tuꞌn tlaj txꞌaꞌc cyiꞌj.
12 Atzunju tkakin anjel xi tkoꞌn aju tcuꞌx tuj tlak,
xi tkoꞌn tibaj nintz nima Éufrates,
ex biꞌx aj tzkij ju nima,
tuꞌntzun cyicꞌtz ke rey che tzajel tuj tjawitz kꞌij.
13 Ex o wile ox juꞌẍ ic che queꞌyin ic tzaꞌn woꞌ,
e jatz tuj ttziꞌ jil dragón ex tuj ttziꞌ txcup ex tuj ttziꞌ ju pacbal nicꞌal yol.
14 Porque ake jlu juꞌẍ ke puro ploj ke in che bant ke señ cyuꞌn,
ex in che pon cyucꞌil rey tuj tcyakil twitz txꞌotxꞌ tuꞌn cyoc cychmoꞌn,
tuꞌntzun cykꞌojin tiꞌj Dios tuj jun kꞌij maꞌ toclen,
aju Dios at tipumal tuꞌn tbant tcyakil tuꞌn.
15 Cybintze,
chin ule ic tzaꞌn elekꞌ;
at tzalajbil teju xjal in xkꞌukin ex toc t-xbalun,
tuꞌntzun miꞌn tbet skiꞌt tiꞌj ex tuꞌn miꞌn tcub tkꞌoꞌn tchꞌixwi cywitz xjal,
chi Jesús.
16 Ex e oc cychmoꞌn ke rey tuj lugar Armagedón tbi tuj yol ebrey.
17 Atzunju twukin anjel xi tkoꞌn tuj cykꞌikꞌ aju tcuꞌx tuj tlak;
ex etz jun tkꞌajkꞌajel wibaj cyuwxix tuj tja Dios,
tzaj kꞌajt max twitz tkꞌukbil,
ex tma:
—Oꞌcxtzun,
ma baj.
18 Ex tzaj tkan kꞌancyok tucꞌix kꞌancyok in jululun ex jun cyaknajnab cyuwxix,
naꞌnx ttzaj jun cyaknajnab icju atxix tej tbant xjal twitz txꞌotxꞌ.
19 Ex aju nintz tnam biꞌx el cꞌabchaj,
ox piẍ el,
ex ke nintz tnam tuj junjun nasyon e cub xitj;
ex tzaj tnaꞌn Dios aju nintz tnam Babilonia tuꞌn t-xi tkꞌoꞌn jun vas te nojni tuꞌn nimxix tkꞌoj Dios,
tuꞌn t-xi cycꞌaꞌn te jun cycastiw maꞌxix.
20 Ex cycyakil ke tal txꞌotxꞌ tmijil mar e jeꞌl ok,
ex ke witz e cub naj.
21 Ex tzaj nimxix sakbakun twitz cyaꞌj,
cub tzꞌak cyibaj xjal,
aju cyalil junjun sakbakun balo jun quintal junjun;
e octzun ten xjal yasul tiꞌj Dios tuꞌnju sakbakun tzaj te cꞌixbisabl,
porque maꞌxix cꞌixbisabl tuꞌn sakbakun.