Aju twukin sey ex aju ẍlaꞌc kꞌan pwak ttxꞌotxꞌil
8
Tejtzun tel tiꞌn Tal Ẍneꞌl aju twukin sey,
mi jun o kꞌajt tuj cyaꞌj,
balo te mey or.
2 Ex e wile keju wuk anjel waꞌl ke twitz Dios;
ex xi kꞌoꞌn wuk chun cye.
3 Ultzun juntl anjel ex cub weꞌ twitz altar,
kꞌiꞌn jun ẍlaꞌc tuꞌn,
kꞌan pwak ttxꞌotxꞌil;
ex xi kꞌoꞌn nim storac te tuꞌn toc te tmoj cynaꞌj Dios cycyakil ocslal,
ex tuꞌn tcub tkꞌoꞌn tibaj ju altar kꞌan pwak ttxꞌotxꞌil aju tcub twitz tkꞌukbil Dios.
4 Jaw t-sibel storac tuj tkꞌab anjel,
japun twitz Dios tucꞌix cynaꞌj Dios ocslal.
5 Jawtzun tiꞌn anjel ju ẍlaꞌc ex cuꞌx tnojsaꞌn tuꞌn kꞌakꞌ tcub tibaj altar,
cuꞌtz t-xoꞌn twitz txꞌotxꞌ.
Ex tzajtzun kꞌancyok in julin tucꞌix tkan kꞌancyok ex tucꞌix cyaknajnab.
Oc cykꞌajtzaꞌn anjel ke chun
6 Atzun ke wuk anjel,
akeju kꞌiꞌn wuk chun cyuꞌn,
bant cyten tuꞌn toc cykꞌajtzaꞌn chun.
7 Tej toc tkꞌajtzaꞌn tnejel anjel ju chun,
tzaj sakbakun tucꞌix kꞌakꞌ cysmon cyib tucꞌil chicꞌ,
e tzaj xoꞌn twitz txꞌotxꞌ;
ex baj tzꞌeꞌy toxin piẍ twitz txꞌotxꞌ,
ex baj tzꞌeꞌy toxin tnej tzeꞌ,
ex baj tzꞌeꞌy tcyakil chaꞌx cꞌul.
8 Ex tej toc tkꞌajtzaꞌn tcabin anjel ju chun,
o wile ic tzaꞌn jun witz maꞌxix in cꞌant tuꞌn kꞌakꞌ tzaj xoꞌn tuj mar.
Ex aju toxin piẍ mar oc te chicꞌ.
9 Ex e cyim keju toxin tnej jil ateꞌ tuj mar.
Ex toxin cꞌloj barc e baj naj.
10 Ex tej toc tkꞌajtzaꞌn toxin anjel ju chun,
tzaj tzꞌak jun cheꞌw maꞌxix twitz cyaꞌj,
in cꞌant ic tzaꞌn ttxan tzaj,
ex tzaj tzꞌak cyibaj toxin cꞌloj nima in che bet ex cyibaj jatum in che jatz twi aꞌ.
11 Atzun tbi cheꞌw,
Cꞌa Cꞌul;
ex aju toxin cꞌloj aꞌ oc puro cꞌa,
ex nimcu xjal e cyim tuꞌn cylaj aꞌ otok che oc puro cꞌa.
12 Ex tej toc tkꞌajtzaꞌn tcyajin anjel ju chun,
oc cꞌixbisaꞌn aju toxin piẍ kꞌij,
tucꞌix toxin piẍ xjaw,
tucꞌix toxin tnej cheꞌw,
cyjaꞌtzun cub kloljxix toxin tnej cywitz,
tuꞌn miꞌn tten spicꞌun cyaje or te kꞌijl ax icx te konicꞌan.
13 Ex o wile jun anjel in lipan tmijil cyaꞌj,
ex o nbiye tkꞌajkꞌajel twiꞌ cyuwxix in tmaꞌn:
—Becꞌbil cywitz,
becꞌbil cywitz,
becꞌbil cywitz keju najl ke twitz txꞌotxꞌ tuꞌn cylaj ke chun chꞌixtok cyoc kꞌajtzaꞌn cyuꞌn oxetl anjel.