9
Ex oc tkꞌajtzaꞌn tjweꞌyin anjel ju chun,
ex o wile tzaj tzꞌak jun cheꞌw twitz cyaꞌj cubil twitz txꞌotxꞌ;
ex xi kꞌoꞌn tal ja te tuꞌn tjaket ttzi jul jalo ponin t-xeꞌ.
2 Ex jakettzun ttzi jul tuꞌn,
aju jalo ponin t-xeꞌ,
ex jatz sib tuj jul ic tzaꞌn in jatz sib tuj jorni maꞌxix;
ex biꞌx oc yupj twitz kꞌij tucꞌix twitz cyaꞌj tuꞌnju sib jatz tuj jul.
3 Ex e jatz ẍplon tuj sib e cub ten twitz txꞌotxꞌ;
ex xi kꞌoꞌn cyipumal ẍplon ic tzaꞌn cyipumal ke siꞌnin ateꞌ twitz txꞌotxꞌ.
4 Ex xi kꞌmaꞌn cye tuꞌn miꞌn cycꞌixbisan tiꞌj chꞌim at twitz txꞌotxꞌ,
ex tuꞌn miꞌn cycꞌixbisan tiꞌj chaꞌx cꞌul ex mi tiꞌj tzeꞌ,
nok oꞌcx tuꞌn cycꞌixbisan cyiꞌj xjal,
akeju mintiꞌ t-sey Dios toc tibaj cywitz.
5 Mintiꞌ xi kꞌoꞌn cyoclen tuꞌn cycyim xjal cyuꞌn,
nok oꞌcx tuꞌn cyyajlanjtz xjal cyuꞌn tuj jweꞌ xjaw;
ex aju taꞌw cycꞌixbisabl ic tzaꞌn nnoꞌc txꞌaꞌn jun xjal tuꞌn siꞌnin.
6 Tuj tkꞌijlalil lu,
che jyol xjal tumel tuꞌn cycyim,
pero mlay che cyim;
masque cyajbil tuꞌn cycyim,
pero mlay che cyim.
7 Ic che queꞌyin ẍplon ic tzaꞌn ke chej banin cyten tuꞌn cyxiꞌ tuj kꞌoj;
ex tjax jun tiꞌxti tuj cywiꞌ ic queꞌyin ic tzaꞌn coron kꞌan pwak ttxꞌotxꞌil;
atzun cywitz ẍplon ic queꞌyin ic tzaꞌn cywitz xjal.
8 Atzun ttzmal cywiꞌ ic queꞌyin ic tzaꞌn ttzmal cywiꞌ xuꞌj;
ex ke twitz cyeꞌ ic che queꞌyin ic tzaꞌn twitz cyeꞌ balun.
9 Ex toc cychicyet ẍplon ic queꞌyin ic tzaꞌn chicyet cꞌuxbil;
ex in xumin cyxicꞌ ic tzaꞌn in che xumin nimcu carwaj jawoꞌn cyuꞌn chej in che kelan tuj kꞌoj;
10 ic queꞌyin cyjeꞌ ẍplon ic tzaꞌn cyjeꞌ siꞌnin ex at cytxꞌabl;
ex at tipumal cyjeꞌ tuꞌn cycꞌixbisanjtz xjal cyuꞌn tuj jweꞌ xjaw.
11 Ex at jun cyrey ẍplon cawil cyibaj,
atzun anjelju najl tuj jul jalo ponin t-xeꞌ;
aju tbi anjel tuj yol ebrey Abadón,
atzun tuj yol grieg Apolión tbi.
12 Aju tnejel cꞌixbisabl ma tzicꞌ;
pero atx cabetl cꞌixbisabl che ul te tibajxi jlu.
13 Ex oc kꞌajtzaꞌn chun tuꞌn tkakin anjel,
ex o nbiye at jun tzaj kꞌajt cyxol keju cyaje cach ateꞌc tiꞌj altar kꞌan pwak ttxꞌotxꞌil,
aju tcub twitz Dios.
14 Tzaj tmaꞌn teju tkakin anjel aju kꞌiꞌn chun tuꞌn:
—Tzokpiꞌmela keju cyaje anjel,
akeju cꞌaloꞌn ttzi nima Éufrates,
chi.
15 E jeꞌltzun tzokpiꞌn ke cyaje anjel,
akeju banimaj cyten alcye or,
alcye kꞌij,
alcye xjaw ex alcye abkꞌi tuꞌn cycyim keju toxin cꞌloj xjal cyuꞌn.
16 Aju cyajlal soldad cyjax cyibaj chej,
cab syent miyón cybet;
o nbiye cyajlal.
17 Cyjaꞌtzun o wile ic tzaꞌn tuj witzicꞌ ke chej cyucꞌix keju cyjax cyibaj,
toc cychicyet cyak queꞌyin ic tzaꞌn kꞌakꞌ,
ex chaꞌx queꞌyin ic tzaꞌn tal abj zafiro,
ex ẍkꞌan queꞌyin ic tzaꞌn azufre.
Ex aju cywiꞌ chej ic queꞌyin ic tzaꞌn cywiꞌ balun;
ex nneꞌtz kꞌakꞌ tuj cytziꞌ chej tucꞌix sib ex azufre.
18 Tuꞌnju ox cꞌixbisabl lu e baj cyim toxin cꞌloj xjal:
tuꞌn kꞌakꞌ ex tuꞌn sib ex tuꞌn azufre etz tuj cytziꞌ chej.
19 Porque at cyipumal chej tuꞌn cycꞌixbisan tuꞌn cytziꞌ ex tuꞌn cyjeꞌ;
porque aju cyjeꞌ ic queꞌyin ic tzaꞌn lobaj,
at cywiꞌ tiꞌj cyjeꞌ,
ex baꞌn txꞌaꞌn cyjeꞌ.
20 Atzun ke mastl xjal,
akeju mintiꞌ e cyim tuꞌnju ox cꞌixbisabl lu,
mintiꞌ ajtz tiꞌj cyanmi,
ex mintiꞌ el cypaꞌn cyib cyiꞌj tbinchben cykꞌab,
ex mintiꞌ cyaj cycolin tuꞌn cycꞌulun cywitz ke juꞌẍ ex cywitz ke tilbilal kꞌan pwak,
ex sak pwak,
ex kꞌan cꞌuxbil,
ex abj ex tzeꞌ cytxꞌotxꞌil,
akeju miban che queꞌyin,
ex miban che bin,
ex miban che bet.
21 Ex mintiꞌ ajtz tiꞌj cyanmi xjal,
mintiꞌ cyaj cycolin tuꞌn tcub cybyoꞌn xjal,
tuꞌn cycyꞌaꞌn,
tuꞌn cyyaẍin,
ex tuꞌn cyelkꞌan.