Keju cabe testiw
11
Ex tzaj kꞌoꞌn jun ajlaj weye ic tzaꞌn jun tzeꞌ te echbil,
ex tzaj kꞌmaꞌn weye:
—Weꞌctza,
echanxa tja Dios tucꞌix ju altar,
ex ajlanxa jteꞌ xjal in che cꞌulun tuj.
2 Atzunju ttxaꞌn peꞌn tiꞌjtzi tja Dios,
kꞌoncja,
miꞌn cub techana,
porque o txi kꞌoꞌn cye txkantl xjal tuj juntl nasyon;
ex cbajel cywaban ju tnam xjan tuj 42 xjaw.
3 Ex cxel nmaꞌne cye keju cabe testiw wiꞌje tuꞌn t-xi cychicꞌbaꞌn cye xjal aju cxel nmaꞌne cye,
ex tuꞌn cyyolin tuj jun mil tucꞌil 260 kꞌij,
toc cyxbalun chꞌiꞌx twitz.
4 Akeju cabe testiw lu,
atzun keju cabe tzeꞌ olivo ex atzun keju cabe cycubil candil waꞌl ke twitz Dios aju Tajaw txꞌotxꞌ.
5 Ka at jun xjal taj tuꞌn tcꞌixbisan cyiꞌj,
cꞌeletz kꞌakꞌ tuj cytziꞌ,
biꞌx che bel tzꞌeꞌy ke aj kꞌoj cyiꞌj;
ex akeju cyaj tuꞌn cycꞌixbisan cyiꞌj,
ictzun tten che cymelju.
6 At cyoclen cabe testiw lu tuꞌn tlamet cyaꞌj cyuꞌn,
tuꞌn miꞌn ttzaj jbal tuj tkꞌijlalil oc t-xi cychicꞌbaꞌn aju cxel tmaꞌn Dios cye;
ex at cyoclen cyibaj aꞌ tuꞌn cyoc te chicꞌ;
ex at cyoclen tuꞌn cycꞌixbisante tcyakilju at twitz txꞌotxꞌ tuꞌn nok alcyex cꞌixbisabl,
ex nok jteꞌx maj cyajbil.
7 Octzun tjapun baj cyakꞌun aju tzaj kꞌmaꞌn cye tuꞌn Dios,
cꞌoquel ten txcup kꞌojlel cyiꞌj,
aju cjawitz tuj jul jalo ponin t-xeꞌ,
ex cbel cyiꞌj tuꞌn ex che bel tbyoꞌn.
8 Atzun cyximlal cyimni che cyjel txꞌileꞌ tuj plas tuj nintz tnam jatum jaw kꞌoꞌn Kajaw twitz crus,
aju tnam oc kꞌoꞌn tbi Sodoma ex Ejipt,
nok jun techal jlu.
9 Ex ke xjal te junjun tnam ex te junjun cꞌloj xjal junxilchak cyiyjil ex junxilchak cyyol ex ke xjal te junjun nasyon,
oc cyilaꞌ cyximlal cyimni tuj ox kꞌij tucꞌil mij,
ex mlay cycuyi tuꞌn cycuꞌx makuꞌn.
10 Ex ke xjal najl ke twitz txꞌotxꞌ che tzalajel cyiꞌj tuꞌnju otok che cyim,
ex che icꞌsal ninkꞌij,
ex cxel cysamaꞌn oyaj jun te juntl;
porque akeju cabe t-sanjel Dios lu otok che yajlanjtz xjal cyuꞌn twitz txꞌotxꞌ.
11 Pero tbajlenxi ox kꞌij tucꞌil mij tzaj tkꞌoꞌn Dios T-xew ex ocx cyuj tuꞌn cyjaw ankꞌin,
ex e jawtzun weꞌ;
ex tzaj nim cyxobil keju e queꞌyinte cye.
12 Entons akeju cabe testiw lu o cybi jun tkꞌajkꞌajel maꞌxix tzaj tuj cyaꞌj,
ex tzaj tmaꞌn cye:
—Cyjatze tzalu.
Ex e jax tuj cyaꞌj tuj jun muj,
ex e ilwaj cyuꞌn ke aj kꞌoj cyiꞌj.
13 Ax or tzaj jun cyaknajnab cyuwxix,
ex aju tlajin piẍ tnam biꞌx cub xitj;
aju cyajlal xjal e naj tuꞌn cyaknajnab,
wuk mil.
Atzun ke mastl xjal biꞌx e jaw secꞌpaj,
ex jaw cynimsaꞌn tbi Dios aju at tuj cyaꞌj.
14 Aju tcabin cꞌixbisabl ma tzicꞌ;
lu tzul naj aju toxin.
Oc kꞌajtzaꞌn twukin chun tuꞌn anjel
15 Ex oc kꞌajtzaꞌn chun tuꞌn twukin anjel,
ex akeju ateꞌ tuj cyaꞌj jaw tkꞌajkꞌajel cywiꞌ cyuwxix,
ex cyma:
Ke cawbil ateꞌ twitz txꞌotxꞌ ma che oc te tcawbil Kman ex te tcawbil Crist aju at toclen tuꞌn;
ex atzun te ccawil tuj tcyakil tabkꞌiyil te jumajx,
che chi.
16 Entons akeju 24 tij xjal kꞌukl ke tuj cykꞌukbil twitz Dios,
e cub ẍmejeꞌ tejxi tpon tacl tibaj cywitz twitz txꞌotxꞌ ex e cꞌulun twitz Dios,
17 ex cyma:
Cxel kkꞌoꞌne chjonte teya,
Kman Dios,
aya at tipumala tuꞌn tbant tcyakil tuꞌna,
aya at jaꞌlo ex aya at ojtxi,
[ex tzula,]
porque ma tzaj tyecꞌuna tipumala nimxix ex ma tzyet tcawina.
18 Ma tzaj cytxꞌuꞌjil ke nasyon tiꞌja,
pero ma tzul canun kꞌij tuꞌn ttzaj cycastiw,
ex ma pon tkꞌijlalil tuꞌn tcub cysentens cyimni tuꞌna,
ex tuꞌn t-xi tkꞌoꞌna jun oyaj cye t-sanjela,
akeju tmajena,
ex cye ocslal,
ex cye keju in che niman teya,
keju chꞌin cyoclen ex keju maꞌ cyoclen,
ex ma pon tkꞌijlalil tuꞌn cynaj keju ma naj twitz txꞌotxꞌ cyuꞌn,
che chi tij xjal.
19 Jakettzun ttzi tja Dios tuj cyaꞌj,
ex tuj tja Dios o ilwaj aju cax jatum cꞌuꞌn aju yol cyaj bant tiꞌj tuꞌn Dios cyucꞌil xjal.
Ex tzaj tkan kꞌancyok tucꞌix kꞌancyok in jululun,
tucꞌix jun cyaknajnab,
ex nim sakbakun.