Aju anjel kꞌiꞌn ju tal uꞌj tuꞌn
10
Ex o wile juntl anjel nim tipumal cuꞌtz tuj cyaꞌj,
tocx tuj muj,
tjax t-xmacal lobaj tuj twiꞌ.
Atzun twitz anjel ic queꞌyin ic tzaꞌn kꞌij,
atzun ke tkan ic tzaꞌn tkan kꞌakꞌ maꞌ tcꞌitz.
2 Tzyuꞌn jun tal uꞌj tuꞌn,
jakoꞌmaj,
ex aju tkan tuj tbankꞌab cub tkꞌoꞌn tibaj mar;
atzun juntl tkan tuj tnayaj cub tkꞌoꞌn twitz txꞌotxꞌ.
3 Jawtzun tkꞌajkꞌajel twiꞌ cyuwxix ic tzaꞌn in tzanun jun balun;
ex tej tjaw schꞌin,
e kꞌajt wuk kꞌancyok.
4 Tejtzun cybaj kꞌajt ke wuk kꞌancyok,
cyjaꞌtok tcub ntzꞌibane jlu;
pero o nbiye jun tkꞌajkꞌajel tzaj tuj cyaꞌj,
tzaj tmaꞌn weye cyjaꞌ:
—Aju ma cyma wuk kꞌancyok,
miꞌn tzꞌel tkanil tuꞌna,
ex miꞌn cub ttzꞌibana,
chi weye.
5 Ex aju anjel aju o wile waꞌl tibaj mar ex tibaj txꞌotxꞌ jaw tkꞌoꞌn tbankꞌab twitz cyaꞌj,
6 ex xi tmaꞌn jun yol axix toc twitz Dios aju itzꞌ tuj tcyakil tabkꞌiyil te jumajx,
aju o binchante cyaꞌj tucꞌix tcyakilju at twitz,
ex o binchante txꞌotxꞌ tucꞌix tcyakilju at twitz,
ex o binchante mar tucꞌix tcyakilju at tuj.
Ex tma anjel:
—Mlay txi lakꞌeꞌ mastl tuj tkꞌijlalil;
7 porque tuj tkꞌijlalil oc toc kꞌajtzaꞌn chun tuꞌn twukin anjel,
cjapuneltzun aju yol ewantok tuꞌn Dios nej,
ic tzaꞌn o tma cye t-sanjel akeju tmajen.
8 Ex aju tkꞌajkꞌajel o nbiye tzaj tuj cyaꞌj,
tzaj yolin juntl maj wucꞌile,
ex tzaj tmaꞌn cyjaꞌ:
—Txiꞌya,
ex cꞌmontza aju tal uꞌj catl,
aju tzyuꞌn tuꞌn anjel aju waꞌl tibaj mar ex tibaj txꞌotxꞌ.
9 Inxtzune tucꞌil anjel,
xi nmaꞌne te tuꞌn ttzaj tkꞌoꞌn ju tal uꞌj weye.
Atzun te tzaj tmaꞌn weye:
—Tzyuma ex waꞌnxa;
chiꞌ cꞌoquel tuj ttziꞌya ic tzaꞌn taꞌl cab,
atzun tuj tcꞌuꞌja,
cꞌa cꞌoquel.
10 Tzajtzun ntzyuꞌne aju tal uꞌj tuj tkꞌab anjel ex xi nwaꞌne;
puro chiꞌ oc tuj ntziꞌye ic tzaꞌn taꞌl cab,
pero tej tbaj nwaꞌne,
puro cꞌa oc tuj ncꞌuꞌje.
11 Tzajtzun tmaꞌn weye cyjaꞌ:
—Ilxix tiꞌj tuꞌn t-xi tpacbaꞌna juntl maj aju ctzajel tmaꞌn Dios teya,
ex tuꞌn tyolina cyiꞌj nimcu tnam ex cyiꞌj nimcu nasyon ex cyiꞌj nimcu cꞌloj xjal junxilchak cyyol,
ex cyiꞌj nimcu rey,
chi weye.