Ke xjal in che bitzan, 144 mil cyajlal
14
Ax icx o wile ju Tal Ẍneꞌl waꞌltok twi witz Sión;
ex at 144 mil xjal tucꞌil,
toc tbi Tal Ẍneꞌl tibaj cywitz tucꞌix tbi Tman.
2 Ex o nbiye jun tkꞌajkꞌajel tzaj tuj cyaꞌj ic tzaꞌn tkꞌajkꞌajel nimcu aꞌ in jululun wen ex ic tzaꞌn tkꞌajkꞌajel jun kꞌancyok cyuwxix;
ex aju tkꞌajkꞌajel o nbiye ic tzaꞌn ke xjal in che chimban tiꞌj arpa.
3 Ex in che bitzan tiꞌj jun acꞌaj bitz twitz tkꞌukbil Dios ex cywitz ke cyaje querubín ex cywitz ke tij xjal.
Mi jun xjal bant tbitzan tiꞌj bitz,
nok oꞌcx keju 144 mil xjal otok che colpet cyxol xjal twitz txꞌotxꞌ.
4 Atzun ke jlu mintiꞌ baj cytzꞌilsan cyib cyucꞌil xuꞌj,
porque mintiꞌ e mojeꞌ cyucꞌil xuꞌj.
Atzun ke jlu in che oc lpeꞌ tiꞌj Tal Ẍneꞌl nok jaꞌx jatum in xiꞌ.
Atzun ke jlu e colpet cyxol xjal tuꞌn cyoc te jun oyaj te Dios ex teju Tal Ẍneꞌl,
ic tzaꞌn tnejel twitz awal in xi kꞌot te Dios.
5 Ex mintiꞌ jun maj o che yolin nicꞌaj yol,
porque mintiꞌ cypaltil twitz Dios.
Aju cyyol keju ox anjel
6 Ex o wile juntl anjel in lipan tuj tmijil twitz cyaꞌj kꞌiꞌn tkanil colbil tuꞌn,
aju colbil te jumajx,
tuꞌn t-xi tpacbaꞌn cye xjal najl twitz txꞌotxꞌ,
cye cycyakil nasyon,
ex cye cycyakil cyiyjil xjal,
ex cye cycyakil cꞌloj xjal junxilchak cyyol,
ex cye cycyakil tnam.
7 Ex jaw tkꞌajkꞌajel twiꞌ anjel cyuw,
ex tma:
—Che xobe twitz Dios,
ex cykꞌonxe nimbil te,
porque ma pon tkꞌijlalil tuꞌn tcub cysentens xjal tuꞌn;
cyjaꞌtzun,
che cꞌulune twitz ju binchal cyaꞌj,
tucꞌix txꞌotxꞌ,
tucꞌix mar ex cyucꞌix ke twi aꞌ.
8 Ex oc lpeꞌ juntl anjel tiꞌj in tmaꞌn:
—Ma naj,
ma naj aju nintz tnam Babilonia,
porque cycyakil nasyon ma che oc cꞌal kꞌeꞌn tuꞌn Babilonia tuꞌnju vin xi tkꞌoꞌn cye;
aju vin atzun in yolin tiꞌj ju cycꞌulbil aj Babilonia cywitz ke tilbilal.
9 Ex juntl toxin anjel oc lpeꞌ cyiꞌj,
jaw tkꞌajkꞌajel twiꞌ cyuwxix ex tma:
—Ka at jun xjal in cꞌulun twitz ju txcup ex ka twitz tilbilal,
ex ka ma tcꞌam ju techal tibaj twitz ex ka tiꞌj tkꞌab,
10 ax icx te xjal lu at juntl vin cxel tcꞌaꞌn,
aju tkꞌoj Dios,
aju vin lu mya t-sem tib ma cuꞌx tkoꞌn Dios tuj vas,
aju vas in yolin tiꞌj tkꞌoj Dios ex tuꞌn tcub cycastiw xjal;
ex oc ccꞌixbisetel xjal tuꞌn kꞌakꞌ ex tuꞌn azufre cywitz ke anjel xjan ex twitz ju Tal Ẍneꞌl.
