Aju xuꞌj ex ju jil dragón
12
Ex tzaj yecꞌun jun techal maꞌxix tuj cyaꞌj:
at jun xuꞌj toc kꞌij tiꞌj ic tzaꞌn jun xbalun,
ex tcub xjaw tjakꞌ tkan;
ex tjax jun coron tuj twiꞌ toc cablaj cheꞌw tiꞌj coron.
2 Ex otok tzꞌoc ten tal xuꞌj ex in schꞌin tuꞌn taꞌw,
chꞌixtok tul tal ex nnoꞌc tuj cꞌixcꞌoj tuꞌn tul itzꞌj tal.
3 Ax icx tzaj yecꞌun juntl techal tuj cyaꞌj:
At jun jil maꞌxix,
dragón tbi,
cyak tiꞌj,
at wuk twiꞌ ex laj tcach,
ex tjax junjun coron tuj junjun twiꞌ.
4 Ex tuꞌn tjeꞌ dragón tzaj tjacꞌuꞌn toxin tnej cheꞌw ateꞌ tuj cyaꞌj ex e cuꞌtz t-xoꞌn twitz txꞌotxꞌ.
Atzun te jil dragón cub weꞌ twitz xuꞌj aju chꞌixtok tul itzꞌj tal,
tuꞌntzun t-xi tchyoꞌn naj tal xuꞌj oc tul itzꞌj.
5 ex xinak jun tal xuꞌj ul itzꞌj,
ex ate ccawil cyibaj cycyakil nasyon tuꞌn var cꞌuxbil;
jawtzun jubchaꞌn ju tal xuꞌj,
ex xi kꞌiꞌn tucꞌil Dios jatum taꞌ tkꞌukbil.
6 Atzunte xuꞌj el ok,
xiꞌ tuj lugar mintiꞌ cynajbil xjal tuj,
atzun taꞌ jun tnajbil xuꞌj banin tuꞌn Dios,
ex atzun tuꞌn tcꞌaꞌchanjtz tuj jun mil tucꞌil 260 kꞌij.
7 Tbajlenxi jlu oc jun kꞌoj maꞌxix tuj cyaꞌj;
ate Miguel cyucꞌix ke t-anjel e kꞌojin tiꞌj ju jil dragón;
ax icx ju jil dragón cyucꞌix ke t-anjel e kꞌojin.
8 Pero mintiꞌ e xcyeꞌ tiꞌj Miguel;
ex mintiꞌtl tumel tuꞌn cyten tuj cyaꞌj.
9 Cyjaꞌtzun etz xoꞌn ju nintz jil dragón,
aju ojtxi lobaj,
aju toc tbi tajaw il ex Satanás,
aju in sbun cyiꞌj cycyakil xjal twitz txꞌotxꞌ;
cuꞌtz xoꞌn twitz txꞌotxꞌ,
ex cyucꞌix ke t-anjel e cuꞌtz xoꞌn tucꞌil.
10 Xitzun nbiꞌne jun tkꞌajkꞌajel cyuwxix tuj cyaꞌj,
in tmaꞌn:
—Jaꞌlo ma tzul aju colbil tuꞌn Kdios,
tucꞌix tipumal ex tcawbil,
ex ma pon tkꞌijlalil tuꞌn tcawin Crist aju at toclen tuꞌn Dios;
porque ma tzꞌex xoꞌn tajaw il aju in siꞌmin yol cyiꞌj kerman,
aju in siꞌmin yol cyiꞌj twitz Kdios kꞌijl ex konicꞌan.
11 Ex ma cub tiꞌj tajaw il cyuꞌn,
nok tuꞌnju tchcꞌel Tal Ẍneꞌl,
ex tuꞌnju yol ax toc xi cychicꞌbaꞌn;
porque mintiꞌ cub cyximan ka maꞌxix toclen cychwinklal,
nok oꞌcx cykꞌon cyib tuꞌn cycyim.
12 Tuꞌntzun jlu tzalajxa cyaꞌj,
ex che tzalajxe akeye najl keye tuj cyaꞌj.
Pero becꞌbil cywitze akeye najl twitz txꞌotxꞌ ex tuj mar.
Porque ma cuꞌpun tajaw il cyxole tucꞌil nim tkꞌoj,
porque baꞌn tuꞌn mya nim kꞌij tuꞌn ttentl.
13 Tejtzun tnaꞌnte jil dragón ka otok cuꞌtz xoꞌn twitz txꞌotxꞌ,
oc ten kꞌojlel tiꞌj xuꞌj,
aju xinak tal otok tzul itzꞌj.
14 Atzunte xuꞌj xi kꞌoꞌn cabe t-xicꞌ,
aju t-xicꞌ nintz tꞌiw,
tuꞌntzun tel ok twitz lobaj tuꞌn tpon lipan tuj lugar mintiꞌ cynajbil xjal tuj,
ex tuꞌn tpon tuj tlugar jatum tuꞌn tcꞌaꞌchanjtz ox abkꞌi tucꞌil mey.
15 Atzunte lobaj jatz aꞌ tuj tkul ic tzaꞌn jun nima,
xi ttilin tiꞌj xuꞌj tuꞌn t-xi ikan xuꞌj tuꞌn aꞌ.
16 Pero ate txꞌotxꞌ onin tiꞌj xuꞌj,
porque xi cꞌabchaj txꞌotxꞌ,
ex xi tcꞌaꞌn txꞌotxꞌ aꞌ aju jatz tuj tkul jil dragón.
17 Tzajtzun nimxix tkꞌoj jil dragón tiꞌj xuꞌj,
ex xiꞌ kꞌojlel cyiꞌj chꞌintl tiyjil xuꞌj,
akeju in japun tmandamyent Dios cyuꞌn ex cucx in xi cychicꞌbaꞌn ax toc tiꞌj Jesucrist.