Keju cabe txcup
13
Entons in cub weꞌye tibaj ttxa tzaꞌn ttzi mar,
ex o wile jatz jun txcup tuj mar at wuk twiꞌ ex laj tcach,
ex tjax junjun coron twiꞌ junjun tcach,
ex tzꞌiban tbi txcup tiꞌj junjun twiꞌ,
te yasbil tiꞌj Dios.
2 Aju txcup o wile ic queꞌyin ic tzaꞌn tigre,
ke tkan ic che queꞌyin ic tzaꞌn tkan jun jil oso,
atzun ttziꞌ ic queꞌyin ic tzaꞌn ttzi balun.
Ex xi tkꞌoꞌn jil dragón tipumal txcup ex tuꞌn tcawin ex tuꞌn tten nim toclen.
3 Ex o wile jun twiꞌ txcup otok cꞌixbi mer ic tzaꞌn otok cyim;
pero aju tcꞌixblen o banix,
ex cycyakil xjal twitz txꞌotxꞌ e labin tiꞌj txcup,
ex e oc lpeꞌ tiꞌj.
4 Ex e cꞌulun twitz ju jil dragón,
aju xi kꞌonte toclen txcup,
ex e cꞌulun twitz txcup,
ex cyma:
—¿Alcye jun jacu pon ic tzaꞌn te txcup lu,
ex alcye jun jacu kꞌojin tucꞌil?
Che chi.
5 Ex xi kꞌoꞌn ambil te txcup tuꞌn tyolin nimcu yol te tnimbil tib ex tuꞌn tyasun tiꞌj Dios;
ex xi kꞌoꞌn toclen tuꞌn tcawin tuj 42 xjaw.
6 Ex oc ten yolil tuꞌn tyasun tiꞌj Dios ex tuꞌn tyasun tiꞌj tbi Dios ex tiꞌj ju ja xbalun te nabl Dios,
ex cyiꞌj keju najl ke tuj cyaꞌj.
7 Ex xi kꞌoꞌn ambil te tuꞌn tkꞌojin cyiꞌj ocslal ex tuꞌn tcub cyiꞌj tuꞌn.
Ax icx xi kꞌoꞌn toclen tuꞌn tcawin cyibaj cycyakil cyiyjil xjal,
ex cycyakil tnam,
ex cycyakil cꞌloj xjal junxilchak cyyol,
ex cycyakil nasyon.
8 Ex cycyakil xjal twitz txꞌotxꞌ e cꞌulun twitz txcup,
akeju mya tzꞌiban cybi tuj tuꞌjil chwinklal atxix tbantlen twitz txꞌotxꞌ;
aju tuꞌjil chwinklal lu te Tal Ẍneꞌl aju cub byoꞌn.
9 Ka at jun at t-ẍcyin,
binx ju yol lu.
10 Akeju banin cyiꞌj tuꞌn cyxi kꞌiꞌn pres,
che xel kꞌiꞌn pres;
ex akeju banin cyiꞌj tuꞌn cycub byoꞌn tuꞌn spad,
che bel byoꞌn tuꞌn spad.
Cyjaꞌtzun il tiꞌj tuꞌn tten cypasens ocslal ex tuꞌn tkeꞌ cycꞌuꞌj tiꞌj Dios.
11 Ex tbajlenxi jlu o wile juntl txcup tzaj twitz txꞌotxꞌ;
at cabe tcach ic tzaꞌn tcach jun tal ẍneꞌl,
pero o yolin ic tzaꞌn jil dragón.
12 Ex junx taꞌ toclen ic tzaꞌn toclen tnejel txcup,
ex in cawin ttxlaj tnejel txcup,
nnoꞌc tkꞌoꞌn tilil cyiꞌj xjal najl ke twitz txꞌotxꞌ tuꞌn cycꞌulun twitz tnejel txcup,
aju chꞌixtok tcyim nej tuꞌn cꞌixbleꞌn,
pero o banix.
13 In tbinchaꞌn ke techal maꞌxix cyxilen;
ax icx in cuꞌtz kꞌakꞌ tuꞌn twitz cyaꞌj in cubil twitz txꞌotxꞌ cywitz xjal.
14 Ex in sbun cyiꞌj xjal najl twitz txꞌotxꞌ,
porque o tzaj kꞌoꞌn tipumal tuꞌn tbinchante ke techal twitz tnejel txcup,
ex xi tmaꞌn cye xjal najl twitz txꞌotxꞌ tuꞌn cybinchante jun tilbilal txcup,
aju otok cꞌixbisanjtz tuꞌn spad ex ankꞌintl.
15 Ex xi kꞌoꞌn tipumal tcabin txcup tuꞌn tocx tkꞌoꞌn t-xew tuj tilbilal tnejel txcup,
tuꞌn tbant tyolin ju tilbilal ex tuꞌn cycub byoꞌn xjal tuꞌn,
akeju mintiꞌ in che cꞌulun twitz.
16 Ex xi tkꞌoꞌn txcup orden cye cycyakil xjal tuꞌn toc jun techal tiꞌj cybankꞌab ex ka tibaj cywitz,
tzaꞌnx keju chꞌin cyoclen icx keju maꞌ cyoclen,
ke kꞌinun ex ke meba xjal,
ke xjal tzokpiꞌn ke ex ke majen tzyuꞌn.
17 Ex tma txcup tuꞌn miꞌn cylokꞌon xjal ex tuꞌn miꞌn cycꞌayin ka mintiꞌ techal txcup toc cyiꞌj ex ka tbi ex ka tajlal tbi.
18 A jlu taj nim nabl tuꞌn tel knicꞌ tiꞌj.
Alcye at tnabl,
ximanx tiꞌj alcye tajlal in ajben tuꞌn txcup,
porque ax tajlal in ajben tiꞌj tbi jun xjal.
Ex atzun tajlal jlu,
666.