11 Ex aju t-sibel cꞌixbisabl cye in jaw tuj tcyakil tabkꞌiyil te jumajx,
ex keju in che cꞌulun twitz txcup ex twitz tilbilal mintiꞌ chꞌin ojlabl cye kꞌijl ex konicꞌan,
ax icx keju in cycꞌmoꞌn techal tbi,
mintiꞌ ojlabl cye.
12 Cyjaꞌtzun,
il tiꞌj tuꞌn tten cypasens ocslal,
akeju in che japun ke tmandamyent Dios cyuꞌn ex cucx tten cyocslabl tiꞌj Jesús.
13 Ex o nbiye jun tkꞌajkꞌajel tzaj tuj cyaꞌj,
tzaj tmaꞌn weye:
—Tzꞌibancuya jlu:
At tzalajbil cye keju che cymel ocslal ke tiꞌj Kajaw.
Ax toc,
chi Xewbaj Xjan,
che ojlal,
mlay che akꞌnantl,
porque aju cyakꞌunben lepchix cyiꞌj.
Jaw chmoꞌn twitz awal twitz txꞌotxꞌ
14 Ex o wile jun muj sak;
ex at jun kꞌukl tibaj muj,
ic queꞌyin ic tzaꞌn jun xjal,
tjax jun coron kꞌan pwak ttxꞌotxꞌil tuj twiꞌ,
ex tzyuꞌn jun jobl triw tuꞌn,
banin ttziꞌ.
15 Ex at juntl anjel etz tuj tja Dios,
jaw tkꞌajkꞌajel twiꞌ cyuw,
xi tmaꞌn teju kꞌukl tibaj muj:
—Nukpinx tkꞌaba tucꞌix jobl triw tuꞌn tjaw chmet twitz awal;
porque ma pon tkꞌijlalil tuꞌn tjaw chmet twitz awal,
porque ma tzkij twitz awal twitz txꞌotxꞌ.
16 Ex aju kꞌukltok tibaj muj tzaj tnukpiꞌn tkꞌab twitz txꞌotxꞌ tucꞌix jobl triw ex jaw ju awal twitz txꞌotxꞌ.
17 Entons etz juntl anjel tuj tja Dios at tuj cyaꞌj,
ax icx te tzyuꞌn jun jobl uva tuꞌn,
banin ttziꞌ.
18 Ex etz juntl anjel twitz altar,
aju at toclen tuꞌn ttzaj t-samaꞌn kꞌakꞌ,
ex jaw tkꞌajkꞌajel twiꞌ cyuwxix,
xi tmaꞌn teju anjel tzyuꞌn jobl uva tuꞌn,
banin ttziꞌ:
—Nukpinx tkꞌaba tucꞌix jobl uva banin ttziꞌ tuꞌn tel baj tjoꞌna ke pnujin uva twitz txꞌotxꞌ,
porque ma che kꞌanax ke uva,
chi anjel.
19 Ex jaw tjoꞌn anjel twitz txꞌotxꞌ tuꞌn jobl uva,
ex el tjoꞌn twitz uva tuj tcyakil twitz txꞌotxꞌ,
ex xi t-xoꞌn ke uva tuj putzꞌbil te maꞌxix,
atzun in tmaꞌn jlu,
ctzajel tkꞌoj Dios cyiꞌj xjal,
ex ctzajel jun cycastiw maꞌxix tuꞌn.
20 Ex baj waban twitz uva tuj putzꞌbil te tiꞌjxi tnam,
etztzun chicꞌ tuj putzꞌbil te uva,
japun t-xeꞌ jatum toc cypren chej,
ex 300 kilómetro jatum pon baj.