Ke anjel kꞌolte ke wuk mancbil cꞌixbisabl
15
Ex o wile juntl techal maꞌxix tuj cyaꞌj,
in labine tiꞌj:
At wuk anjel kꞌiꞌn wuk cꞌixbisabl cyuꞌn,
atzun mancbil cꞌixbisabl jlu,
porque oꞌcxtzun cjapunel baj tkꞌoj Dios.
2 Ex at juntl o wile ic queꞌyin ic tzaꞌn mar,
ic queꞌyin ic tzaꞌn vidr t-sem tib tucꞌil kꞌakꞌ;
ex o wile akeju otok cub tiꞌj txcup cyuꞌn ex tiꞌj ju tilbilal,
ex tiꞌj ju tajlal tbi,
waꞌl ke ttziꞌ mar ic queꞌyin ic tzaꞌn vidr,
tzyuꞌn chnab arpa cyuꞌn,
aju tzaj tkꞌoꞌn Dios cye.
3 Ex in che bitzan tbitz Moisés aju tmajen Dios,
ex tbitz Tal Ẍneꞌl,
in cymaꞌn:
Maꞌxix ke tbinchbena ex in ko labine cyiꞌj,
aya Kman Dios at tipumala tuꞌn tbant tcyakil tuꞌna;
tzꞌaklxix ke t-ximbetza ex axix toc,
aya Rey cyibaj cycyakil nasyon.
4 Cycyakil xjal che xobel twitza,
ex cjawil cynimsaꞌn tbiya,
aya Kman.
Porque oꞌcx aya xjan;
cyjaꞌtzun cycyakil nasyon che tzajel tuꞌn cycꞌulun twitza,
porque tuj tumelxix aju sentens ma cub tkꞌoꞌna,
che chi.
5 Tbajlenxitzun jlu,
o wile jaket ttzi tja Dios tuj cyaꞌj,
aju ja xbalun te nabl Dios,
jatum cꞌuꞌn ke tzꞌlom abj tzꞌiban tley Dios cywitz.
6 Ex e jeꞌtz wuk anjel tuj tja Dios,
akeju kꞌiꞌn wuk cꞌixbisabl cyuꞌn,
toc cyxbalun sak wen ex in koptzꞌaj,
binchamaj tiꞌj nokꞌ lino,
ex toc cꞌalbil ttzi cyxuꞌc kꞌan pwak ttxꞌotxꞌil.
7 Ex at jun cyxol keju cyaje querubín xi tkꞌoꞌn wuk lak kꞌan pwak cytxꞌotxꞌil cye keju wuk anjel,
nojni ke lak lu tuꞌn castiw ctzajel tkꞌoꞌn Dios cyibaj xjal,
aju Dios itzꞌ tuj tcyakil tabkꞌiyil te jumajx.
8 Ex o noj tja Dios tuꞌn t-sibel t-spicꞌumal Dios ex tipumal;
ex mi aꞌl jun xjal tuꞌn tocx tuj tja Dios,
maxitzun tuꞌn tocx oc tjapun baj aju wuk cꞌixbisabl cyuꞌn wuk anjel.